Tɔná 12

Pà kɔ̀ù Sàákì é kpená Píyɛ́ɛ̀

¹ Ye kú wɔ̀ni mɛhɛká-dà, wódo Hèdótì de cetà-ma è fá̰kápú weèdɔɔ̀pa pàcɔ̰́. ² K'ó héé kà pá kɔ̀ù Sàákì, Ìsá̰à̰ kúcàa nà sepɛ̰ɛ̰̀dí. ³ Ò dɛ́hà-ma è hɔ̰́tà yè naakáà Sùwífùpa, k'ó héé kà pà mɛ̀ɛ té cɛ̰ɛ̰́ Píyɛ́ɛ̀. Yè de hɔ̰́tà pɛ̰́ɛ̰̀pa mɛ̀m̀pà kɔ́ɔ́-pa yòmu yíkànasá kúúdi daàka mɛhɛká-dà. ⁴ Ò héè-ma kà p'óò cɛ̰ɛ̰́, k'óò ká̰ńtá kódeedí mɛhɛká, é hɛɛ̀da sósìpa pànàhì pànàhi cɛ̰ncí cìnàhì è yɔ̀ p'óò ceí. Ò de kpɛ̀i núǹtiyɛ̀ɛ̀ma kúúdi-dà é ka̰há, k'óò dèna-ní nìku yìhìka óò sída. ⁵ Píyɛ́ɛ̀ de péé kódeedí mɛhɛká-dà kà p'òò ceí dɛ́dɛ́í, àmá kà weèdɔɔ̀pa hùhùkàdi cɔɔ̀hu Weèdi tenten o kpɛ́mú.

Weèdi tɔntɔndikó fḭ́hínà Píyɛ́ɛ̀

⁶ Ye yèǹka mɛ̀ǹkà de kó weka-ká kà Hèdótì é sída Píyɛ́ɛ̀ nìku yìhìka, pà de ò dákà dákáti tìdɛ́ɛ́-dà k'ò dɔɔ́ sósìpa pàdɛ́ɛ́ cɔhɔ̀ka, kà kódeceípa nɛɛ̀hi ye kódeedí há̰ńnùdi è ceí. ⁷ Ye wɔ̀ni n'ɛ̀ɛ wɔ̀ni, Kà Weèdi tɔntɔndikó é fodá-ní, k'yèe kódeedí mɛhɛká yɔ̀ fa̰ṵ, k'yèe Weèdi tɔntɔndikó é pádá Píyɛ́ɛ̀, óò hèǹta óò caka è yɔ̀: Yídá fem̀ma! Ye wɔ̀ni ni cɔ̰́ɔ̰̀di mɛhɛká, k'yèe dákáti mɛ̀ǹtì de dásí-ti o nɔ̀hi é yoòta-ní teǹka. ⁸ K'yèe Weèdi tɔntɔndikó óò caka è yɔ̀: Cɛ̰́ṵ́wá a nawɔ̰̀ǹfa é fḭ́ḭ́ a nɛ̀ùti. Kà Píyɛ́ɛ̀ é pa̰á̰ ò de hḭ́mpú, k'yèe Weèdi tɔntɔndikó é tuɛ̀ha è yɔ̀: Bádí a tókesàdi é tṵṵ̀na-ní n dàhàkà.

⁹ Kà Píyɛ́ɛ̀ é yɛɛ̀ni ye kódeedí mɛhɛká, óò tṵ̀na. Ò de pú tonà mìì pa̰kú-sa yòǹ bemú, ò de tonà ò dɔhú-ma. ¹⁰ Kà pá ha̰tá sósìpa cɛ̰nkú cecekú, é yíí ha̰tá dɛ́ɛ̀ku, é ta̰ntá máàti há̰ńnùdi nìpa de hɔ̰́ yɛ̀ɛ̀-di é dúú yɔtí mɛhɛká. Kà pá tɛ̀i kà ní kpetá nà ni cɔ̰́ɔ̰̀di pa yìhìka kà pá yɛ̀dì, é tṵṵ̀na cedɔ̀ɔ̀di nìcɔ̰́nì. Ye wɔ̀ni n'ɛ̀ɛ wɔ̀ni, k'yèe Weèdi tɔntɔndikó é yíí héé Píyɛ́ɛ̀.

¹¹ Ye wɔ̀ni-dà há̰ dɛɛ̀, yè de hḭn-má Píyɛ́ɛ̀ póí k'ò yɔ̀: Wɔ̀nì-dà n bantà-ma è yɔ̀ mɔ́ma-dà, Teó tɔn-má-ní o tɔntɔndikó k'ó n fḭ́hìna Hèdótì nɔ̀hi mɛhɛká nà kpákpààma Sùwífupa de kpɛ̀i mɛ̀mà é dɔdi-má n hḭ́ǹka. ¹² K'ó mahà o yàma mɛhɛká, ye wɔ̀ni é taá Màdíì hɔ̰́ɔ̰̀ta. Ò de yòǹ Ìsá̰à̰ pà tṵ́mà toò-ko Mádíkì màa-dà. Yè de hɔ̰́tà weèdɔɔ̀pa dɔ́ɔ́di-dà de peèta ta mɛhɛká, è pa̰kú weèdɔɔ̀pu. ¹³ K'ó tɛ̀ni é potá cɔ̀di, kà podeho òcɔ̰́ǹ, kà p'òò tonà Òdótì é hɛ́tá-ní é teha. ¹⁴ K'ó bantá Píyɛ́ɛ̀ boòku, k'yóò naaka sàma mɔ́ma bá ò koò pú tonà ó kpetá, k'ó cocí é taá caka tɔɔ̀pa è yɔ̀ Píyɛ́ɛ̀ péé tapaàdi há̰ńnùdi. ¹⁵ Kà p'óò tɛ̰́ná è yɔ̀: A yìhìka pú dìi-aa? Kà tà yɔ̀ bemú-dà tà wɛì-ma. Kà pà yɔ̀: Kà mɛmá-dà tɔntɔndikó mɛ̀ǹǹ ò ceí-ko-dà.

¹⁶ Ye wɔ̀ni, kà Píyɛ́ɛ̀ baà sɔ̰ncí è podì cɔ̀di. Kà pá tɛ̀ni é kpetá, óò dɛ́há k'yé pà dii sàma. ¹⁷ N'ɔ̀ɔ nɔ̀ku, k'ó pà pa̰á̰ yḭdó è yɔ̀ pá hḭn wá̰m. Ye wɔ̀ni, k'ó pà caka Teó ò dènà-ma-ní kú bookú kódeedí mɛhɛká. K'ó tuɛ̀ha è yɔ̀: Taá mà caka-nà Sàákì nà weèdɔɔ̀pa tɔɔ̀pa. Ye wɔ̀ni, k'ó tón é yɛ̀dì é ka̰há páàku tɔkú.

¹⁸ K'yé weka, k'yèe sósìpa bɔ̀ti pudì, kà pà békú pa tɔɔ̀pa Píyɛ́ɛ̀ yɛ̀ɛ̀-sa. ¹⁹ Kà Hédótì é héé kà p'óò pɛha páàti wɛǹni, pà p'óò dɛ́hà. K'ó béka ye sósìpa yè hḭmpú k'ó yɛ̀ɛ̀-nà, ye wɔ̀ni é kɔ̰́ɔ̰́ nùdi è yɔ̀ pá pà kɔ̀ù. Ye kú dàhàka, kà Hèdótì é yídá Sùdéè tempáàku é taá Sèsàdéè kpɛ́kú mɛhɛká, é tɛ̀i é pa̰á̰ daàka kàcɔ̰́kà ka bɛ́ka.

Wódo Hèdótì kṵ́mú

²⁰ Yè de hɔ̰́tà Hèdótì de pú naanà Tíì nà Sìdónì yɔtí kpɛ́ɛpá. K'yèe yɔtí nìpa é pɛ́dá nùdi é tɔn nìpa è yɔ̀ pá taá ò pèta-nà. Pà de dɛnà é dɛ́há o nahàku kpɛ̰́ǹn-dà, k'à p'òò tonà Bàdàsìtúsì, k'ó teha pa kpɛ́ɛmá, kà p'àá nɛɛ́ tɛ̀ni é dɛ́há Hèdótì è yɔ̀ pà kpɛ̀i pá tón é naaka-á-ma. Pà de cɔɔ̀hu miya̰ mìì tee-sá, pa yɔtí dití de yɛɛ̀hu-ní nà wódo kpɛ́ɛtí mɛhɛká-dà.

²¹ Kà daadí pà de dɔɔ̀-di é tɛ̀i, kà Hèdótì é báá o wóobáatí, é dìsi é kaàdi o wóokàtàda hḭ́ǹka, é cetá è cakú nìpa wɛmá. ²² Kà nìpa é dedí kpeéma è yɔ̀: Weèdi-dà wɛì, nìì dɔ. ²³ Ye wɔ̀ni ni cɔ̰́ɔ̰̀di mɛhɛká, kà Weèdi tɔntɔndikó é tɛ̀ni potá Hèdótì, kà biɔ̀ka óò dii, k'ó kpíí, mìì tee-sá ò de teháà kà p'óò cùwa è yònà Weèdi. ²⁴ Há̰kà, Weèdi wɛmá de dɔɔ̀haà è piní-ma. ²⁵ Bànàbásì nà Sɔ́dì, mɛmpa yɔ̀ɔ-má tɔmú pà de kó pa̰á̰-mu Sèdìsàdɛ́m̀ mɛhɛká, kà pá n'tóńti é tódá Ìsá̰à̰, pà de tṵ́mà toò-ko Mádíkì.