Tɔná 4

Píyɛ́ɛ̀ nà Ìsá̰à̰ Sùwífùpa kpɛ̰́m̀ma yìhìka

¹ Píyɛ́ɛ̀ nà Ìsá̰à̰ de káà wɛì-nà nìku-dà, kà dɔ̀hàka yam̀ma, nà Weèdi hɔ̰́ɔ̰̀ta ceípa kú kpɛ̰́ǹn, nà Sàdúkìpa é tɛ̀ni. ² Yè de pú pà naa dɛ́dɛ́í nà Píyɛ́ɛ̀ nà Ìsá̰à̰ de biɔhànì-sa nìku. Pà de kù cakú è yɔ̀ Sèsíì yá̰ńtà-mà-ní, kpíípa mɛ̀ɛ té kó wáńtá é yá̰ńtá-ma. ³ Kà pá pà cɛ̰ɛ̰́ é pà yɛ̰̀ḭ kódeedí háá-nà kṵ́ńweǹni, mìì tee-sá wèǹku de yɔ̀ɔ dɔɔpú-dà. ⁴ Nà mɛma, nìpa mɛ̀m̀pà de yeèkaà-pa Weèdi wɛmá, kà pa dɔ́ɔ́di é hḭn weèdɔɔ̀pa. Pa dɔ́ɔ́di de yɔ̀ɔ-ɔ́-ma tòhèka kànùm̀ kpɛ́ɛmá.

⁵ K'yé weka, kà Sùwífùpa kpɛ̰́m̀ma, nà yɔtí kpɛ̰́m̀ma, nà Weèdi kpɛ̰́ńtìnùka biɔhànapá é peèta Sèdìsàdɛ́m̀. ⁶ Dɔ̀hàdi kpɛ̰́ǹn Ánì d'eè péé-ma, nà Kàyífù, nà Ìsá̰à̰, nà Àdɛ̀kìsá̰ńtì, nà dɔ̀hàdi kpɛ̰́ǹn hɔ̰́ɔ̰́tà kpɛ́ɛpá wɛǹni. ⁷ Kà pá kɔ̰́ɔ̰́ nùdi, kà pá tɛɛ̀-ní Píyɛ́ɛ̀ nà Ìsá̰à̰, é pà nɛ̀hìna pa cɔhɔ̀ka. Kà pá pà béka è yɔ̀: Woò nɛ kɔ̰́ɔ̰̀ ye nɔɔtì kà nɛ́ kpekàna ye dɔɔò-ní? Nà woò kú yènì-dà nɛ pa̰à̰-ma miya̰?

⁸ È hɔ̰́tà Weèdi Sèdi sṵ́nà Píyɛ́ɛ̀, k'ò mɛ̀ɛ pà caka è yɔ̀: Yɔtí wóópa nà yɔtí kpɛ̰́m̀ma-nà, ⁹ nɛ ti békú yenì, suumá ti pa̰à̰-ma-dà hɔ̀ùta hḭ́ǹka, nà ti hḭmpú é tà kpekàna nkɛ́ɛ̀? ¹⁰ Nɛ wɛnnì, nà Ìsìdàyɛ́dì nìku wɛǹni yònà é n'yá̰á̰-ma è yɔ̀, ye dɔɔò nɛ̀hi nɛ yìhìkà nà wɔ̰ǹkpeèti nà Sèsí-Kídísì Nàsàdɛ́tì kóoó yèdi nɔɔ̀ti-dà. Ye Sèsíì-dà nɛ kpɛ̰́ḭ́-ma kpíidɔkú hḭ́ǹka kà Weèdi óò yá̰hìna kpíípa mɛhɛká. ¹¹ Weèdi pɔ̀kàhi wɛì-ko kú wɛmá-dà è yɔ̀:

Tá̰à̰di, nɛ́na maápa wɛ́i-dí,

mɛní-dà tón é hḭn tá̰à̰di

mɛ̀nì púsí-di sukú nàmɔ̀ni kpɛ̰kpɛ̰kamá.

¹² O kú pesá cɔ̰́ɔ̰̀di-dà fḭ́hìnamá péé-ma. Teǹka nà ka nùdi, Weèdi pú kɔ̰́ɔ̰̀ nìdo tɔɔ̀o òcɔ̰́ǹ kú yèdi, mɛ̀nì yònà é ti fḭ́hìna-di.

¹³ K'yé dii sàma ye Sùwífùpa yudí kpɛ̰́m̀ma, mìì tee-sá pà de dɛ́hà Píyɛ́ɛ̀ nà Ìsá̰à̰ de pà wɛì-ma-dà nà daḿma, kà p'àá tṵ́má cɔ́ɔ́ é n'hɔ̰́tà pà pú yòǹ niìsàpa pàcɔ̰́pà, pà mɛ̀ɛ pú yá̰á̰ pɔ̀kàta. Pà de yá̰á̰ è yɔ̀ pà de nɔɔ̀-nà Sèsíì-dà. ¹⁴ P'àá de dìi-má ye dɔɔ̀o mɛ̀ǹǹ kpekáà-ko k'ò nɛ̀hi è pà pɛ̀ɛ-nà tá, kà pá mɔ́ńka pà kó tɛ̰́ná-sa. ¹⁵ Kà pá kɔ̰́ɔ̰́ nùdi è yɔ̀ pá yɛ̀dì ye sídàma nahàku mɛhɛká, ye wɔ̀ni é púsí nɔ̀nɔ̀hicí pa cɔhɔ̀ka. ¹⁶ Pà de cakú pa tɔɔ̀pa è tonà: Ti kó pa̰á̰ m̀mɔ́ńya̰-dà ye nìpà-ní? Sèdìsàdɛ́m̀ nìpa wɛǹni yá̰á̰-dà è yɔ̀ pà pa̰à̰ pɔ́ńtápa̰á̰ma, mà pú sɔ̀di, ti mɛ̀ɛ pú kó nɛɛ́ mà nɔ̀hì. ¹⁷ Àmá, ti pú yònà é hédá k'yèe wɛmà é dɔ̀hà é pidá nìku mɛhɛká. Tí deèna nùdi é yeda è yɔ̀ pà koò dá wɛɛ́ n'ɔ̀ɔ̀cɔ̰́ǹ Sèsíì yèdi.

¹⁸ Kà pá tṵ́má pà yíí-ní, é pà caka è yɔ̀ pà koò dá wɛdá yoo é biɔhàna nà Sèsíì yèdi. ¹⁹ Àmá, kà Píyɛ́ɛ̀ nà Ìsá̰à̰ é pà tɛ̰́ná è yɔ̀: Nɛ mɔ́mpá é cɔ́ɔ́ é dɛ́hé-è! Ye coó-dà Weèdi yìhìka è yɔ̀ tí besí nɛ́na é yeda Weèdi kpɛ́ɛmá? ²⁰ Tḭ́ńti, ti pú kó nɛɛ́ hédá è pú n'wɛdà ti dɛ́hà-sa nà ti yeèkaà-sa.

²¹ K'yèe Sùwífùpa yudí kpɛ̰́m̀ma é tṵ́má fá̰tá nɔ̀ǹci pa hḭ́ǹka, ye kú dàhàka é pà wɛ́í. Pà de pú dɛ́tà pà kó yɛ̰̀ḭ-sá kú hḭ́ǹka é yɔ̰́ń-nà pa toòka, è yá̰á̰ nìku wɛǹni de duǹti Weèdi-dà nà mìì pa̰à̰-sa kpɛ́mú. ²² Ye dɔɔ̀o mɛ̀ǹǹ de dɛ́tà-ko kpekàma n'ɛ̀ɛ kú pɔ́ńtápa̰á̰mà, de ha̰tà-á-ma beeká púnàhì.

Weèdɔɔ̀pa weèdɔɔ̀mu

²³ Pà pà wɛ́i-má, kà pá ceḿ taá pa kpɛ́ɛpá pesá, é tɛ̀i é pà caka dɔ̀hàka yam̀ma kpɛ̰́m̀ma nà yɔtí kpɛ̰́m̀ma de pà hḭ́mpú wɛǹni. ²⁴ Pà yèkaà-ma mɛma, kà pá pɛ́ɛ́ nùdi nìcɔ̰́ é dɔɔ Weèdi è yɔ̀: Ti Bateù, fɔ̰́ń-dà pa̰à̰ teǹka nà hḭ́ǹka, nà dàmɛ́dì, nà mìì péé-sa wɛǹni ye mɛhɛká. ²⁵ Fɔ̰́ń-dà de hédà k'àa Sèdi é wɛdá n'àa deho Dàfítì ti yàdo nùdi mɛhɛká è yɔ̀:

Baà tee kà boocí nìku

toó hoodí dòm̀?

Baà tee kà cì daakú cɔ̀ci

mɛ̀ǹcì pú cì kɔ́dí-nà-ci yècɔ̰́?

²⁶ Teǹka wóópa yídà tɔ̀di,

kà yɔtí kpɛ̰́m̀ma é múná nùdi

è kɔ̰̀ǹti-nà Bateó n'ɔ̀ɔ ta̰kadáko.

²⁷ Mɔ́masí-dà Hèdótì nà Pɔ̰́ńsí Pìdátì de pɛ́ɛ̀-ma nùdi yɔtì mɛntì kú mɛhɛká, nà boocí tɔcí nìpa, nà Ìsìdàyɛ́dì kpɛ́ɛpá è kɛ̰̀ḭ-nà a dehè-wenɔ́ Sèsíì a batà-ko k'ò yòǹ a ta̰kadáko. ²⁸ Pà pa̰à̰ a de hḭ́nà è kó pa̰á̰-sa wɛǹni-dà nà daadí yènì, a nɔɔ̀ti n'àa kpɛ̀imá mɛhɛká. ²⁹ Sá̰mà-ní ti Teù, dɛ́há pà ti fá̰kápú-ma kú bookú. Pa̰a̰ a dehèpa kṵnnɔ̀ǹci kà pá caka a wɛmá. ³⁰ Bɛka a nɔɔ̀ti k'yé teha kà kpekànamá, nà pɔ́ńtápa̰á̰ma, nà pɔ́ńtáyḭḭ́pa é pa̰á̰ n'àa dehè-wenɔ́ Sèsíì yèdi.

³¹ Pà yɔ̀ɔ-má weèdɔɔ̀pu, kà bɛ̀m̀bɛ̀ni pà de tísí-di é sa̰mpà. Kà Weèdi Sèdi é pà sṵ́ná, kà pá cetá è cakú Weèdi wɛmá nà kṵnnɔ̀ǹci.

Weèdɔɔ̀pa múń kááma è pɛ́ɛ̀ mà tookú

³² Mɛ̀m̀pà kú wɛnnì tàà-pa dandaní Sèsíì hḭ́ǹka de múń nùdi nìcɔ̰́-dà dɛ́dɛ́í, è yòǹ yàma màcɔ̰́, yam̀màhàdi nìcɔ̰́. P'oòcɔ̰́ǹ de pú hɔ̰́ n'yɔ̀ o kááma yòǹ o cɔ̰́ɔ̰̀di kpɛ́ɛmá-dà, àmá pà de káá-sa wɛǹni de yòǹ pa wɛǹni kpɛ́ɛsá-dà. ³³ Nà nɔɔ̀ti sàti-dà ye tɔntɔndipá de cakú-ma Teó Sèsíì yá̰ńtáma wɛmá, kà Weèdi pa̰á̰suumá sàma pà kóḿ. ³⁴ Pa mɛhɛká òcɔ̰́ǹ de pú mɔ́ńkú yècɛ̰́ɛ̰̀. Mɛ̀m̀pà kú wɛnnì de káá-pa yɛ̀ka yoo hɔ̰́ɔ̰́hí de hɔ̰́ yè yɛda-á-ma, é tɛɛ̀ní ye dífa ³⁵ é fà kɔ̰́ɔ̰́ ye tɔntɔndipá. Ye wɔ̀ni, kà pà té fà totá, bá mɛ̀ǹǹ dɛ̀ɛ̀-ko k'ó dɛ́tá y'òò békú-fa kú nùdi.

³⁶ K'yé n'yònà dɔɔ̀o òcɔ̰́ǹ de kákáàma yɛ̀di. Ye dɔɔ̀o yèdi-dà de dɛɛ̀ Sòsɛ́fù, k'ò yòǹ Dèfíì nahàku kóoó, k'òo yɔtí héé Sípúdì, kà Sèsíì tɔntɔndipá de ò pɛ̰ḭ yèdi tɔɔ̀di è yɔ̀ Bànàbásì, mìì kpɛ̀i é n'yɔ̀-sa: Nìdo mɛ̀ǹǹ nakànì-ko yàma. ³⁷ K'ó yɛda o yɛ̀di, é tɛɛ̀ní ni dífa é fà kɔ̰́ɔ̰́ ye tɔntɔndipá.