Tɔná 10

Kɔ̀ɔ̀nɛ́ì yíí Píyɛ́ɛ̀ o hɔ̰́ɔ̰̀ta

¹ Dɔɔ̀ɔ òcɔ̰́ǹ-dà há̰ de péé Sèsàdéè yɔtí mɛhɛká kà p'òò toò Kɔ̀ɔ̀nɛ́ì. Ò de yòǹ sósìpa kpɛ̰́ǹn-dà Hɔ̀dɔ́m̀ sósìpa kɔ̀ùta hùhùkàdi pà yún-dí Ìtàdíì hùhùkàdi. ² Ye dɔɔ̀o n'ɔ̀ɔ hɔ̰́ɔ̰́tà kpɛ́ɛpá wɛǹni de káá-ma Weèdi wantafɔ̰̀di. Ò de tempú-nà-á-ma Sùwífùpa pɛ́hí dɔ́ɔ́di, è té n'dɔń Weèdi bá wɔ̀ni. ³ Daadí yènì, kà wèǹku yɔ̀ɔ bíkádápu, máàku màta̰a̰ mɛhɛká, kà Weèdi tɔntɔndikó óò fodá, k'óò dɛ́há pópóí dɔhɔ̀ti mɛhɛká, k'ó dúú-ní o hɔ̰́ɔ̰̀ta óò caka è yɔ̀: Kɔ̀ɔ̀nɛ́ì! ⁴ K'ó wáńtá ye tɔntɔndikó k'à wantafɔ̰̀di ò káá, k'ó béka è yɔ̀: Badà n Teù? K'yèe tɔntɔndikó óò tɛ̰́ná è yɔ̀: Weèdi ta̰ntà-á-ma a weèdɔɔ̀pu, nà pa̰ká a pɛ̰ḭ-ká pɛ́hí, nì pú dúi a kpɛ́mú. ⁵ Tɔn nìpa yɔtí pà toò-ti Sòpéè, kà pá taá é yíí-ní dɔɔ̀o pà toò-ko Sìmɔ́ɔ̀, k'òo yèdi tɔɔ̀di héé Píyɛ́ɛ̀. ⁶ Ò bátà dɔɔ̀o òcɔ̰́ǹ kú hɔ̰́ɔ̰̀ta-dà, kà pà mɛ̀ɛ t'óò yún Sìmɔ́ɔ̀, k'ò pùkàdi dɔɔcí, k'òo hɔ̰́ɔ̰̀ta kpɛ̰́dí-nà dàmɛ́dì. ⁷ Ye Weèdi tɔntɔndikó ò wɛɛ̀-nà-ma é yɔ̀ɔ, é ka̰há. Kà Kɔ̀ɔ̀nɛ́ì é yíí o dehèpa pàdɛ́ɛ́, n'ɔ̀ɔ sóso òcɔ̰́ o sósìpa mɛhɛká mɛ̀m̀pà de dehú-pa o kpɛ́mú, k'yèe sóso wani Weèdi. ⁸ K'ó pà caka mìì pa̰à̰-sa wɛǹni, é yɔ̀ɔ pà tɔn Sòpéè yɔtí. ⁹ K'yé wentá, kà pá n'káà sá̰á̰ cɔ̀ku è pàtì Sòpéè, kà Píyɛ́ɛ̀ é dìsi hɔ̰́ɔ̰̀ta mùmùǹti hḭ́ǹka è kó dɔa Weèdi, kà wèǹku patì yuùka hḭ́ǹka. ¹⁰ Kà kòni óò cɛ̰dí, k'ò kpɛ̀i é dii. Kà p'óò m'béèǹta dipú, k'yé ò hḭn-nà dɔhɔ̀ti. ¹¹ K'ó dɛ́há kà hḭ́ǹka é kpetá, k'yècḭ́ḭ̀ yɔ̰̀mù-ní è cúti-ní teǹka hḭ́ǹka, è yònà pɛ́nsàku pà púsí-ku ku nùka kanàhìka. ¹² Ku mɛhɛká, kà nɔtí boocí wɛǹni yè péé: Tàka kànàhì kpɛ́ɛtí, nà mìì fudì-sa wɛǹni ye pɛutí hḭ́ǹka, nà nɛ̀hi. ¹³ Kà boòku kùcɔ̰́kù óò caka è yɔ̀: Píyɛ́ɛ̀, yídá é kɔ̀ù é cécí! ¹⁴ Kà Píyɛ́ɛ̀ é tɛ̰́ná è yɔ̀: Ṵ́ṵ̀, n Teù! N mum pú dii daadí yènì ti kpɛ̰́ńtìnùka hḭ́n mìì cií-sa, yoo mìì pú weni-sá. ¹⁵ K'yèe boòku é tṵ́má óò caka dɛ́ɛ̀ma è yɔ̀: Weèdi hḭ́n mìì weni-sá, a dá n'yɔ̀ yè pú weni.

¹⁶ K'yé pa̰á̰ ma kú bookú cɔ̀ku màta̰di. Ye kú dàhàka, kà pá deèe-ho ye niìya̰ hḭ́ǹka, ye pesá n'ɛ̀ɛ pesá.

¹⁷ Kà Píyɛ́ɛ̀ é n'káà péé yammàhàdi mɛhɛká, è békú o cɔ̰́ɔ̰̀di ye kú bɛkàmà kpɛ̀i é n'yɔ̀pu. Ye wɔ̀ni, è hɔ̰́tà Kɔ̀ɔ̀nɛ́ì de tɔn-pá-ní nìpa yɔ̀ɔ békáàpu Sìmɔ́ɔ̀ hɔ̰́ɔ̰̀ta, è péé ta há̰ńnùdi. ¹⁸ Kà pá yíí é béka è yɔ̀: Miì-dà dɔɔ̀o pà yún-kó Sìmɔ́ɔ̀, k'òo yèdi tɔɔ̀di héé Píyɛ́ɛ̀, bátà-ma?

¹⁹ Kà Píyɛ́ɛ̀ é n'káà màhu ye bɛkàma hḭ́ǹka, kà Weèdi Sèdi óò caka è yɔ̀: Ǹtɛ, nìpa pàta̰a̰ péé tapaàdi àà pɛnti. ²⁰ Yídá, é cútá, é pà nɛ̀ǹta kà nɛ́ ka̰há a dá hḭn hɔdahɔda, è yá̰á̰ mmí-dà pà tɔn-ní. ²¹ Kà Píyɛ́ɛ̀ é cútá-ní é caka ye nìpa è yɔ̀: Ǹtɛ mmí, nɛ pɛnti-kó. M̀mɔ́ma-dà nɛ tɛɛ̀ní? ²² Kà p'óò tɛ̰́ná è yɔ̀: Sósìpa kpɛ̰́ǹn Kɔ̀ɔ̀nɛ́ì-dà ti tɔn-ní. Ò yòǹ nìi mɛ̀ǹǹ coó-ko-dà, è káá Weèdi wantafɔ̰̀di, kà Sùwífùpa wɛǹni wɛì o suumá hḭ́ǹka. Weèdi tɔntɔndikó-dà ò fodà óò caka è yɔ̀, ó tɔn kà p'áa yíí-ní o hɔ̰́ɔ̰̀ta mɛhɛká, k'ó besí a k'óò caka-sá. ²³ Mɛmá-dà, kà Píyɛ́ɛ̀ é pà dúùwa hɔ̰́ɔ̰̀ta mɛhɛká, é pà codá kà pá weń.

K'yé weka, n'ɛ̀ɛ nìpa pata̰à̰ka kà pá cɛ̰ɛ̰́ cɔ̀ka, kà Sòpéè yɔtí weèdɔɔ̀pa pàcɔ̰́ óò bɛ́hìna. ²⁴ Dadɛ́ɛ̀di, kà pá ta̰ntá Sèsàdéè yɔtí, é tɛ̀i è hɔ̰́tà Kɔ̀ɔ̀nɛ́ì pà ceí, è pèhènà o yɛm̀ma, n'ɔ̀ɔ dópòbɔ̀ɔ̀ka. ²⁵ Píyɛ́ɛ̀ ta̰ntà-ma é n'kpɛ̀i é dúú, kà Kɔ̀ɔ̀nɛ́ì é tɛ̀ni o codápu, é wɛ́í-ho o cɔ̰́ɔ̰̀di o tàka fɔ̰̀di, óò dɔwa. ²⁶ Àmá kà Píyɛ́ɛ̀ óò yíkàna, óò caka è yɔ̀: Yídá! N mɔ́ńǹ, n yòǹ nìi-dà. ²⁷ K'ó n'sɔ̰ncí è wɛì-nà Kɔ̀ɔ̀nɛ́ì, é dúú hɔ̰́ɔ̰̀ta mɛhɛká, é tɛ̀i è hɔ̰́tà nìku dɔ́ɔ́di tísí. ²⁸ K'ó pà caka è yɔ̀: Nɛ mɔ́mpá, nɛ yá̰á̰-dà è yɔ̀ kpɛ̰́ńtìnùka yeéè-é-dà, Sùwífù kó dúú-ma mɛ̀ǹǹ pú yòǹ-ko Sùwífù hɔ̰́ɔ̰̀ta mɛhɛká yoo é n'kɔ́dì o pesá. Àmá Weèdi n bɛkáà-á-ma è yɔ̀, n pú yònà é n'yɔ̀ nìì mɛnǹ pú weni, n pú dúti o hɔ̰́ɔ̰̀ta mɛhɛká. ²⁹ Mɛmá-dà tee nɛ n yíí-ma, n pú hḭ́n màcɔ̰́mà, ká n tɛ̀ni. N caka-nà-ní sá̰mà mìì tee-sá kà nɛ́ n yíí-ní.

³⁰ Kà Kɔ̀ɔ̀nɛ́ì óò caka è yɔ̀: Danàhidí-dà yenì, k'yè beé-nà wɔ̀nì ti péé-dì, kà wèǹku yɔ̀ɔ bíkádápu, máàku màta̰a̰ mɛhɛká, è hɔ̰́tà n péé n hɔ̰́ɔ̰̀ta mɛhɛká è dɔń Weèdi. Ye pesá n'ɛ̀ɛ pesá, n hɔ̰́tà dɔɔ̀o òcɔ̰́ǹ nɛ̀hi n yìhìka, è báá báatí kà tì pàìdi. ³¹ K'ó n caka è yɔ̀: Kɔ̀ɔ̀nɛ́ì, Weèdi yeèkaà-á-ma a weèdɔɔ̀pu, é deǹta pa̰ká a pɔ̰n-ká pɛ́hí. ³² Tɔn nìpa yɔtí pà toò-ti Sòpéè, kà pá taá é yíí-ní dɔɔ̀o pà toò-ko Sìmɔ́ɔ̀, k'òo yèdi tɔɔ̀di héé Píyɛ́ɛ̀. Ò bátà dɔɔ̀o òcɔ̰́ǹ kú hɔ̰́ɔ̰́tà-dà kà pà mɛ̀ɛ t'óò yún Sìmɔ́ɔ̀, k'ò pùkàti dɔɔcí, k'òo hɔ̰́ɔ̰̀ta kpɛ̰́dí-nà dàmɛ́dì. ³³ Ká n cemá tɔn nìpa a pesá, k'à mɛ̀ɛ é teha é tɛ̀ni. Sá̰mà-ní, ti péé miì ti wɛǹni-dà Weèdi yìhìka, è kó yekà Teó hḭ́n á ti caka-sá wɛǹni.

Píyɛ́ɛ̀ wɛɛ̀-ma wɛmá Kɔ̀ɔ̀nɛ́ì hɔ̰́ɔ̰̀ta

³⁴ Kà Píyɛ́ɛ̀ é tódá wɛmá è yɔ̀: Wɔ̀nì mɛnì, n bantà-á-ma dɛ́dɛ́í è yɔ̀ Weèdi pú bahù nìpa. ³⁵ Kà nìi káá Weèdi wantafɔ̰̀di è pa̰kú mìì coó-sa, Weèdi hɔ̰́ n'naa-nà-ko-dà bá k'ò kpɛ̀i k'ó n'yòǹ-ku bookú kóoó. ³⁶ Weèdi kɔ̰́ɔ̰̀-ní ni wɛmá Ìsìdàyɛ́dì nìku-dà, kà mà cakú è yɔ̀ Sèsí-Kídísì-dà kɔ̰́nì wɛ̀ɛ̀di, è yòǹ nìi wɛǹni Teó. ³⁷ Nɛ yá̰á̰-ma mìì pa̰à̰-sa Sùdéè tempáàku wɛǹni mɛhɛká. Yè cetà-nà-ní Kàdìdéè-dà, é tódá Ìsá̰-Bàtísì cakáà tíń wɔ̀ni nìpa è yɔ̀ pá hédá kà pá pà cóńtá. ³⁸ Nɛ yá̰á̰-dà Weèdi de pɛ̰ḭ-má ni Sèdi nà ni nɔɔ̀ti Sèsíì Nàsàdɛ́tì kóoó. Ò de centì páàti wɛǹni-dà è pa̰kú suumá, è kpekànì wɛɛ̀kupá wódo de núńtí-pa wɛǹni, mìì tee-sá Weèdi-dà de ò péé-nà. ³⁹ Tḭ́ńti dɛ́hà-á-ma nà ti nɔ̀ǹci ò pa̰à̰-sa wɛǹni Sùwífùpa teǹka mɛhɛká, nà Sèdìsàdɛ́m̀ yɔtí mɛhɛká. P'òò kpɛ̰́ḭ́ kpíidɔkú hḭ́ǹka-dà óò kɔ̀ù. ⁴⁰ Àmá, kà Weèdi óò yá̰hìna-ní data̰á̰di daadí, é hédá k'ó bɛka o cɔ̰́ɔ̰̀di. ⁴¹ Ò de pú bɛkáà o cɔ̰́ɔ̰̀di nìpa wɛǹni, k'yè pú yòǹ tḭ́ńti Weèdi de ta̰kadà-pa nà daadí è yɔ̀ tí n'yòǹ ni pṵ́tápa. Ò yá̰ńtà-á-ma kpíípa mɛhɛká, kà tí pɛ́ɛ́ óò dii-nà, é pɛ́ɛ́ óò yà̰à̰-nà. ⁴² K'ó ti kɔ̰́ɔ̰́ nùdi è yɔ̀ tí caka nìku Weèdi wɛnaamá, é kù caka è yɔ̀ mɛnń-dà Weèdi ta̰kadà-ma, k'ò kó síi-nà fòùpa nà kpíípa. ⁴³ Weèdi wɛtɛ̰́nápa wɛǹni wɛdà-á-ma o wɛmá, è yɔ̀ mɛ̀ǹǹ wɛnnì kó taàa-kó dandaní o hḭ́ǹka, Weèdi k'óò dèda-á-ma o sḭ̀ḭ̀ma n'ɔ̀ɔ kú yèdi.

Mɛ̀m̀pà pú yòǹ-pa Sùwífùpa dɛ́tà Weèdi Sèdi

⁴⁴ Kà Píyɛ́ɛ̀ é n'káà wɛì, kà Weèdi Sèdi é cútá-ní mɛ̀m̀pà d'oò besí-pa wɛǹni hḭ́ǹka. ⁴⁵ Weèdɔɔ̀pa mɛ̀m̀pà de bɛ́hínà-pa-ní Píyɛ́ɛ̀ è yòǹ Sùwífùpa, k'yé pà dii dɛ́dɛ́í nà Weèdi mɛ̀ɛ té kɔ̰́ɔ̰̀-ma-ní ni Sèdi mɛ̀m̀pà pú yòǹ-pa Sùwífùpa, ⁴⁶ è yá̰á̰ pà de you kà pà wɛì bocà̰ncí-dà, è dèǹ Weèdi wɛhimú. Ye wɔ̀ni kà Píyɛ́ɛ̀ é béka è yɔ̀: ⁴⁷ Ti kó nɛɛ́ é yee-é-dà ti kó cóńtá-ma nɛ́ɛmá mɛhɛká, nìpa mɛ̀m̀pà dɛ́tà-pa Weèdi Sèdi è yònà tḭ́ńti?

⁴⁸ Ye wɔ̀ni, k'ó kɔ̰́ɔ̰́ nùdi è yɔ̀ pá pà cóńtá nà Sèsí-Kídísì yèdi. Ye kú dàhàka, kà p'óò cɔ̀hà è yɔ̀ ó cá̰ńtá é pà pa̰á̰-nà daàka cɛ̰́ma.