Tɔná 3

Hɔ̀ùta tàcɔ̰́tà kpekànamá

¹ Daadí yènì, kà Píyɛ́ɛ̀ nà Ìsá̰à̰ é n'kɔ́dí weèdɔɔ̀pu Weèdi hɔ̰́ɔ̰̀ta mɛhɛká. Ye weèdɔɔ̀pu, pà de mù pa̰kú yohokú wɔ̀ni màta̰a̰-dà. ² È hɔ̰́tà pà toó-ní dɔɔ̀o òcɔ̰́ǹ, nà p'òò pɛdà-ma k'ò yòǹ hɔ̀ùta. Daàka wɛǹni, pà de h'ɔ̰́ɔ̰̀ tóó-ní é tɛ̀ni óò hḭ́ná Weèdi hɔ̰́ɔ̰̀ta há̰ńnùdi pà toò-di-dà há̰ńnùsuudí, k'yé teha k'ó n'cɔɔ̀hu dící mɛ̀m̀pà de dúù-pa ye Weèdi hɔ̰́ɔ̰̀ta mɛhɛká. ³ Ye hɔ̀ùta dɛ́hà-ma Píyɛ́ɛ̀ nà Ìsá̰à̰ kà pà dúti, kà tá pà cɔ̀hà dící. ⁴ Píyɛ́ɛ̀ nà Ìsá̰à̰ kà pá fitá é tà n'wáń, kà Píyɛ́ɛ̀ é tà caka è yɔ̀: Ti wáńtá-ní! ⁵ K'yèe hɔ̀ùta é pà wáńtá nà ta yàma wɛǹni, è màhu è tonà pà kó tà pa̰a̰ yècɛ̰́ɛ̰̀-dà. ⁶ Àmá kà Píyɛ́ɛ̀ é tà caka è yɔ̀: N pú káá dífà, n mɛ̀ɛ pú káá wúdó, àmá n káá-sa m'a pɔ̰n-sá-dà. Nà Sèsí-Kídísì Nàsàdɛ́tì kóoó yèdi, yídá é cèn!

⁷ Ye wɔ̀ni, k'ó cɛ̰ɛ̰́ ta nɔ̀kàǹheukú é tà yíkàna-ní. Ye pesá n'ɛ̀ɛ pesá, k'yèe hɔ̀ùta tàka nà ta taàcɛ̰̀ǹci é dɛ́tá kpeèti. ⁸ Kà tá ceḿ pùu-ní é nɛɛ̀hi ta tàka hḭ́ǹka, é cetá cèmu. Kà tá nɔɔ́-n'ɛ̀ɛ tɔntɔndipá kà pá dúú ye Weèdi hɔ̰́ɔ̰̀ta mɛhɛká, kà tà cèǹtì, è fékù, è dùǹti Weèdi. ⁹ Kà nìku wɛǹni é tà dɛ́há, kà tà cèǹtì è dùǹti Weèdi. ¹⁰ Pà bantà-ma è yɔ̀ dɔɔ̀o mɛ̀ǹǹ de hɔ̰́ n'kaàdi-kó-dà Weèdi hɔ̰́ɔ̰̀ta há̰ńnùsuudí pesá è cɔ̀hɔ̀ta, kà wantanfɔ̰̀di é pà cɛ̰ɛ̰́, k'yé pà dii nà mìì de ò tɛ̀ni-sá-ní.

Píyɛ́ɛ̀ wɛì-nà nìku Weèdi hɔ̰́ɔ̰̀ta mɛhɛká

¹¹ Ye dɔɔ̀o de koò pú kpɛ̀i é nátá-nà Píyɛ́ɛ̀ nà Ìsá̰à̰. K'yé dii nìku wɛǹni, kà kú cocí-ní pa pesá, hà̰ǹhà̰ni pà toò-di Sàdòmɔ́ɔ̀ hà̰ǹhà̰ni mɛhɛká. ¹² Píyɛ́ɛ̀ dɛ́hà-ma miya̰, k'ó caka ye nìku è yɔ̀: Ìsìdàyɛ́dì nìpa-nà, baà tee k'yé nɛ dii nà mìì pa̰à̰-sa kú hḭ́ǹka? Baà tee kà nɛ ti kódí ma kú bookù, k'yè yònà nà ti cɔ̰́ɔ̰̀di kú nɔɔ̀ti-dà yoo ti cɔ́díma kpɛ́mú-dà tee tí pa̰à̰-ma k'yèe dɔɔò mɛnǹ é cèn? ¹³ Weèdi mɛ̀nì yòǹ-di ti yààpa Àbààhám̀, nà Sàákì, nà Sàkɔ́pu Weèdi-dà bɛkáà ni deho Sèsíì wɛhimú. Nɛ mɔ́mpá-d'òò yɛɛ́-nà yɔtí kpɛ̰́m̀ma, óò yeda Pìdátì yìhìka, kà mɛnn há̰ de kpɛ̀i óò wɛ́í. ¹⁴ Nɛ yedáà mɛ̀ǹǹ weni-kó-dà è coó, é cɔhà Pìdátì è yɔ̀ ó nɛ wɛ́í niìkɔ̀ùdo. ¹⁵ Nɛ hédà kà pá kɔ̀ù mɛ̀ǹǹ yòǹ-ko-dà fòùmu yudí. Àmá Weèdi ò yá̰hìnà-á-ma kpíípa mɛhɛká, kà t'óò dɛ́há nà ti nɔ̀ǹci. ¹⁶ Sèsíì ti dań-ko kú yèdi kpɛ́mú-dà tee ye dɔɔò nɛ dìi-kò òò yá̰á̰, ò dɛ́tà-ma kpeèti è nɛ̀hi cɔ́cɔ́. Dandaní ti káá-di Sèsíì hḭ́ǹka-dà kpekànà ye dɔɔò nɛ wɛǹni yìhìka.

¹⁷ N mɛ̀ɛ yá̰á̰-ma dɛ́dɛ́í n kúcàpa nà n potɔ̰ɔ̰̀pa, è yɔ̀ nɛ́na nà nɛ kpɛ̰́m̀ma nɛ pa̰à̰ miya̰ è pú yá̰á̰. ¹⁸ Weèdi há̰ pa̰à̰ nì de wɛdà ni wɛtɛ̰́nápa wɛǹni nùdi mɛhɛká è yɔ̀ nì kó pa̰á-sa-dà. Nì de yɔ̀ ni Ta̰kadáko yònà é dii náńkú-dà. ¹⁹ Peǹta-nà fòùmu, é fitá Weèdi bɛ́ka kà ní nɛ deèda nɛ sḭ̀ḭ̀ma. ²⁰ Ye wɔ̀ni, Bateó kó nɛ pa̰a̰-á̰-ma muhipàma wɔ̀ka, é yíí tɔn-ní ni Ta̰kadáko Sèsíì, nì dɛnà é baàta-kó nɛ kpɛ́mú. ²¹ Yè békú Sèsí-Kídísì é dɛnà é m'péé hḭ́ǹka-dà, háá é n'sànà daadí Weèdi kó tón é dɔ̀hà-di niìya̰ wɛǹni. Nì de mà wɛɛ̀-ɛ́-dà-ho ni wɛtɛ̰́náwenipá nùka mɛhɛká, k'yè káà dɛu. ²² Mɔ̀yísì de wɛdà o kú hḭ́ǹka-dà è yɔ̀: Bateó nɛ Weèdi kó nɛ tɔn-ń-ma-ní wɛtɛ̰́náko k'ó n'yònà mmí, é n'yòǹ nɛ kúcàa. Nɛ kó besí-ma ò kó nɛ caka-sá wɛǹni. ²³ Mɛ̀ǹǹ kú wɛnnì kó yee-kó ò kó besí-ma ye wɛtɛ̰́nákò-ní, pà k'óò dèna-á-ma Weèdi nìku mɛhɛká, óò kɔ̀ù. ²⁴ Weèdi wɛtɛ̰́nápa mɛ̀m̀pà kú wɛnnì wɛdà-pa, é cetá-nà Sàmùyɛ́dì, nà mɛ̀m̀pà tṵ̀nà-pa-ní o dàhàka, pa wɛǹni de wɛdà-á-ma mìì kó tɛ̀ni-sá-ní ye daakà mɛnkà kú mɛhɛká. ²⁵ Weèdi de yɛɛ̀-nà ni wɛtɛ̰́nápa é hḭ́ná-di nùdi, mɛ̀ɛ té yòǹ nɛ kpɛ́ɛdí-dà. Múnáma nì de pa̰à̰-nà-ma nɛ yààpa, mɛ̀ɛ té yòǹ nɛ kpɛ́ɛmá-dà, è yá̰á̰ nì de cakáà Àbààhám̀ è yɔ̀: N kó kóná teǹka boocí wɛǹni n'àa yaàbíiká kú nɔɔ̀ti-dà. ²⁶ Weèdi ta̰kadà ni deho óò kɔ̰́ɔ̰́-ní nɛ kú kpɛ́mú-dà cecemá. N'ɔ̀ɔ̀ tɔn-ní è yɔ̀ ó nɛ kóná-ma, é hédá kà bá nɛ mɛ̀ǹǹ dɛ̀ɛ̀-ko é wɛ́í o pa̰á̰kpákpààma.