Hɔ̀dɔ́m̀pa 3

¹ Kà mɛmá-dà, mɛ̀ǹǹ yòǹ-ko Sùwífù cɔ́ǹti héé m̀mɔ́ńti-dà? Ca̰ntáma tɔhɛ̀nì nìdo m̀mɔ́ńya̰-dà? ² Ye cɔ́ǹti wɛhi-í-ma sàma pḭ̀ǹdicí wɛǹni, è yá̰á̰ Sùwífùpa-dà Weèdi cedí é kɔ̰́ɔ̰̀-ma ni wɛmá. ³ T'aá kó n'yɔ̀ m̀mɔ́ma, pa pàcɔ̰́ de pú cɔ́dí-mà Weèdi yìhìka. Ti kó n'yɔ̀ yè kó nɛɛ́ é kpaná-dà Weèdi kó n'cɔ́dí-ma? ⁴ Fɔ́ú! Ti yònà é n'yá̰á̰ è yɔ̀, bá kà nìpa wɛǹni yòǹ nuǹhetí yam̀ma, Weèdi mɛni cakú wɛbeèdi-dà, è yá̰á̰ pà wà̰tà Weèdi wɛmá mɛhɛká è yɔ̀:

Pà kó bantá-ma

è yɔ̀ a coó a wɛmá mɛhɛká.

Kà pà mɛ̀ɛ a sídáà-nà,

a kó dii-í-ma ye sídàma.

⁵ Àmá kà kpákpààma ti pa̰kú-ma hɔ̰́ hédá kà Weèdi cɔ́cɔ́ma é fodá, ti kó n'yɔ̀ ba? Ti kó n'yɔ̀ Weèdi pú cɔ́dí-dà kà nì yɔ̰́ń ti toùka? N wɛì miì nìpa wɛkúma-dà. ⁶ Fɔ́ú! Kà Weèdi pú cɔ́dí, ntɛ́ nì kó hḭmà é sída fòùku?

⁷ Há̰kà, kà n nuǹhetí-dà kó hédá kà Weèdi wɛbeèdi é dɔ̀hà é fodá-ní, é wɛkàna ni yèdi, baà há̰ tṵ́mà tee kà nìpa n kpadì è yɔ̀ n yòǹ niìsḭ̀ǹn? ⁸ Pàcɔ̰́ hɔ̰́ n'kpɛ̀i ti tèepú é ti pṵ́á̰ è yɔ̀ tḭ́ńti-dà hɔ̰́ n'cakú è yɔ̀: Tí pa̰á̰-nà kpákpààma k'yé teha kà suumá é yɛɛ̀ni. Baà tee kà ti pú kó mà pa̰ná? Ye kú yammà sànà Weèdi-dà é yɔ̰́ń pa toòka.

Òcɔ̰́ǹ pú coó Weèdi yìhìka

⁹ Ti kó mà kɔ̀ù é n'yɔ̀ badà? Tḭ́ńti mɛ̀m̀pà yòǹ-pa Sùwífùpa, ti ha̰tà-á-dà boocí tɔcí kpɛ́ɛpá Weèdi yìhìka? Fɔ́ú! N múńtà yɔ̀ɔ wekànapú-dà è yɔ̀ Sùwífùpa nà mɛ̀m̀pà pú yòǹ-pa Sùwífùpa, pa wɛǹni péé sḭ̀ḭ̀ma núǹti mɛhɛká-dà. ¹⁰ Pà wà̰tà Weèdi pɔ̀kàta mɛhɛká è yɔ̀:

Nìi kɔ́ɔ́ mɛ̀ǹǹ coó-ko Weèdi yìhìka,

bá òcɔ̰́.

¹¹ Òcɔ̰́ǹ kɔ́ɔ́ mɛ̀ǹǹ káá-ko yàma,

òcɔ̰́ǹ kɔ́ɔ́ mɛ̀ǹǹ pɛnti-kó Weèdi.

¹² Pa wɛǹni wɛ́i cɔɔ̀suukú-dà,

pa wɛǹni fédi-í-ma.

Òcɔ̰́ǹ kɔ́ɔ́ mɛ̀ǹǹ pa̰kú-ko suumá,

bá òcɔ̰́.

¹³ Pa nùka wɛmá-dà sḭ̀ǹ,

è yònà híúdi mɛ̀nì hɛ̀i-dí.

Nà pa dencí, kà pà báńtí tɔɔ̀pa.

Pa nùka wɛmá

yònà waàbíidɔtá dɔ̀ɔ̀ma-dà.

¹⁴ Pa nùka sṵ́nà nɔdàma-dà,

nà wɛmá mɛ̀mà pú naa-má.

¹⁵ Pa tàka-dà wáhi

niìkɔ̀ùpu hḭ́ǹka.

¹⁶ Kà pà yɛ̀ɛ̀-sa,

pà hɔ̰́ fíɔ́wá-ma

pà pètà-nà-sa wɛǹni pa cɔ̀ku mɛhɛká,

è té hédá yaǹcɔ̰hàma cɔ̰́ɔ̰̀di.

¹⁷ Pà pú yá̰á̰ cɔ̀ku,

pà kó yɛ̀ɛ̀-ku,

é m'péé wɛ̀ɛ̀di nà tɔɔ̀pa.

¹⁸ Pà pú káá Weèdi wantafɔ̰̀di báà cɛ̰́ma.

¹⁹ Ti há̰ yá̰á̰-ma è yɔ̀ kpɛ̰́ńtìnùka cakú-sa wɛǹni, k'èè cakú mɛ̀m̀pà kà tṵ̀n-pá kpɛ́mú-dà. Mɛma, òcɔ̰́ǹ pú kó wáńtá n'káá ò kó caka-sá é pṵ́tá o cɔ̰́ɔ̰̀di, nìku wɛǹni kó bantá-dà kú yetádi Weèdi yìhìka. ²⁰ Ye kú kpɛ́mú-dà tee, Weèdi pú kó diìda-má nìdo è yɔ̀ ò coó ni yìhìka, è yɔ̀pu kpɛ́mú ò tṵ̀nà kpɛ̰́ńtìnùka hḭ́mpú. Kpɛ̰́ńtìnùka tempú-nà sá̰à̰di nìpa-dà kà pà bahiní pa sḭ̀ḭ̀ma pà pa̰à̰-ma.

Mìì tee-sá kà nìi coó Weèdi yìhìka.

²¹ Sá̰kù-ní, Weèdi ti bɛkáà-á-ma nì hɔ̰mpú è ti kpáhìnì niìcoópa, kà kpɛ̰́ńtìnùka pú n'dúní ye mɛhɛká. Kpɛ̰́ńtìnùka pɔ̀kàhi nà Weèdi wɛtɛ̰́nápa kpɛ́hí de yè yɔ̀ɔ wɛɛ́-pu-dà. ²² Weèdi hɔ̰́ kpáhìna nìpa niìcoópa, pà tàà tḭ́ń wɔ̀ni-dà pa dandaní Sèsí-Kídísì hḭ́ǹka. Nì mɛ̀ɛ yè pa̰kú mɛ̀m̀pà kú wɛǹni-dà tàà pa dandaní Kídísì hḭ́ǹka, è yá̰á̰ ni pesá, òcɔ̰́ǹ pú ceń n'ɔ̀ɔ tɔù. ²³ Nìpa wɛǹni pa̰à̰ sḭ̀ḭ̀ma-dà, kà Weèdi mɛ̀ɛ pà mɔ̀ǹta ni wɛhimú. ²⁴ Há̰kà, Weèdi pà kpáhìnì niìcoópa fàdà-dà ni pa̰á̰suumá mɛhɛká, nà Sèsí-Kídísì mɛ̀ǹǹ pà don-kó sḭ̀ḭ̀ma mɛhɛká. ²⁵ Mɛnń-dà Weèdi kɔ̰́ɔ̰̀-ma, kà p'óò pa̰á̰ dɔ̀hàdi, k'òo hḭ̀ma é hútá é deèda mɛ̀m̀pà ò dań-pa sḭ̀ḭ̀ma. Ye kú dɔ̀hɔ̀dì bɛkú Weèdi coóma sá̰pu-dà, mɛ̀mà nɛɛ̀ é héé-ma, kà Weèdi é pa̰á̰ mùyɔ̰, nì pú yɔ̰́ń nìpa toòka sḭ̀ḭ̀ma pà de pa̰kú-ma hḭ́ǹka dekáà wɔ̀ni. ²⁶ Ye dɔ̀hɔ̀di tṵ́mà bɛkú è yɔ̀ Weèdi káà coó-ma nà yenì-ní. Nì mɛ̀ɛ kpɛ̀i é n'coó-ma, é tṵ́má hédá kà mɛ̀m̀pà dań-pa Sèsíì é n'coó.

²⁷ Yè yòǹ-mà mɛma, yècḭ́ḭ̀ tṵ́mà péé-dà ti kó nɛɛ́ wá̰káná-nà-sa kú hḭ́ǹka? Á̰à̰, ye kú yaǹya̰ kɔ́ɔ́. Baà kpɛ́mú tee? Mìì tee-sá, kpɛ̰́ńtìnùka tṵṵ̀namá koò pú héé. Mìì héé-sa, á taàa a dandaní-dà Sèsíì hḭ́ǹka. ²⁸ Tḭ́ńti yá̰á̰ è yɔ̀ Weèdi hɔ̰́ diìda nìdo è yɔ̀ ò coó, è yɔ̀pu kpɛ́mú-dà ò tàà o dandaní Sèsíì hḭ́ǹka, yè pú yòǹ ò pa̰à̰-ma kpɛ́mú-dà kpɛ̰́ńtìnùka békáà-sa wɛǹni. ²⁹ Nkɛ́ɛ̀ Weèdi yòǹ Sùwífùpa cɔ̰́ɔ̰̀di kú Weèdi-dà? Nì mɛ̀ɛ té pú yòǹ boocí tɔcí kpɛ́ɛdí-i? Mɛma kɛ̀, nì mɛ̀ɛ té yòǹ boocí tɔcí Weèdi-dà, ³⁰ è yá̰á̰ Weèdi yòǹ nìcɔ̰́-dà. Mɛní-dà kó hédá kà Sùwífùpa mɛ̀m̀pà ca̰mù-pa ní n'coó nà pa dandaní kpɛ́mú, mɛní-dà mɛ̀ɛ té kó hédá kà boocí tɔcí mɛ̀ǹcì pú ca̰mù-ci ní n'coó nà ci dandaní kpɛ́mú. ³¹ Kà ti hḭ́n mɛma, miya̰ kpɛ̀i caka è yɔ̀ kà ti káá dandaní, kpɛ̰́ńtìnùka koò pú héé yècḭ́ḭ̀-dà? Fɔ́ú! Múńdìkaà, ye kú wɔ̀ni-dà ti bɛkú-ma kà yòǹ-ma yècḭ́ḭ̀ nà mɔ́ma.