Tɔná 8

¹ Sɔ́dì de teháà-á-ma Ètíyɛ́nì kɔ̀ùma.

Sɔ́dì fá̰kápú weèdɔɔ̀pa

É cɛ̰ɛ̰́-nà ye kú daadí-dà, pà cetà-ma è fá̰kápú dɛ́dɛ́í Weèdɔɔ̀pa mɛ̀m̀pà de péé-pa Sèdìsàdɛ́m̀ yɔtí mɛhɛká. Kà weèdɔɔ̀pa wɛǹni, é m'bààsí Sèsíì tɔntɔndipá, é wiìda é ya-yahí Sùdéè tempáàku nà Sàmàdíì kpɛ́kú mɛhɛká. ² Kà nìpa mɛ̀m̀pà de wani-pá Weèdi é tódá Ètíyɛ́nì wɔ̰̀ǹku é taá kù dáná, é kɔń o kṵ́mú sàma.

³ Sɔ́dì mɛnn de wɛ̰́ɛ̰̀, è kpɛ̀i é fíɔ́wá weèdɔɔ̀pa-dà. Ò de dúù hɔ̰́ɔ̰́hí mɛhɛká-dà, è cɛ̰hú poòpa nà daapá, è pà yɛ̰̀ṵ̀ kóodeèka mɛhɛká.

Fìdípù cakú Weèdi wɛnaamá Sàmàdíì tempáàku mɛhɛká.

⁴ Weèdɔɔ̀pa mɛ̀m̀pà de wiì-pa páàti wɛǹni, de centì-í-ma ye teǹka wɛǹni mɛhɛká è cakú Weèdi wɛnaamá. ⁵ Kà Fìdípù é taá Sàmàdíì tempáàku yɔsàti mɛhɛká, é tɛ̀i è cakú ti yam̀ma Weèdi ta̰kadáko wɛnaamá. ⁶ Kà nìpa dɔ́ɔ́di é yɛɛ̀ni nùdi nìcɔ̰́ é besí o wɛmá, é dɛ́há-nà pɔ́ńtápa̰á̰ma ò de pa̰kú-ma, kà pá fedá toòka sukú ò de wɛì-sa hḭ́ǹka. ⁷ Ò de bɔɔ̀hu Wɛɛ̀kupá-dà nìpa mɛhɛká, kà pà yɛ̀hu nà hoodí sàdi, kà hɔ̀ùhi nà mɛ̀m̀pà cèǹtì-pa tàdi, kpekú. ⁸ Mɛmá-dà yaǹnasàku de sṵ́nà-ma ye yɔtí mɛhɛká.

⁹ Yè há̰ de hɔ̰́tà dɔɔ̀o òcɔ̰́ǹ-dà de yɔ̀ɔ péépu ye yɔtí mɛhɛká, kà p'òò toò Sḭ̀mɔ́ɔ̀. Ò de hɔ̰́ m'pa̰kú dópòdópò pa̰á̰ma-dà, kà mà yon Sàmàdíì yam̀ma. Ò de tóńkú o cɔ̰́ɔ̰̀di è yɔ̀ ò yòǹ yècɛ̰́ɛ̰̀-dà. ¹⁰ Kà nìpa wɛǹni, bííhí háá nà kpɛ̰́m̀ma ò kɛ̀hi dɛ́dɛ́í, è wɛì o hḭ́ǹka è toò: Dɔɔ̀ mɛ̀ǹǹ yòǹ Weèdi kpeèti-dà, kpeèti pà toò-ti: Kpeèsàti.

¹¹ Mɛmá-dà, kà pà de dɔ́sí o wɛmá dɛ́dɛ́í, mìì tee-sá ò de pa̰kàta o dópòdópò pa̰á̰ma k'yè dɛu sàma, k'yè yon nìpa. ¹² Àmá, pà há̰ de yeèkaà-ma wɛnaamá Fìdípù de pà cakáà-ma, kà mà wɛì Weèdi wóòti hḭ́ǹka nà Sèsí-Kídísì hḭ́ǹka, ye wɔ̀ni daapá nà poòpa kà pá taàa pa dandaní ma hḭ́ǹka, é héé kà pá pà cóńtá. ¹³ Kà Sḭ̀mɔ́ɔ̀ mɔ́nń mɛ̀ɛ té taàa dandaní ma hḭ́ǹka, é héé kà p'óò cóńtá. É tóó n'ɛ̀ɛ kú daadí, ò koò pú yídà Fìdípù fɔ̰̀di. Yè de ò yon-ń-ma dɛ́dɛ́í, n'ɔ̀ɔ̀ de dìi-má kà pɔ́ńtápa̰á̰ma nà pɔ́ńtáyḭḭ́pa sàpa pa̰kú.

¹⁴ Sèsíì tɔntɔdipá mɛ̀m̀pà de péé-pa Sèdìsàdɛ́m̀ yɔtí yèkaà-ma è yɔ̀ Sàmàdíì yam̀ma de ta̰ntà Weèdi wɛnaamá, kà pá pà tɔn-hɔ̰ Píyɛ́ɛ̀ nà Ìsá̰à̰. ¹⁵ Pà ta̰ntà-ma Sàmàdíì, é tɛ̀i é pa̰á̰ weèdɔɔ̀pu pa kpɛ́mú, k'yé teha kà pá dɛ́tá Weèdi Sèdi, ¹⁶ è yá̰á̰ nì de mum pú cútà-ní p'oòcɔ̰́ǹ kú hḭ́ǹka. Pà de pà cóńtà sá̰à̰di nà Teó Sèsí yèdi-dà. ¹⁷ Mɛmá-dà, kà Píyɛ́ɛ̀ nà Ìsá̰à̰ é cɔ̰ná pa nɔ̀hi pa hḭ́ǹka, é pa̰á̰ weèdɔɔ̀pu, kà pá dɛ́tá Weèdi Sèdi. ¹⁸ Sḭ̀mɔ́ɔ̀ hɔ̰́tà-ma Sèsíì tɔntɔdipá cɔ̰nà pa nɔ̀hi weèdɔɔ̀pa hḭ́ǹka kà pá dɛ́tá Weèdi Sèdi, k'ó pà tɛɛ̀-ní dící é pà caka è yɔ̀: ¹⁹ Mɛ̀ɛ té n m'pa̰a̰-nà ye kú nɔɔtì, k'yé teha kà n té cɔ̰nà-ko kú wɛǹni hḭ́ǹka n nɔ̀hi, k'yèe yaǹn té dɛ́tá Weèdi Sèdi. ²⁰ Àmá kà Píyɛ́ɛ̀ óò tɛ̰́ná è yɔ̀: Tɔɔ̀ta é sèǹ n'àa dící, mìì tee-sá a de maàhu è tonà a kó nɛɛ́ é dontá-dà Weèdi pa̰a̰dí nà dící? ²¹ A pú káá bòòdi ye tɔmù mɛhɛká, è yá̰á̰ a pú cɔ́dí a yàma mɛhɛká Weèdi yìhìka. ²² Wɛ́í a yam̀màhàsḭ̀ni, é cɔhà Teó è yɔ̀ ó nì nà dèda, k'yè púdí ò kó nì nà dèda-á-ma. ²³ N cɔ́dí é n'hɔ̰́tà mɛkatohikú-dà sṵ́nà a mɛhɛká, kà sḭ̀ḭ̀ma a dásí. ²⁴ Kà Sḭ̀mɔ́ɔ̀ é caka Píyɛ́ɛ̀ nà Ìsá̰à̰ è yɔ̀: Cɔhà-nà Teó nɛ mɔ́mpá n kpɛ́mú, k'yé teha k'yècḭ́ḭ̀ dá n tɛ̀ni nɛ wɛɛ̀-sà kú hḭ́ǹka.

²⁵ Ye Sèsíì tɔntɔndipá padɛ́ɛ̀di cakáà-ma Teó wɛnaamá é yɔ̀ɔ, é fitá é n'tóńti-ho Sèdìsàdɛ́m̀ yɔtí, è cakú-ho Weèdi wɛnaamá Sàmàdíì tempáàku yɔbíící dɔ́ɔ́di mɛhɛká.

Fìdípù nà Ètìòpíì dehèsào òcɔ̰́ǹ

²⁶ Kà Weèdi tɔntɔndikó é caka Fìdípù è yɔ̀: Yídá é taá pɛ̰̀pɛ̰̀-cúɛ́cúɛ́di bɛ́ka, cɔ̀ku mɛ̀ǹkù yíhú-ku-ní Sèdìsàdɛ́m̀ è sḭ́mù Kàsáà yɔtí. Ye cɔ̀ku, nìpa pú kù tṵ̀nì sàma. ²⁷ Kà Fìdípù é ceḿ yíí é ka̰há. K'ó n'tɔdì ye cɔ̀ku hḭ́ǹka, é dɛ́há dɔɔ̀o òcɔ̰́ǹ, k'ò yòǹ Ètìòpíì teǹka niìsào, kà p'òò fɔ̰̀ǹtà. Mɛnń-dà de nihí poòo pà toò-ko Kà̰ǹdásì káma wɛǹni. Ye poòo de yòǹ ye Ètìòpíì teǹka wódo-dà. Ye dɔɔ̀o de tɛ̀ni Sèdìsàdɛ́m̀-dà é duntà Weèdi, ²⁸ è tóńti è kṵnti o teǹka. Ò de kaàdi o sa̰n-dawɛ́ɛ̀ku hḭ́ǹka-dà, è kàǹ Weèdi wɛtɛ̰́náko Ìsàyíì pɔ̀kàta. ²⁹ Kà Weèdi Sèdi é caka Fìdípù è yɔ̀: Cèn é pàa-ho ye sa̰n-dawɛ́ɛ́kù! ³⁰ K'ó cocí é kù pàa-ho, ò you k'yèe Ètìòpíì yaǹn kaǹ Weèdi wɛtɛ̰́náko Èsàyíì pɔ̀kàta mɛhɛká. K'óò béka è yɔ̀: A you-ú-dà a kaǹ-sà hḭ́mpú? ³¹ K'yèe dɔɔ̀o óò tɛ̰́ná è yɔ̀: Ntɛ́ n kó hḭmà é yekà yè hḭ́mpú k'òòcɔ̰́ǹ pú yè nà n'wekànà? K'ó yíí Fìdípù è yɔ̀ ó dìsi-ní é kaàdi o fɔ̰̀di ye sa̰n-dawɛ́ɛ̀ku hḭ́ǹka. ³² Ǹtɛ Weèdi wɛmá ò de kaǹ-ma Weèdi pɔ̀kàta mɛhɛká:

Ò de yònà hɔ̰̀fa-dà pà dɛ̀di-fá

è fà kɔ́dí-nà nɔkɔ̀ùdi,

è yònà hɔ̰ɔ̰̀bíidí pà céù-di

kú kpìmu kà nì yòǹ kúdúḿ,

ò pú wɛɛ̀ màcɔ̰́mà.

³³ P'òò yɔ́kànà-á-ma,

pà pú teháà óò sída cóńcodí.

Pà dèdà-mà o fòùmu teǹka hḭ́ǹka,

wodà kó wáńtá wɛdá o yaàbíiká wɛmá?

³⁴ K'yèe dɔɔ̀o é béka Fìdípù è yɔ̀: M'a síɛ́kú-ma, n caka-ní Weèdi wɛtɛ̰́náko wɛì-ko kú wɛmá miì. Ò wɛì o cɔ̰́ɔ̰̀di kú wɛmá-dà, nkɛ́ɛ̀ ò wɛì tɔɔ̀ɔ òcɔ̰́ǹ kú wɛmá? ³⁵ Kà Fìdípù é tódá wɛmá, é cetá-nà wɛmá ò cetà kàǹ-ma, óò caka Sèsíì wɛnaamá. ³⁶ Kà pá n'sɔ̰ncí pa cɔ̀ku, é ta̰ntá bɛ̀m̀bɛ̀ni nìcɔ̰́nì, kà nɛ́ɛmá nì péé. K'yèe dɔɔ̀o yɔ̀: Ǹtɛ nɛ́ɛmá, baà kpadí a kó n cóńtá-ma? [\v 37 Kà Fìdípù óò tɛ̰́ná è yɔ̀: K'à dań n'àa yàma wɛǹni, n kó nɛɛ́-ma áa cóńtá.

K'yèe dɔɔ̀o óò tɛ̰́ná è yɔ̀: N dań-ma è yɔ̀ Sèsí-Kídísì-dà yòǹ Weèdi bíitá.] ³⁸ K'ó héé kà pá nɛhìna ye sa̰n-dawɛ́ɛ̀ku. Fìdípù n'ɛ̀ɛ dɔɔ̀o kà pá cútá pa dɛ́ɛ̀di ye nɛ́ɛmá mɛhɛká, kà Fìdípù óò cóńtá. ³⁹ Kà pá yɛɛ̀ni ye nɛ́ɛmá mɛhɛká, kà Bateó Sèdi é tódá Fìdípù óò ka̰há-nà, ye dɔɔ̀o koò p'óò dɛ́hà. Àmá k'ó sɔ̰kadá o cɔ̀ku nà yaǹnaakú. ⁴⁰ Kà Fìdípù mɛnn, é diìda é n'hɔ̰́tà ò péé yɔtí pà toò-ti Àsótì mɛhɛká. K'ó yídá é n'kɔ́dí Sèsàdéè yɔtí, è cakú-ho Sèsíì wɛnaamá, yɔtí ò de deèku-tí wɛǹni, háá é yɔ̀ɔ ta̰ntá.