Tɔná 7

Wɛmá Ètíyɛ́nì de wɛɛ̀-ma.

¹ Kà dɔ̀hàdi kpɛ̰́ǹn é béka Ètíɛ́nì è yɔ̀: Pà wɛì-sà a hḭ́ńkà yòǹ bemú-dà? ² K'ó tɛ̰́ná è yɔ̀: N báàpa nà n kúcàpa-nà, besí-nà é yekà n kpɛ̀i é n'yɔ̀pu. Weèdi mɛ̀nì wɛhi-dí de bɛkáà-á-ma ni cɔ̰́ɔ̰̀di ti yàdo Àbààhám̀ k'ò káà péé Mɛ̀sòpòtàmíì teǹka, k'ó nɛɛ́ taá kaàdi Hàdánì teǹka. ³ Ye bɛkàma mɛhɛká, kà n'ɔ́ɔ̀ caka è yɔ̀: Yídá a teǹka, n'àa hɔ̰́ɔ̰́tà kpɛ́ɛpá, é taá teǹka n k'áa bɛka-ká kú mɛhɛká. ⁴ Mɛmá-dà, kà Àbààhám̀ é yídá teǹka pà toò-ka Kààdéè, é taá é kaàdi Hàdánì kpɛ́ɛká. Ye kú dàhàka, k'òo báàa é kpíí, kà Weèdi óò yíkàna-ní Hàdánì teǹka, k'ó tɛ̀ni é kaàdi nɛ péé-kà kú mɛhɛkà wɔ̀nì mɛnì. ⁵ Weèdi há̰ de p'óò pɛ̰ḭ yècḭ́ḭ̀ ka mɛhɛká, bá tempɛ̀tàda kà tà sá̰à̰-nà tàdi pɛɛ̀kamú. Àmá nì d'oò hḭ́nà nùdi-dà è yɔ̀: N kó wáńtá áa pa̰a̰-á̰-ma ye tenkà, a kú dàhàka, k'àa yaàbíiká é kà teeka. Nì d'oò cakú mɛma, ye kú wɔ̀ni-hɔ̰ kà Àbààhám̀ mun pú káá bída. ⁶ Kà Weèdi óò caka è yɔ̀: A yaàbíiká kó wáńtá wèe-é-ma tɔteǹka, é hḭn núm̀ma ka mɛhɛká, kà pá kà diá náńkú háá beeká kɔ̀ɔnà nàhì. ⁷ Àmá n kó wáńtá sída-á-ma nìku mɛ̀ǹkù kó kà núná-ku. Ye dàhàka, kà ká yɛɛ̀ni ye teǹka é tɛ̀ni é n duntà bɛ̀m̀bɛ̀nì mɛnì. ⁸ Ye kú dàhàka, kà Weèdi é pa̰á̰ múnáma nà Àbààhám̀. Ye múnáma yḭdó-dà de héé ca̰ntáma. Mɛmá-dà, kà Àbààhám̀ de é pɛdá o bíidatá Ìsáákì é tà ca̰ntá ta daniìdí. Kà Ìsáákì mɛ̀ɛ té ca̰ntá o kú bíidatá Sàkɔ́pù, kà Sàkɔ́pù mɛ̀ɛ té ca̰mu o kú bíidahí, ti yààpa píì-pàdɛ́ɛ́.

⁹ Kà sɛ̰sɛ̰kú é yee-nà ye Sàkɔ́pù bíidahí, hi kúcàa Sòsɛ́fù hḭ́ǹka, háá kà hí ò yɛda k'ó hḭn núǹn Èsípútì mɛhɛká. Àmá kà Weèdi de óò m'péé-nà. ¹⁰ Nì d'oò fḭ́hínì-í-ma o fḭ́ncí wɛǹni mɛhɛká, óò pa̰a̰ yaǹfòùma, é héé k'ó dɛ́tá yudí Èsípútì wódo Fàdàɔ̰́ɔ̰̀ yìhìka. K'óò tódá k'ò yòǹ yìkàǹyìdo Èsípútì teǹka hḭ́ǹka, n'ɔ̀ɔ wóo-hɔ̰́ɔ̰̀ta kpɛ́ɛsá wɛǹni hḭ́ǹka. ¹¹ Kà kòni é dúú-ní Èsípútì teǹka wɛǹni mɛhɛká, nà Kànàáà kpɛ́ɛká wɛǹni mɛhɛká. Kà nìpa yon náńkú dɛ́dɛ́í, kà ti yààpa de é mɔ́ńka pà kó dii-sá. ¹² Kà Sàkɔ́pù é yekà è yɔ̀ pɛ̰́ɛ̰̀ yɔ̀ka péé Èsípútì teǹka, k'ó tɔn ti yààpa cecemá. ¹³ Pa dɛ́ɛ̀ma wɔ̀ni, kà Sòsɛ́fù é bahìna o cɔ̰́ɔ̰̀di o kúcàpa. Mɛmá-dà, kà Èsípútì wódo é bantá-nà Sòsɛ́fù hɔ̰́ɔ̰́tà-kpɛ́ɛpá héé-pa. ¹⁴ Ye wɔ̀ni, kà Sòsɛ́fù é tɔn kà pá tóó-ní o báàa Sàkɔ́pù, n'ɔ̀ɔ hɔ̰́ɔ̰́tà-kpɛ́ɛpá wɛǹni, pa wɛǹni kà pà yòǹ nìpa púyehì nà pànùm̀. ¹⁵ Ma kú bookú-dà Sàkɔ́pù de cútà-ma Èsípútì teǹka mɛhɛká, é tɛ̀i é kà m'péé, háá é kpíí é pɛ́ɛ́-nà ti yààpa. ¹⁶ Kà pá pà toha é pà kònà Sìsɛ́m̀ yɔtí, é tɛ̀i pà dáná tá̰a̰beèdi fɔ̰̀ɔ̰kú mɛhɛká, Àbààhám̀ de dontà-ku nà dící Hàmɔ́ɔ̀ bííhí pesá Sìsɛ́m̀ mɛhɛká.

¹⁷ Wɔ̀ni de hɛ́ɛ́kú-ma-ní, kà Weèdi kó pa̰á̰ nì de hḭ́nà nùdi è yɔ̀ nì kó pa̰á̰-sa Àbààhám̀, kà ti nìku é dɔ̀hà é wɛ́dá é sṵ́ná-hɔ̰ Èsípútì teǹka. ¹⁸ Mɛmá-dà, kà wódo pàǹn é dìsi wóòti Èsípútì teǹka, è de pú yá̰á̰ Sòsɛ́fù wɛmá. ¹⁹ K'yèe wódo é soó-nà ti nìku, é diá náńkú ti yààpa, háá é pà pa̰á̰-nà nɔɔ̀ti è yɔ̀ pá n'wán pa bíipàǹhi kà hì kɔ̰́n. ²⁰ Ye kú wɔ̀ni-dà pà de pɛɛ̀-ma Mɔ̀yísì, k'ò yòǹ bíisuutá, kà Weèdi ò dɔ́sí. Kà p'óò yɛ̰̀ṵ̀dà cḭ̀ma màta̰a̰ o báàa hɔ̰́ɔ̰̀ta mɛhɛká. ²¹ P'òò wɛ́i-dí daadí, kà Èsípútì wódo sepàǹn óò dɛ́tá, óò tódá óò kpáhìna o bíipɛdáta. ²² Mɛmá-dà kà pá biɔhàna Mɔ̀yísì Èsípútì yá̰á̰ma wɛǹni, k'ó hḭn niìsào o wɛmá n'ɔ̀ɔ pa̰á̰ma mɛhɛká.

²³ Ò káá tḭ́ń bení beeká púnàhì, k'ó ta̰kadá è yɔ̀ ò kó taá é dentá-ní o kúcàpa Ìsìdàyɛ́dìpa. ²⁴ K'ó tɛ̀i é dɛ́há Èsípútì yaǹn, k'ò dinì p'oòcɔ̰́ náńkú. K'ó yeda o kpɛ́mú è kó bodá o bàǹti, é kɔ̀ù ye Èsípútì yaǹn. ²⁵ Ò de maàhu è tonà, o kúcàpa kó bantá-ma è yɔ̀ Weèdi kó yɛ̀ɛ̀-nà mɛnń-dà, é pà fḭ́hìna, àmá pà pú bantà. ²⁶ K'yé wentá, k'ó peèta-nà Ìsìdàyɛ́dìpa pàdɛ́ɛ́, kà pà kɔ̰̀ǹti, k'ó n'kpɛ̀i é pà pàta é pà caka è yɔ̀: N dóòpa-nà, nɛ yòǹ kúcàpa-dà-ma, badà tee kà nɛ kɔ̰ǹti? ²⁷ Àmá, kà mɛ̀ǹǹ de diinì-ko o tɔɔ̀ɔ náńkú é haàta-ní Mɔ̀yísì è yɔ̀: Wod'àà hḭ́nà è yɔ̀ á n'yòǹ ti yìkàǹyìdo nà ti sídàko? ²⁸ Ìyé! A kpɛ̀i è mɛ̀ɛ té n kɔ̀ù a wontà kɔ̀ùkaàma-dà Èsípútì yaǹn-a̰? ²⁹ Mɔ̀yísì yèkaà-ma mɛma, k'ó cocí é taá é sɔ̀di Màdìyá̰à̰ teǹka mɛhɛká. Ye pesá, k'ó pɛdá bíidahí hìdɛ́ɛ́.

³⁰ Kà beeká púnàhì é ka̰há, kà Weèdi tɔntɔndikó óò fodá Sìnàyíì ta̰à̰di càwenkú mɛhɛká, túku cɔhɔ̀ka kà kù cɔ́hú ha̰mú. ³¹ Mɔ̀yísì dɛ́hà-ma miya̰, k'yé ò dii, k'ó hɛ́tá-ho è kó sódí. Ye wɔ̀ni, k'ó yekà Bateó boòku kà kù tonà: ³² N yòǹ a yààpa Weèdi-dà, Àbààhám̀, nà Ìsáákì, nà Sàkɔ́pù Weèdi. Kà wantafɔ̰̀di óò cɛ̰ɛ̰́, k'ò cèùdi, ò koò pú nɛɛ̀ é pádá kṵnnɔ̀fa é sódí. ³³ Kà Bateó óò caka è yɔ̀: Fḭ́dá a nɛ̀ùti, mìì tee-sá bɛ̀m̀bɛ̀nì a péé-dì kú hḭ́ńkà yòǹ n kpɛ́ɛdí-dà. ³⁴ N dɛ́hà-á-ma náńkú n nìku yon-kú Èsípútì teǹka mɛhɛká, é yekà nà ku kṵ́hàka. N cútà-ní è kó kù fḭ́hìna-á-ma. Tɔɔ̀ta sá̰mà, m'a tɔnti Èsípútì teǹka mɛhɛká-dà.

³⁵ Ye Mɔ̀yísì pà de yeéè-ko-ní óò caka è yɔ̀: Wod'àà hḭ́nà è yɔ̀ á n'yòǹ ti yìkàǹyìdo nà ti sídàko, ye mɛnń-dà Weèdi de tṵ́mà tɔn-má Èsípútì teǹka, è yɔ̀ ó n'yòǹ pa yìkàǹyìdo nà pa fḭ́hìnɔ, nà ni tɔntɔndikó mɛ̀ǹǹ d'oò foò-ko túku mɛhɛká tempàma. ³⁶ Mɔ̀yísì-dà dènà-ní Ìsìdàyɛ́dìpa Èsípútì teǹka mɛhɛká. Ò de pa̰à̰ pɔ́ńtápa̰á̰ma nà pɔ́ńtáyḭḭ́pá dɔ́ɔ́di-dà ye teǹka mɛhɛká, nà pà de deèku tḭ́ń wɔ̀ni kpà̰à̰ti dàmɛ́dì, nà càwenkú mɛhɛká háá beeká púnàhì. ³⁷ Mɛnń-dà mɛ̀ɛ de tṵ́mà cakáà Ìsìdàyɛ́dìpa è yɔ̀: Weèdi kó nɛ kɔ̰́ɔ̰́-ma-ní ni wɛtɛ̰́náko k'ó n'yònà mmí, é n'yòǹ nɛ bookú kóoó. ³⁸ Ìsìdàyɛ́dì nìku de péé tḭ́ń wɔ̀ni càwenkú mɛhɛká, kà mɛnń-dà tà̰ni wɛmá Weèdi tɔntɔndikó de ò cakú-ma Sìnàyíì ta̰à̰di hḭ́ǹka, è mà tɛ̰́nì ti yààpa. Weèdi de ò kɔ̰́káàma kú bookú-dà wɛmá mɛ̀mà kɔ̰́nì-ma fòùmu, k'ó mà ti kɔ̰́ɔ̰́.

³⁹ Àmá, ti yààpa de pú teháà óò yèkà nà toodí. Pà d'oò yeéè-é-ma è múńtà pɛnti pà kó hḭmpú é tón Èsípútì teǹka mɛhɛká. ⁴⁰ Kà pá caka Ànɔ́ɔ̀ è yɔ̀: Ti pa̰á̰ wàci mɛ̀ǹcì kó ti túdí-ci, mìì tee-sá ye Mɔ̀yísì mɛ̀ǹǹ ti denà-ko-ní Èsípútì teǹka, ti pú yá̰á̰ mìì ò tɛ̀ni-sá-ní. ⁴¹ Mɛmá-dà, kà pá máí naàbíidí é nì kpáhìna pa wàfa, é pa̰á̰ dɔ̀hàdi ni kpɛ́mú, é ya̰nkà kúúdi nà yaǹnaakú nà pà de pa̰à̰-sa nà pa nɔ̀hi kpɛ́mú. ⁴² Kà Weèdi mɛ̀ɛ é pà bútá, é pà héé kà pà dɔnti cḭ̀ma nà hà̰hi, é n'yònà pà de wa̰tà Weèdi wɛtɛ̰́nápa pɔ̀kàhi mɛhɛká è yɔ̀pu. Pà de wa̰tà è yɔ̀:

Ìsìdàyɛ́dì nìku-nà,

nɔtí dɔ̀hɔ̀ka nà dɔ̀hɔ̀ka tɔɔ̀ka

nɛ pa̰à̰-ka càwenkú mɛhɛká

háá beeká púnàhì,

mmí-dà nɛ de kà pa̰à̰-ma?

⁴³ Óò! Nɛ de toó wàfa

pà toò-fa Mɔ̀dɔ́kì fḭ́ḭkú-dà,

nà tɔɔ̀fa pà toò-fa Hèdèfá̰à̰ kú hà̰tàda.

Yè yòǹ niìi-dà nɛ pa̰à̰-sa èè dɔń.

Mií-ì tee, n kó héé-ma

kà pá nɛ ka̰hàna núǹti,

k'yèe pesá é n'nátà-nà Bàbìdɔ́nì teǹka.

⁴⁴ Càwenkú mɛhɛká, ti yààpa de káá fḭ́ikú-dà nà Weèdi pà pèèku-sa. Mɔ̀yísì de kù pa̰à̰ Weèdi de hḭ́n ó kù pa̰kamá-dà. Ò de kù dɛ́hà kà kù yòm̀pu, ò de kù pa̰à̰-ma kú bookú-dà. ⁴⁵ Kà ti yààpa yaàbíiká é kù sɔ̰kadá-nà, é kù toó teǹka pà de fedà-ka mɛhɛká kà Sòsùwéè pà nihí. Ye teǹka mɛhɛká, boocí tɔcí-dà de yè péé, kà Weèdi é cì bɔ̀hà pa yìhìka. Kà kù baà é m'péé ye pesá háá Dàfítì wɔ̀ni. ⁴⁶ Kà Dàfítì é dɛ́tá yudí Weèdi pesá, é nì cɔ̀hà è yɔ̀ n'ɔ́ɔ̀ pa̰a̰ nùdi k'ó nì maá hɔ̰́ɔ̰̀ta, mɛní mɛ̀nì yòǹ-di Sàkɔ́pù Weèdi. ⁴⁷ Àmá, o bíitá Sàdòmɔ́ɔ̀-dà nì madí ye hɔ̰́ɔ̰̀ta. ⁴⁸ Há̰kà, Sàwèǹku pú fòù hɔ̰́ɔ̰́hí nìpa maá-hi kú mɛhɛká, é n'yònà ni wɛtɛ̰́náko de wɛɛ̀-ma è yɔ̀:

⁴⁹ Bateó yɔ̀: Hḭ́ǹka-dà yòǹ n wóokààta,

kà teǹka yòǹ n taànàadí.

Hɔ̰́ɔ̰̀ta m̀mɔ́ńta kú bodú-dà

nɛ kó nɛɛ́ é n maá-ma?

Bɛ̀m̀bɛ̀ni m̀mɔ́ni-dà n kó nɛɛ́ kaàdi-má?

⁵⁰ Ntoò mmí-d'èè pa̰à̰-ma ye wɛnnì?

⁵¹ Kà Ètíyɛ́nì é sɔ̰kadá wɛmá è yɔ̀: Nɛ yòǹ nìpa mɛ̀m̀pà kú toòka kpenì-pa-dà. Nɛ kpenà nɛ yàma nà nɛ toòka-dà è pú kpɛ̀i é besí Weèdi. Nɛ baà sɔ̰ncí-ma è yení Weèdi Sèdi hḭ́mpú è yònà nɛ yààpa. ⁵² Weèdi wɛtɛ̰́náko wodà pà de pú dià-ma náńkú? Pà múńtà de kɔù-ú-dà mɛ̀m̀pà de cakáà-pa niìcoóko tɛ̀mmá-ní. Wɔ̀nì mɛnì, kà nɛ́na mɛ̀ɛ óò yɛda óò kɔ̀ù! ⁵³ Nɛná-dà Weèdi tɔntɔndipá kɔ̰́ɔ̰̀-ma ni kpɛ̰́ńtìnùka, àmá nɛ pú kà tṵ̀nà.

Ètíyɛ́nì kɔ̀ùma.

⁵⁴ Ye sídà-nahàku nìpa yekaà-ma mɛma, kà pá kédí pa nìka dɛ́dɛ́í, kà fɔ̰́dí pà káá Ètíyɛ́nì hḭ́ǹka. ⁵⁵ Àmá mɛnn, kà Weèdi Sèdi ò sṵ́nà, k'ó wáńtá hḭ́ńkà bɛ́ka, é dɛ́há Weèdi wɛhimú nà Sèsíì k'ò nɛ̀hi Weèdi nɔ̀kàǹheùma. ⁵⁶ K'ò yɔ̀: Ǹtɛ, n dìi kà hḭ́ǹka-dà kpetà, kà Niìfòùo bíitá nɛɛ̀hi Weèdi nɔ̀kàǹheùma.

⁵⁷ Pà yèkaà-ma mɛma, é tóó kúucí dɛ́dɛ́í, é hḭḭ̀na pa toòka, é pɛ́ɛ́ dɔtìna pa wɛǹni o hḭ́ǹka. ⁵⁸ Kà p'óò yɔ̰́ɔ̰́pa óò dèna yɔtí bɛ́ɛ́kú, é tɛ̀i bátá pa báatí é tì cɛ̰̀a̰ dapàǹn òcɔ̰́ǹ kà p'òò tonà Sɔ́dì, ye wɔ̀ni óò ká̰mu tá̰à̰ka óò kɔ̀ù. ⁵⁹ Pà de ò ká̰mù-ma ye tá̰à̰ka, k'ò pa̰kú weèdɔɔ̀pu-dà è tonà: Sèsíì n Teù, ta̰ǹta n sèdi. ⁶⁰ É yídá, k'ó dɔdi-ho o dúùka hḭ́ǹka é dedí kpeéma è yɔ̀: N Teù, a dá pà kàn ye kú sḭ̀ḭ̀mà. Ò wɛɛ̀-ma mɛma é yɔ̀ɔ, é tɔ̰ɔ̰̀ta.