Tɔná 5

Ànànìyásì nà Sàfídá nuǹhetí

¹ Dɔɔ̀o òcɔ̰́ǹ-dà há̰ de péé kà p'òò toò Ànànìyásì, k'òo poòo kpɛ́ɛdí toò Sàfídá. Kà pá kɔ̰dà n'ɔ̀ɔ poòo é yɛda pa teǹka. ² K'ó yakàda ye dífa é sɔɔ̀na k'òo poòo yá̰á̰, é tóó sɔ̰́nfá é taá kɔ̰́ɔ̰́ Sèsíì tɔntɔndipá. ³ Àmá, kà Piyɛ́ɛ̀ óò béka è yɔ̀: Ànànìyásì, badà tee k'á héé kà wɛɛ̀kupá wódo é ta̰ǹta ma kú bookú a yàma k'á báńta Weèdi Sèdi è yɔ̀ a yɛ̀di dífa wɛǹni-dà è há̰ fà yàkàdà é sɔɔ̀na-ní hɔ̰́ɔ̰̀ta? ⁴ A de mun pú nì yɛɛ́ɛ̀-ma, nì de pú yòǹ a kpɛ́ɛd'áa? Yoo a nì yɛɛ́ɛ̀-ma é yɔ̀ɔ, k'à de kpɛ̀i-nà-sa ni dífa, a de pú kó nɛɛ́ yè pa̰ná? Ntɛ́ y'àá hḭmà k'á ta̰kadá a yàma mɛhɛká, é pa̰á̰ ye kú pa̰á̰mà-ní? Yè pú yòǹ nìpa-dà a báńtáà-ma, àmá a báńtáà Weèdi-dà. ⁵ Ànànìyásì yèkaà-ma mɛma, k'ó dɔdi é kpíí. Mɛ̀m̀pà kú wɛnnì de mà yèkaà-pa, kà wantanfɔ̰̀di é pà cɛ̰ɛ̰́ sàma. ⁶ Kà dapàm̀ma é yídá, é pɔ̰á̰ o wɔ̰̀ǹku, é kù ka̰hàna é taá kù dáná.

⁷ Kà wɔ̀ni màta̰a̰ kpɛ́ɛmá é ka̰há, k'òo poòo é dúú-ní è pú yá̰á̰ mìì pa̰à̰-sa. ⁸ Kà Píyɛ́ɛ̀ óò béka è yɔ̀: N caka-ní, nɛ yɛdáà nɛ yɛ̀di dífà mɛnfà kú nùdi-dà? K'ó tɛ̰́ná è yɔ̀: À̰à̰, mɛnfá kú nùdi-dà. ⁹ Ye wɔ̀ni, kà Píyɛ́ɛ̀ óò caka è yɔ̀: Ntɛ́ yè hḭmà fɔ̰́ń n'àa dɔɔ̀o kà nɛ́ kɔ̰dà é bɛń Bateó Sèdi? Ǹtɛ, kà mɛ̀m̀pà dánà-pa-ní a dɔɔ̀o péé há̰ńnùdi. Pà mɛ̀ɛ té k'áa tódá-ma. ¹⁰ Ye pesá n'ɛ̀ɛ pesá, k'ó dɔdi ye tɔntɔndikó tàka fɔ̰̀di é kpíí. K'yèe dapàm̀ma é dúú-ní, óò dɛ́há k'ò kpíi. Kà p'óò tódá é taá ò dáná o dɔɔ̀o pesá. ¹¹ Kà wantanfɔ̰̀sàdi é cɛ̰ɛ̰́ Weèdɔɔ̀pa wɛǹni, nà mɛ̀m̀pà kú wɛnnì de yeèkaà-pa ye kú pa̰á̰mà-ní.

Pɔ́ńtápa̰á̰ma dɔ́ɔ́di

¹² Sèsíì tɔntɔndipá de pa̰kú pɔ́ńtápa̰á̰ma nà pɔ́ńtáyḭḭ́pa dɔ́ɔ́di-dà nìpa cɔhàka. Weèdɔɔ̀pa wɛǹni de hɔ̰́ peèta nùdi nìcɔ̰́-dà Sàdòmɔ́ɔ̀ hà̰ǹhà̰ni mɛhɛká. ¹³ Tɔɔ̀o òcɔ̰́ǹ de pú hɔ̰́ teha é pà pɛ́ɛ́-nà. Nà mɛma, kà nìpa de pà sɛdí sàma. ¹⁴ Nìpa mɛ̀m̀pà de tanì-pa pa dandaní Teó hḭ́ǹka, daapá nà poòpa kà pa dɔ́ɔ́di dɔɔ̀haà è wɛhikú, kà pà dàkù-ho weèdɔɔ̀pa hòǹhòkàdi. ¹⁵ Pà múńtà de hɔ̰́ toha-ní mɔkàpa cɔ̀ci bɛ́ɛ́cí-dà, é pà dɔá dɔɔ̀ka hḭ́ǹka yoo mɛ̀ti hḭ́ǹka, è kpɛ̀i kà Píyɛ́ɛ̀ kɛ̰hɛdi, k'òo wɛ̰́ma é pḭ́ń bá p'oòcɔ̰́ pa mɛhɛká. ¹⁶ Kà nìpa dɔ́ɔ́di mɛ̀ɛ té de é yɛɛ̀ni nà yɔtí mɛ̀ǹtì tɔ́-tɔ́sí-nà-ti Sèdìsàdɛ́m̀, è toó-ní mɔkàpa nà wɛɛ̀kupá de fá̰kápú-pa, pa wɛǹni kà pá kpeka.

Pà fá̰kápú Sèsíì tɔntɔndipá

¹⁷ Ye wɔ̀ni, kà dɔ̀hàdi kpɛ̰́ǹn, nà mɛ̀m̀pà de ò péé-nà-pa wɛǹni, è yòǹ Sàdúkìpa hùhùkèdi kpɛ́ɛpá é yídá sɛ̰sɛ̰kú pa hḭ́ǹka. ¹⁸ Kà pá pà cɛ̰ɛ̰́ é pà yɛ̰̀ḭ kódedí. ¹⁹ Àmá yèǹka mɛhɛká, kà Bateó tɔntɔndikó é tɛ̀ni kpetá ye kódedí cɔ̀ka, é pà dèna, é pà caka è yɔ̀: ²⁰ Taá-nà Weèdi hɔ̰́ɔ̰̀ta mɛhɛká, é tɛ̀i caka nìku fòùmu wɛmá. ²¹ K'yèe tɔntɔndipá é tṵṵ̀na o wɛmá. Ká̰ńyɛ̰̀ǹfa pìpìdì, kà pá yídá é taá Weèdi hɔ̰́ɔ̰̀ta mɛhɛká é tɛ̀i cetá è biɔhànì.

Ye wɔ̀ni, kà dɔ̀hàdi kpɛ̰́ǹn, nà mɛ̀m̀pà d'oò péé-nà-pa wɛǹni è yòǹ Sùwífùpa yɔtí kpɛ̰́m̀ma, é tíká sídàma nahàku nìpa wɛǹni. Kà pá tɔn è yɔ̀ pá tóó-ní ye tɔntɔndipá kódedí mɛhɛká. ²² Àmá, kà kódeceépa é tɛ̀i pà pú pà dɛ́hà kódedí mɛhɛká. Kà pá tón ye sídàma nahàku nìpa pesá, é tɛ̀i é pà caka è yɔ̀: ²³ Ti tɛ̀i è hɔ̰́tà kódedí kpeé-ma sá̰sá̰, kà ni ceépa nɛɛ̀hi ni há̰ńnùka è ceí. Àmá kà tí kpetá ni cɔ̀ka é dúú, ti pú dɛ́hà òcɔ̰́ǹ ni mɛhɛká. ²⁴ Weèdi hɔ̰́ɔ̰̀ta ceépa kpɛ̰́ǹn, nà dɔ̀hàka yam̀ma kpɛ̰́m̀ma yeèkaà-ma mɛma, k'yé pà dii sàma, kà pà békú pa tɔɔ̀pa mìì kó tɛ̀ni-sá-ní ye tɔntɔndipá. ²⁵ Mɛmá-dà, k'òòcɔ̰́ǹ é tɛ̀ni é pà caka è yɔ̀: Ye nìpa nɛ yɛ̰̀ḭ-pá kódedí péé-ní Weèdi hɔ̰́ɔ̰̀ta mùǹku mɛhɛká è biɔhànì nìku.

²⁶ Kà kódeceípa kpɛ̰́ǹn é ka̰há n'ɔ̀ɔ sósìpa, kà pá taá é cɛ̰ɛ̰́-ní ye tɔntɔndipá. Àmá pà de pú pà pa̰à̰ nà kpeèti, mìì tee-sá pà de wani nìku kó pà ká̰mu-má-dà tá̰à̰ka. ²⁷ Pà pà cɛ̰ɛ̰́-ma é pà tɛ̰́ná-ní, é pà tanà sídàma nahàku nìpa yìhìka, kà dɔ̀hàdi kpɛ̰́ǹn é pà béka è yɔ̀: ²⁸ Ti nɛ cakáà-á-dà tenten, è yɔ̀ nɛ koò dá biɔhàna nìpa n'ɛ̀ɛ dɔɔò yèdi. Ǹtɛ há̰kà kà nɛ sṵ́nà Sèdìsàdɛ́m̀ wɛǹni nà nɛ biɔhànamá. Nɛ kpɛ̀i é n'yɔ̀ tḭ́ńti-dà tee ye dɔɔò kṵ́mú-ì? ²⁹ Kà Píyɛ́ɛ̀ n'ɔ̀ɔ tɔntɔndipá tɔɔ̀pa é tɛ̰́ná è yɔ̀: Yè békú tí tṵṵ̀na Weèdi hḭ́mpú-dà é hédá nìpa hḭ́mpú. ³⁰ Ti yààpa Weèdi yá̰hìnà-á-ma Sèsíì nɛ kpɛ̰́ḭ́-ko kpíidɔkú hḭ́ǹka, óò kɔ̀ù. ³¹ Mɛnń-dà nì mɛ̀ɛ dìkànà-ma hḭ́ǹka é taá ò kàna ni heùma, k'ò yòǹ wódo, è yòǹ fḭ́hìnɔ. N'ɔ̀ɔ̀ hḭn mɛma, è kpɛ̀i Ìsìdàyɛ́dì nìku-dà é cehèna pa̰á̰ma, kà ní pà dèda pa sḭ̀ḭ̀ma. ³² Tḭ́ńti dɛ́hà-á-ma ye kú pa̰á̰mà nà ti nɔ̀ǹci, é pɛ́ɛ́-nà Weèdi Sèdi nì kɔ̰́ɔ̰̀-di-ní mɛ̀m̀pà nì bekù-pa kpɛ́mú.

³³ Ye sídàma nahàku nìpa yeèkaà-ma mɛma, kà fɔ̰́di é pà cɛ̰ɛ̰́, kà pà kpɛ̀i é pà kɔ̀ù. ³⁴ Àmá pa mɛhɛká, kà Fàdísì òcɔ̰́ǹ yè péé kà p'òò toò Kàmàdìyɛ́dì, k'ò yòǹ kpɛ̰́ńtìnùka biɔhànakó, kà nìku wɛǹni ò kɛ̀hi. K'ó yídá é nɛɛ̀hi pa cɔhɔ̀ka, é kɔ̰́ɔ̰́ nùdi è yɔ̀ pá cedí deèna ye tɔntɔndipá wɔ̀ni cɛ̰́ma. ³⁵ Ye kú dàhàka, k'ó pà caka è yɔ̀: Ìsìdàyɛ́dì nìpa-nà, pa̰á̰-nà yɔkàma nɛ kpɛ̀i é pa̰á̰-sà ye nìpà hḭ́ǹka. ³⁶ Yè pú yókáà nà ti dɛ́hà-ma dɔɔ̀o pà toò-ko Tèdásì. Ò de tóńkú o cɔ̰́ɔ̰̀di niìsào-dà, kà nìpa kɔ̀ɔnà nàhì kpɛ́ɛmá óò tṵ̀na. Àmá kà p'óò kɔ̀ù, kà mɛ̀m̀pà de ò tṵ̀n-pá é wiìda pa bɛ́kà bɛ́kà, bá ti koò pú you pa nampàta. ³⁷ O kú dàhàka, kàǹkàmu wɔ̀ni, kà Sùdásì Kàdìdéè yɔtí kóoó mɛ̀ɛ té fodá-ní. Ò mɛ̀ɛ té de yɔ̰́ń-ma nìku dɔ́ɔ́di kà k'òò pùdi. Kà pà mɛ̀ɛ t'óò kɔ̀ù, mɛ̀m̀pà de ò pùdi-pá wɛǹni, kà pá wiìda pa bɛ́kà bɛ́kà. ³⁸ Sá̰mà-ní, n nɛ cakú-ma: Nɛ koò dá n'wisí ye nìpà-ní, pà héé-nà kà pá ka̰há. Kà pà bɔ̀hɔ̀ta-sá, nà pa tɔmú péé-nà-ní nìpa pesá-dà, yè kó ka̰há-dà. ³⁹ Àmá, k'yè yɛ̀ni nà Weèdi pesá-dà, nɛ pú kó nɛɛ́ pà nɛ̀hìna. Nɛ́ pa̰á̰ yɔkàma kà nɛ dá yetá dúú tɔ̀di nà Weèdi! K'yèe sídàma nahàku nìpa é teha o wɛmá. ⁴⁰ Kà pá tṵ́má yíí-ní ye tɔntɔndipá, é hédá kà pá pà podí, é yɔ̀ɔ é pà caka è yɔ̀ pà koò dá wɛdá nà Sèsíì yèdi. Ye kú dàhàka, kà pá pà wɛ́í. ⁴¹ K'yèe tɔntɔndipá é yídá ye sídàma nahàku nìpa pesá, k'yè pà naa dɛ́dɛ́í nà Weèdi de hɔ̰́tà-ma pà kó nɛɛ́ dii náńkú nà Sèsíì yèdi kpɛ́mú. ⁴² Daàka wɛǹni, Weèdi hɔ̰́ɔ̰̀ta mɛhɛká nà hɔ̰́ɔ̰́hí mɛhɛká, kà pá n'sɔ̰ncí è biɔhànì, è cakú Sèsíì wɛnaamá è yɔ̀ mɛnń-dà yòǹ Weèdi ta̰kadáko.