Tɔná 9

Sɔ́dì kɔ̰́ɔ̰̀ o cɔ̰́ɔ̰̀di Sèsíì

¹ Ye kú wɔ̀ni mɛhɛká-dà Sɔ́dì de dɔɔ̀haà é yídá-ma Teó dapàm̀ma fá̰kápàpu, è kpɛ̀i é pà kɔ̀ù. Mɛmá-dà k'ó taá é dɛ́há dɔ̀hàdi kpɛ̰́ǹn, ² óò cɔ̀hà è yɔ̀ óò kɔ̰́ɔ̰́ pɔ̀kàhi mɛ̀ǹhì bɛkú-hi è yɔ̀ mɛnń-dà ò pɛ̰ḭ nùdi è yɔ̀ k'ò taá è dɛ́hà Dàmásì yɔtí mɛhɛká, poòpa yoo daapá kà pà tṵ̀n Teó cɔ̀ku, k'ó pà cɛ̰ha-ní é pà tɛɛ̀ní Sèdìsàdɛ́m̀. Ò de yònà é taá kɔ̰́ɔ̰́ ye pɔ̀kàhi ye yɔtí Weèdi wɛmá biɔhà-nàmɔ̀ka kpɛ̰́m̀ma-dà. ³ Ò de káà sá̰á̰ cɔ̀ku-dà è pàtì ye Dàmásì yɔtí, ye pesá n'ɛ̀ɛ pesá, kà wenkú kùcɔ̰́kù é cútá-ní nà hḭ́ǹka è pàìdi, é tɛ̀n'ɔ́ɔ̀ yéńtá. ⁴ K'ó dɔɔ teǹka, é yekà boòku kà k'òò cakú è toò: Sɔ́dì, Sɔ́dì, baà tee k'à n fá̰kápú? ⁵ K'ó béka è yɔ̀: Fɔ̰́ń wodà n Teù? K'yèe boòku óò tɛ̰́ná è yɔ̀: Mmí Sèsíì-dà a fá̰kápú-ko. ⁶ Yídá é dúú yɔtí mɛhɛká. K'à tɛ̀i ye pesá, pà k'áa caka-á-ma a yònà é pa̰á̰-sa. ⁷ Mɛ̀m̀pà de ò nɔɔ̀-nà-pa ye cà̰ǹku mɛhɛká de you-ú-ma ye boòku, àmá pà pú dìi òcɔ̰́ǹ. Kà pá nɛɛ̀hi cɔ̀dà pà pú nɛɛ̀ é cḭ́ha. ⁸ Kà Sɔ́dì é yíí-ní teǹka, k'òo nɔ̀ǹci kódí, w'àá koò pú dìi. Kà pá cɛ̰ɛ̰́ o nɔ̀ku, óò dɛ̀di, óò dúùwa Dàmásì yɔtí mɛhɛká. ⁹ K'ó n'yòǹ yɔ̀ǹn háá daàa kàta̰a̰, ò pú dii ò mɛ̀ɛ pú niì yècḭ́ḭ̀. ¹⁰ Dɔɔ̀ɔ òcɔ̰́ǹ-dà há̰ de péé Dàmásì yɔtí mɛhɛká è yòǹ Sèsíì dapàǹn, kà p'òò yún Ànàníyásì. Kà Teó óò fodá óò caka è yɔ̀: Ànàníásì! K'ó tɛ̰́ná è yɔ̀: Ǹtɛ mmí, n Teù. ¹¹ Kà Teó óò caka è yɔ̀: Yídá é taá cɔ̀ku pà yún-kú Heùma cɔ̀ku, é tɛ̀i dúú Sùdásì hɔ̰́ɔ̰̀ta é béka dɔɔ̀o pà toò-ko Sɔ́dì, k'ò yòǹ Táásì yɔtí kóoó. Ò dɔń Weèdi-dà wɔ̀ǹ mɛnì. ¹² Dɔhɔ̀ti mɛhɛká, ò dɛ́hà dɔɔ̀o òcɔ̰́ǹ-dà kà p'òò toò Ànàníásì, k'ó dúú-ní hɔ̰́ɔ̰̀ta mɛhɛká é cɔ̰ná o nɔ̀hi o hḭ́ǹka óò dìhìna. ¹³ Kà Ànàníyásì é tɛ̰́ná è yɔ̀: N Teù, n yeèkaà-á-ma kà nìpa dɔ́ɔ́di wɛì ye dɔɔò wɛmá. Pà n cakáà-á-ma kpákpààma ò pa̰à̰-ma wɛǹni mɛ̀m̀pà yòǹ-pa a kpɛ́ɛpá Sèdìsàdɛ́m̀ mɛhɛká. ¹⁴ É yídá, kà dɔ̀hàka yam̀ma kpɛ̰́m̀ma tṵ́m'ɔ̀ɔ̀ kɔ̰́ɔ̰̀-ní nɔɔ̀ti, è yɔ̀ ó cɛ̰ɛ̰́ mɛ̀m̀pà kú wɛnnì yún-pá a yèdi miì. ¹⁵ Àmá kà Teó óò caka è yɔ̀: Taá ò dɛ́há, è yá̰á̰ n ò bàtà è yɔ̀ ó deha n kpɛ́mú-dà. Mɛnń-dà kó n'tee kà boocí tɔcí nà ci wóópa é yá̰dá n yèdi, é pɛ́ɛ́-nà Ìsìdàyɛ́dìpa. ¹⁶ Mmí mɔ́nń-dà k'óò bɛka ò yònà é dii-kú náńkú wɛǹni nà n yèdi kpɛ́mú. ¹⁷ Kà Ànàníyásì é ka̰há, é tɛ̀i dúú ye hɔ̰́ɔ̰̀ta mɛhɛká, é cɔ̰ná o nɔ̀hi o hḭ́ǹka, óò caka è yɔ̀: N kúcàà Sɔ́dì, Teó Sèsíì mɛ̀ǹǹ àà fodà-ko-ní cɔ̀ku hḭ́ǹka k'à pení, mɛnń-dà n tɔn-ní è yɔ̀ ń tɛ̀ni áa dihìna, kà Weèdi Sèdi áa sṵ́ná. ¹⁸ Ye pesá n'ɛ̀ɛ pesá, k'yècḭ́ḭ̀ é n'dɔɔ̀-ní n'ɔ̀ɔ nɔ̀ǹcí mɛhɛká è yònà dáamú, k'ó cemá diìda. K'ó yídá kà p'óò cóńtá. ¹⁹ Ye kú dàhàka k'ó yíí é dii é tṵ́má dɛ́tá kpeèti.

Sɔ́dì cakú Weèdi wɛnaamá Dàmásì yɔtí

Kà Sɔ́dì é cá̰ńtá é pa̰á̰ daàka kàcɔ̰́kà nà Sèsíì tɔntɔndipá mɛ̀m̀pà de péé-pa Dàmásì yɔtí. ²⁰ K'ó ceḿ cetá è cakú Weèdi wɛmá biɔhà-nàmɔ̀ka mɛhɛká è yɔ̀ Sèsíì-dà yòǹ Weèdi bíitá. ²¹ Mɛ̀m̀pà kú wɛnnì de you-pá k'ò wɛì, k'yé pà dii dɛ́dɛ́í kà pà toò: Mɛnǹ-dà baà de fá̰kápú-ní Sèdìsàdɛ́m̀ mɛhɛká mɛ̀m̀pà yún-pá Sèsíì yèdi-a? N toò ò tɛ̀ni miì è kó pà cɛ̰ha-á-dà-ma é pà tanà dɔ̀hàka yam̀ma kpɛ́m̀ma yìhìka?

²² Àmá, kà Sɔ́dì é n'cakú Sèsíì wɛmá yè békú-ma kú bookú, háá è kpenì Sùwífùpa mɛ̀m̀pà de péé-pa Dàmásì yɔtí nùka, kà pà koò pú n'yá̰á̰ pà kó n'yɔ̀mù. Ò de pà wekànì è yɔ̀ Sèsíì-dà yòǹ Weèdi ta̰kadáko.

²³ Kà wɔ̀ni nìcɔ̰́nì é ka̰há, kà Sùwífùpa é kɔ̰dà è yɔ̀ pà k'óò kɔ̀ù-ú-ma. ²⁴ K'òòcɔ̰́ǹ é yódá ye wɛmá Sɔ́dì. Kà pá n'ceí ye yɔtí há̰ńnùka yèǹka nà wèǹku, è cɔ́ti è kpɛ̀i óò kɔ̀ù. ²⁵ Yèǹka kàcɔ̰́, kà Sɔ́dì dapàm̀ma óò tàa kóndúkédi mɛhɛká, óò cúhìna ye yɔtí bonkú dàhàka.

Sɔ́dì Sèdìsàdɛ́m̀ yɔtí mɛhɛká

²⁶ Kà Sɔ́dì é ta̰ntá-ní Sèdìsàdɛ́m̀, é tɛ̀ni é pɛha è kó múná-nà Sèsíì dapàm̀ma. Àmá kà pa wɛǹni òò wani, mìì tee-sá pà de pú dań è yɔ̀ ò hḭn Sèsíì dapàǹn mámáḿ. ²⁷ Mɛmá-dà kà Bànàbásì óò tódá óò tanà Sèsíì tɔntɔndipá pesá, é tɛ̀i é pà caka Sɔ́dì de dɛ́káàma kú bookú Teó è kɔ́dí Dàmásì yɔtí, nà Teó de ò cakáà-sa. K'ó tṵ́má pà caka Sɔ́dì de cḭnà kṵnnɔ̀ǹfa é caka-má kú bookú Weèdi wɛmá Dàmásì yɔtí mɛhɛká nà Sèsíì yèdi. ²⁸ É cɛ̰ɛ̰́-nà ye kú wɔ̀ni, kà Sɔ́dì é pà nɔdá-nà, è cèǹtì Sèdìsàdɛ́m̀ yɔtí mɛhɛká è cakú Teó wɛnaamá nà kṵnnɔ̀ǹfa nìku wɛǹni yìhìka nà Teó yèdi. ²⁹ Ò de peèku-nà-á-ma Sùwífùpa mɛ̀m̀pà wɛì-pa Kɛ̀dɛ́kìdi, kà pà té nɔhìnà Weèdi wɛmá hḭ́ǹka, àmá kà mɛmpa pɛnti pà kó hḭmpú óò kɔ̀ù. ³⁰ Kà weèdɔɔ̀pa tɔɔ̀pa é mà yèkà, é tódá Sɔ́dì óò tanà Sèsàdéè yɔtí, n'ɛ̀ɛ pesá kà pá héé kó sɔ̰kadá Táásì yɔtí.

³¹ Ye kú wɔ̀ni, weèdɔɔ̀pa mɛ̀m̀pà de péé-pa Sùdéè, nà Kàdìdéè, nà Sàmàdíì tempáàti wɛǹni mɛhɛká de péé wɛ̀ɛ̀di mɛhɛká-dà. Pà de kpɛ̰́ǹ-ń-ma Weèdi cɔ̀ku mɛhɛká, è you-nà Teó toòka, kà pa dɔ́ɔ́di dɔɔ̀haà è wɛhikú nà Weèdi Sèdi kú tempàma nɔɔ̀ti.

Píyɛ́ɛ̀ kpekànà Ènɛ́ɛ̀.

³² Píyɛ́ɛ̀ de centì pa heedí teǹka wɛǹni mɛhɛká-dà. Daadí yènì, k'ó taá weèdɔɔ̀pa mɛ̀m̀pà de péé-pa Dìdáà yɔtí pesá. ³³ K'ó tɛ̀i é dɛ́há ye yɔtí mɛhɛká, dɔɔ̀o òcɔ̰́ǹ kà p'òò toò Ènɛ́ɛ̀, k'ò hɔ̀u è dɔɔ́ o dɔɔdí hḭ́ǹka k'yè yɔ̀ɔ beeká kànìì. ³⁴ Kà Píyɛ́ɛ̀ óò caka è yɔ̀: Ènɛ́ɛ̀, Sèsí-Kídísì àà kpekànà-á-ma. Yídá é kɔ́wá a dɔɔdí! Ye pesá n'ɛ̀ɛ pesá, k'ó yíí-ní. ³⁵ Dìdáà yɔtí kpɛ́ɛpá, nà mɛ̀m̀pà de péé-pa Sàdɔ́nì bandikú kpɛ́ɛpá wɛǹni ò dɛ́hà-ma, kà pá kɔ̰́ɔ̰́ pa cɔ̰́ɔ̰̀di Teó.

Píyɛ́ɛ̀ yá̰hìnà Dɔ̀ɔ̀kásì

³⁶ Poòo òcɔ̰́ǹ-dà de péé Sòpéè yɔtí mɛhɛká kà p'òò toò Tàbíta, nà kɛ̀dɛ́kìdi kà pà yɔ̀ Dɔ̀ɔ̀kásì, mìì kpɛ̀i é n'yɔ̀-sa wɔɔ̀fa. Ò de yòǹ weèdɔɔ̀o-dà, è pa̰kú suumá sàma wɔ̀ka wɛǹni, è tempú-nà pɛ́hí. ³⁷ Ye kú wɔ̀ni-dà, ò mɔkáà-ma é kpíí. Kà pá hɔɔ̀di o wɔ̰̀ǹku, é kù dɔwá nàmɔ̀ni mɛhɛká hɔ̰́dìdìkàta hḭ́ǹka. ³⁸ Kà Sòpéè weèdɔɔ̀pa é yekà è yɔ̀ Píyɛ́ɛ̀ péé Dìdáà yɔtí. Ye yɔtì há̰ de pú dɛu-nà ti tɔtí. Kà pá tɔn nìi pàdɛ́ɛ́ è yɔ̀ pá taá óò caka è yɔ̀ ó ya̰ní fen-fem̀ma pa hɔ̰́ɔ̰́hí. ³⁹ Kà Píyɛ́ɛ̀ é yíí pà tṵ̀na ye wɔ̀ni n'ɛ̀ɛ wɔ̀ni. Ò ta̰ntà-ma, kà p'óò dìkàna ye nàmɔ̀ni mɛhɛká, kà nì péé ye hɔ̰́dìdìkàta hḭ́ǹka. Kà kpíipoòti wɛǹni óò hɛ́tá-ho nà dawòòka, óò bɛka tókedɛùka nà báatí Dɔ̀ɔ̀kásì de dɛù-sa è káà pà péé-nà. ⁴⁰ Kà Píyɛ́ɛ̀ é deèna nìku wɛǹni, é hìu é pa̰á̰ weèdɔɔ̀pu. Ye kú dàhàka k'ó fitá ye poòo wɔ̰̀ǹku bɛ́ka è yɔ̀: Tàbíta, yíí-ní!

K'yèe poòo é diìda-ní, é dɛ́há Píyɛ́ɛ̀, é yídá é kaàdi. ⁴¹ K'ó cɛ̰ɛ̰́ o nɔ̀ku, óò tempa-nà k'ó yíí-ní. Ye kú dàhàka, k'ó yíí weèdɔɔ̀pa n'ɛ̀ɛ kpíipoòti óò pà bɛka o fòùo. ⁴² Kà Sòpéè yɔtí yam̀ma wɛǹni é mà yèkà, kà nìpa dɔ́ɔ́di é taàa pa dandaní Teó hḭ́ǹka. ⁴³ Kà Píyɛ́ɛ̀ é cá̰ńtá Sòpéè yɔtí mɛhɛká é yóka, è péé dɔɔ̀o òcɔ̰́ǹ kú hɔ̰́ɔ̰̀ta k'ò pùkàdi dɔɔcí kà p'òò yún Sìmɔ́ɔ̀.