Tɔná 11

Píyɛ́ɛ̀ cakú o tɔɔ̀pa Weèdi pa̰à̰-sa mɛ̀m̀pà pú yòǹ-pa Sùwífùpa

¹ Kà Sèsíì tɔntɔndipá, nà Weèdɔɔ̀pa mɛ̀m̀pà péé-pa Sùdéè tempáàku mɛhɛká, é yekà è yɔ̀ mɛ̀m̀pà pú yòǹ-pa Sùwífùpa mɛ̀ɛ té teháà Weèdi wɛmá. ² Píyɛ́ɛ̀ tóní-ma-ní Sèdìsàdɛ́m̀, kà weèdɔɔ̀pa mɛ̀m̀pà yòǹ-pa Sùwífùpa ò kɔ̰̀ǹti-nà, ³ è toò: A taá mɛ̀m̀pà pú yòǹ-pa Sùwífùpa pesá-dà, é tɛ̀i é pɛ́ɛ́ pà dii-nà. ⁴ Mɛmá-dà, kà Píyɛ́ɛ̀ é pà caka mìì pa̰à̰-sa-ní wɛǹni, ye cetáma n'ɛ̀ɛ yɔ̀ɔmá, è yɔ̀: ⁵ N de péé Sòpéè yɔtí mɛhɛká-dà è dɔń Weèdi, k'yé n hḭn-nà dɔhɔ̀ti, ká n dɛ́há yècḭ́ḭ̀ k'yè cúti-ní nà hḭ́ǹka è yònà pɛ́nsàku pà púsí-ku ku nùka kanàhìka, háá nà n fɔ̰̀di. ⁶ Ká n cɔ́dí sukú ku mɛhɛká, é dɛ́há tàka kànàhì nɔtí, nà foǹni kpɛ́ɛtí, nà mìì fudì-sa ye pɛutí hḭ́ǹka, nà nɛ̀hi. ⁷ Ká n yekà boòku kùcɔ̰́kù kà kù n cakú è tonà: Píyɛ́ɛ̀, yídá é kɔ̀ù é cécí! ⁸ Àmá ká n tɛ̰́ná è yɔ̀: Ṵ́ṵ̀, n Teù! N mum pú dii daadí yènì ti kpɛ̰́ńtìnùka hḭ́n mìì cií-sa yoo mìì pú weni-sá. ⁹ K'yèe boòku é tṵ́má wɛɛ́-ní nà hḭ́ǹka è yɔ̀: Weèdi hḭ́n mìì weni-sá, a dá n'yɔ̀ yè pú weni. ¹⁰ K'yé pa̰á̰ ma kú bookú é n'káá cɔ̀ku màta̰di. Ye kú dàhàka, kà pá deèe-ho ye niìya̰ hḭ́ǹka mɛhɛká. ¹¹ Ye wɔ̀ni ni cɔ̰́ɔ̰̀di mɛhɛká, kà nìi pàta̰a̰ é tɛ̀ni hɔ̰́ɔ̰̀ta ti de péé-ta è kó n dɛ́há, kà pà pà tɔn-ní nà Sèsàdéè yɔtí. ¹² Kà Weèdi Sèdi é n caka è yɔ̀ ń pà tṵ̀na kà tí ka̰há n dá hḭn hɔdahɔda. Ká n tódá ti weèdɔɔ̀tɔ̀pà mɛmpà pàkɔ̀dì, kà pá n bɛ́hìna Sèsàdéè, kà tí tɛ̀i é dúú Kɔ̀ɔ̀nɛ́ì hɔ̰́ɔ̰̀ta mɛhɛká. ¹³ K'ó ti caka Weèdi tɔntɔndikó ò fokáàma kú bookú o hɔ̰́ɔ̰̀ta mɛhɛká, óò caka è yɔ̀: Tɔn nìpa kà pá taá Sòpéè yɔtí, é yíí-ní Sìmɔ́ɔ̀ pà tṵ́mà yún-kó Píyɛ́ɛ̀. ¹⁴ Ò k'áa caka-á-ma wɛmá mɛ̀mà kó n'tee-má, fɔ̰́ń n'àa hɔ̰́ɔ̰́tà kpɛ́ɛpá kà nɛ́ dɛ́tá fḭ́táma. ¹⁵ Ká n cetá é n'káà pà cakú ye wɛmá, kà Weèdi Sèdi é cútá-ní pa hḭ́ǹka é n'yònà nì de cúkáàma-ní ti hḭ́ǹka nà cetáma. ¹⁶ Ká n deǹta-ní wɛmá Teó de wɛɛ̀-ma è yɔ̀: Ìsá̰-Bàtísì cóńtà nìpa nà nɛ́ɛmá-dà, àmá nɛ́na pà kó nɛ cóńtá nà Weèdi Sèdi-dà. ¹⁷ Weèdi mɛ̀ɛ té há̰ pà pɛ̰ḭ-mà pa̰dí nì de ti pɛ̰ḭ-dí ti de taà tḭ́ń wɔ̀ni ti dandaní Sèsí-Kídísì hḭ́ǹka, mmí de héé wodà è kó nɛɛ́ nì kpaná ni tɔmú mɛhɛká? ¹⁸ Pà yèkaà-ma mɛma, kà pa yàma é kaàdi, kà pá fa̰nta Weèdi yèdi è yɔ̀: Weèdi mɛ̀ɛ té pɛ̰ḭ-ḭ́-ma mɛ̀m̀pà pú yòǹ-pa Sùwífùpa, è yɔ̀ pa peǹta pa pa̰á̰ma, é dɛ́tá fòùmu mɔ́mmú.

À̰ǹtíyɔ́sì yɔtí weèdɔɔ̀pa

¹⁹ Yè de hɔ̰́tà pà cetà weèdɔɔ̀pa fá̰kápàma-dà Ètíyɛ́nì kṵ́mú dàhàka. Kà pà mɛ̀ɛ é wiìda páàti wɛǹni, kà pa pàcɔ̰́ é taá háá Fènìsíì teǹka, nà Sípúdì kpɛ́ɛká, nà À̰ǹtíyɔ́sì yɔtí. Àmá pà de cakú Weèdi wɛmá Sùwífùpa cɔ̰́ɔ̰̀di-dà. ²⁰ Pa mɛhɛká há̰kà, pa mɛ̀m̀pà de yòǹ-pa Sípúdì nà Sìdɛ́nì teǹka kpɛ́ɛpá, de taá-ma À̰ǹtíyɔ́sì, é tɛ̀i é caka Teó Sèsíì wɛnaamá mɛ̀m̀pà pú yòǹ-pa Sùwífùpa. ²¹ Kà Teó kpeèti de pà péé-nà, kà nìpa dɔ́ɔ́di é taàa pa dandaní o hḭ́ǹka, óò kɔ̰́ɔ̰́ pa cɔ̰́ɔ̰̀di. ²² Kà Sèdìsàdɛ́m̀ weèdɔɔ̀pa é mà yèkà, é tɔn Bànàbásì À̰ǹtíyɔ́sì yɔtí. ²³ K'ó tɛ̀ni é dɛ́há pa̰á̰suumá Weèdi de pa̰à̰-ma ye weèdɔɔ̀pa, k'yóò naka dɛ́dɛ́í. K'ó yahikàna pa wɔ̰̀ǹti pa wɛǹni, è yɔ̀ pá wɛ̰́dí é n'daàdi-nà Teó nà pa yàma wɛǹni. ²⁴ Bànàbásì de yòǹ nìi mɔ́nń-dà, è káá dandaní, kà Weèdi Sèdi ò sṵ́nà. Kà nìku dɔ́ɔ́di é kɔ̰́ɔ̰́ ku cɔ̰́ɔ̰̀di Teó. ²⁵ Kà Bànàbásì é taá Táásì yɔtí è kó pɛha-ní Sɔ́dì. ²⁶ Ò tɛ̀i-má óò dɛ́há, óò tóó-ní kà pá tɛ̀ni À̰ǹtíyɔ́sì yɔtí. Kà pá tɛ̀ni pa̰á̰ ye pesá benní mumun, é biɔhàna weèdɔɔ̀pa dɔ́ɔ́di Weèdi wɛmá. Ye À̰ǹtíyɔ́sì yɔtí mɛhɛká-dà pà yíí-ma cecemá mɛ̀m̀pà tṵ̀n-pá Sèsíì è yɔ̀ Kídísì kpɛ́ɛpá. ²⁷ Ye kú daàka mɛhɛká, kà Weèdi wɛtɛ̰́nápa pàcɔ̰́pà é tɛ̀ni À̰ǹtíyɔ́sì, è yíí-nà-ní Sèdìsàdɛ́m̀. ²⁸ P'oòcɔ̰́ kú yèdi-dà de dɛɛ̀ Àkàbúsì, k'ó yídá é wɛdá nà Weèdi Sèdi kú nɔɔ̀ti, è yɔ̀ koǹsàdi-dà kó dúní teǹka wɛǹni hḭ́ǹka. K'yèe kòni mɛ̀ɛ de dúní, kà wóosào Kódótì wódí. ²⁹ Mɛmá-dà, kà Sèsíì kpɛ́ɛpá é tódá ta̰kadáma, è yɔ̀ bá pa mɛ̀ǹǹ dɛ̀ɛ̀-ko é kɔ̰́ɔ̰́ ò kó nɛɛ́ kɔ̰́ɔ̰́-sa, kà pá naǹci pa weèdɔɔ̀tɔ̀pa mɛ̀m̀pà de péé-pa Sùdéè tempáàku mɛhɛká. ³⁰ Kà pá de mà hḭn, é kɔ̰́ɔ̰́ ye pa̰ká Bànàbásì nà Sɔ́dì, kà pá taá kà kɔ̰́ɔ̰́ Sùdéè tempáàku weèdɔɔ̀pa kpɛ̰́m̀ma.