Tɔná 6

Pà bàtà nìi pàyehì kà pà kó tempa-nà Sèsíì tɔntɔndipá

¹ Ye daàka mɛhɛká, weèdɔɔ̀pa dɔ́ɔ́di-dà de tɔhɛ̀nì è káá. Kà Sùwífùpa mɛ̀m̀pà de taà-pa pa dandaní Sèsíì hḭ́ǹka è wɛì Kɛ̀dɛ́kìdi, é kɛ̰̀ḭ-nà pa Sùwífù tɔɔ̀pa mɛ̀m̀pà de wɛì-pa Hèbùdéèdi. Pà de kɛ̰̀ḭ è yɔ̀ daàka wɛǹni, pà pú hɔ̰́ diìda sukú pa kú kpíipoòti dimá totá wɔ̀ni. ² Mɛmá-dà, k'yèe tɔntɔndipá píì-pàdɛ́ɛ́ é pehèna Sèsíì kpɛ́ɛpá wɛǹni é pà caka è yɔ̀: Yè pú sudi tí hédá Weèdi wɛmá cakàpu, é n'wɛ̰̀si dimá totáma. ³ Ye kú kpɛ́mú, n kúcàpa nà n potɔ̰ɔ̰̀pa-nà, baàta-nà nɛ mɛhɛkà nìi pàyehì, mɛ̀m̀pà kú fòùmu suu-pá, kà Weèdi Sèdi nà yaǹfòùma pà sṵ́nà, kà tí pà kɔ̰́ɔ̰́ ye kú tɔmù-ní. ⁴ Mɛma, ti kó nɛɛ́ sɔ̰kadá-ma é kɔ̰́ɔ̰́ ti cɔ̰́ɔ̰̀di weèdɔɔ̀pu mɛhɛká, nà Weèdi wɛmá cakàma mɛhɛká.

⁵ K'yèe mɛ̀m̀pà de tísí-pa wɛǹni é teha ye wɛmá. Mɛmá-dà kà pá ta̰kadá Ètíyɛ́nì, nìi k'ò káá dandaní dɛ́dɛ́í, kà Weèdi Sèdi ò sṵ́nà. Kà pá yíí ta̰kadá Fìdípù, nà Pòdòkɔ́ɔ̀, nà Nìkànɔ́ɔ̀, nà Tìmɔ́ɔ̀, nà Pàdìmɛ̀násì, nà Nìkòdáà k'ò yòǹ À̰ǹtíyɔ́sì yɔtí kóoó, è há̰ de é kɔ̰́ɔ̰́ o cɔ̰́ɔ̰̀di Sùwífùpa weèdɔɔ̀pu. ⁶ Kà pá pà tɛɛ̀ní Sèsíì tɔntɔndipá yìhìka, kà pá cɔ̰ná pa nɔ̀hi pa hḭ́ǹka é dɔɔ Weèdi pa kpɛ́mú.

⁷ Kà Weèdi wɛmá é dɔ̀hà pidá. Kà Sèsíì dapàm̀ma dɔ́ɔ́di é dɔ̀hà è tɔ̀hìnì Sèdìsàdɛ́m̀ mɛhɛká. Kà dɔ̀hàka yam̀ma dɔ́ɔ́di tanì pa dandaní Sèsíì hḭ́ǹka.

Ètíyɛ́nì cɛ̰ɛ̰́ma

⁸ Weèdi de bɛkáà Ètíɛ́nì ni pa̰á̰suumá-dà óò sṵ́ná ni kpeèti, k'ò pa̰kú pɔ́ńtápa̰á̰ma, nà pɔ́ńtáyḭḭ́pa nìku cɔhɔ̀ka. ⁹ Kà nìi pàcɔ̰́pà óò yee-nà dɛ́dɛ́í. Pàcɔ̰́ de yòǹ Sùwífùpa Weèdi wɛmá biɔhà-nàmɔ̀ni pà toò-di "Mɛ̀m̀pà yɛ̀ɛ̀-pa núǹti weèdɔɔ̀-nàmɔ̀ni" kpɛ́ɛpá-dà, è yɛ̀ni nà Sìdɛ́nì nà Àdɛ̀kìsá̰ńtì tempáàti. Kà tɔɔ̀pa yòǹ Sìdìsíì nà Àsíì teǹka kpɛ́ɛpá. Mɛmpá-dà de yídà nɔ̀nɔ̀hicí nà Ètíɛ́nì. ¹⁰ Àmá, kà pá hɛ̰ka pà k'óò hɛ́í-ma wɛmá, mìì tee-sá Weèdi Sèdi-dà d'oò kɔ̰́nì yaǹfòùma k'ò wɛì. ¹¹ Mɛmá-dà kà pá bodá nìpa dící è yɔ̀ pá n'yɔ̀ pà yèkaà kà Ètíyɛ́nì tèù Mɔ̀yísì nà Weèdi. ¹² Ma kú bookú-dà pà de fucí-ma nìku, nà yɔtí kpɛ̰́m̀ma, nà Weèdi kpɛ̰́ńtìnùka biɔhànapá, kà pá kúkádá Ètíyɛ́nì, óò cɛ̰dí óò tanà pa sídàsàpu hɔ̰́ɔ̰̀ta. ¹³ Kà pá tɛɛ̀ní nuǹhetí yam̀ma, kà pá tɛ̀ni è yɔ̀: Ye dɔɔɔ̀ mɛnǹ baà hɔ̰́ n'tṵ́ń è wɛì Weèdi hɔ̰́ɔ̰wentá nà Mɔ̀yísì kpɛ̰́ńtìnùka kpákpààma-dà! ¹⁴ Ti yeèkaà-á-ma k'ò wɛì è yɔ̀ Sèsíì Nàsàdɛ́tì kóoó, kó pɔ́dá-ma Weèdi hɔ̰́ɔ̰́tà mɛntà, é cehèna ti bokupa̰á̰ma Mɔ̀yísì ti kɔ̰́ɔ̰̀-ma.

¹⁵ Mɛ̀m̀pà kú wɛnnì de kaàdi-pá ye sídà-nahàku mɛhɛká, kà pa nɔ̀ǹci fá̰-fá̰dí Ètíyɛ́nì, kà pá dɛ́há é n'hɔ̰́tà o yìhìka yònà Weèdi tɔntɔndikó kpɛ́ɛká.