Hɔ̀dɔ́m̀pa 4

Mìì tee-sá kà Weèdi de diìda Àbààhám̀ niìcoóko.

¹ Ti kó n'yɔ̀ m̀mɔ́ma-dà ti yàdo Àbààhám̀ hḭ́ǹka? M̀mɔ́ya̰-dà ò de dɛ́tà-ma n'ɔ̀ɔ cɔ̰́ɔ̰̀di kú nɔɔ̀ti? ² K'yè yònà Weèdi de didà Àbààhám̀ niìcoóko tɔná ò de pa̰à̰-nà kpɛ́mú-dà, ò de kó nɛɛ́ fóń-ma nìpa yìhìka. Àmá ò de pú kó nɛɛ́ mà hḭn Weèdi yìhìka. ³ Ǹtɛ há̰kà pà wà̰tà-sa Weèdi pɔ̀kàta mɛhɛká: Àbààhám̀ de taà o dandaní Weèdi hḭ́ǹka-dà, nà mɛni kú kpɛ́mú mɛ̀ɛkà, kà n'ɔ́ɔ̀ dìda niìcoóko. ⁴ Kà nìi pa̰à̰ tɔmú, pà h'ɔ̰́ɔ̰̀ kɔ̰́ɔ̰́-ma mu boutí. Ye boutí pú yòǹ pa̰dí, tì yòǹ niìi-dà p'òò bàn-sá. ⁵ Kà nìi há̰ pú pa̰à̰ tɔmú mùcɔ̰́mù, àmá k'ò tàà o dandaní Weèdi mɛ̀nì hɔ̰́ diìda-dí niìsḭ̀m̀ma è yɔ̀ pà coó, nì k'óò tódá niìcoóko-dà n'ɔ̀ɔ dandaní kpɛ́mú. ⁶ Ma cɔ̰́ɔ̰̀di-dà Dàfítì de wɛɛ̀-ma. Nìdo Weèdi pú wáńtà-ko kú tɔná, é nɛɛ́ óò dìda niìcoóko, o kú wɛ̀ɛ̀di hḭ́ǹka-dà ò de wɛdà-ma, è yɔ̀:

⁷ Wɛ̀ɛ̀di-dà péé-nà

Weèdi kpíì-pa kú yetáka,

é deèda pa sḭ̀ḭ̀ma.

⁸ Wɛ̀ɛ̀di-dà péé-nà nìdo

Weèdi pú kaǹ-ko kú sḭ̀ḭ̀ma.

⁹ Ye wɛ̀ɛ̀dì péé Sùwífùpa mɛ̀m̀pà ca̰ntà-pa kpɛ́mú cɔ̰́ɔ̰̀di-dà, nkɛ́ɛ̀ nì mɛ̀ɛ té péé boocí tɔcí mɛ̀ǹcì pú ca̰ntà-ci kpɛ́mú? Ti yɔ̀ɔ wɛɛ́pu-dà è yɔ̀, Àbààhám̀ de taà o dandaní-dà Weèdi hḭ́ǹka, kà n'ɔ́ɔ̀ dìda niìcoóko nà mɛni kú kpɛ́mú. ¹⁰ Mii há̰ de pa̰à̰ wɔ̀ni m̀mɔ́ni-dà? Ò de ca̰ntà tḭ́ń wɔ̀ni-dà, nkɛ́ɛ̀ ò de mun pú ca̰ntà tḭ́ń wɔ̀ni? Ò de mun pú ca̰ntà tḭ́ń wɔ̀ni-dà. ¹¹ K'ó nɛɛ́ é ca̰ntá, Àbààhám̀ de coó-ma Weèdi yìhìka, mìì tee-sá ò de taà o dandaní ni hḭ́ǹka. Ye kú dàhàka-dà, ò nɛɛ̀ é ta̰ǹta-má ca̰ntáma yḭdó. Ye yḭdó mɛ̀ɛ de bɛkú è yɔ̀ Weèdi ò dìdà niìcoóko-dà nà dandaní ò káá-di kpɛ́mú. Ma kú bookù-dà, Àbààhám̀ kpáńtà-ma mɛ̀m̀pà kú wɛnnì tàà-pa pa dandaní Weèdi hḭ́ǹka báàa, bá kà pà pú ca̰ntà. Weèdi mɛ̀ɛ té pà dìi niìcoópa-dà. ¹² Ò mɛ̀ɛ té yòǹ mɛ̀m̀pà ca̰ntà-pa kú báàa-dà, mɛ̀m̀pà ca̰ntà-pa è pú nɛɛ̀hi pa ca̰ntáma cɔ̰́ɔ̰̀di hḭ́ǹka, àmá mɛ̀m̀pà tṵ̀nà-pa ò de hḭmpú, è káá dandaní ò de káá-di kà pá nɛɛ́ ò ca̰ntá.

Weèdi nuùhínádi péé mɛ̀m̀pà dań-pa kpɛ́mú-dà.

¹³ Weèdi de hḭ́nà Àbààhám̀ nùdi n'ɔ̀ɔ yaàbíiká-dà, è yɔ̀ pà kó wáńtá kpàa fòùku. Ye nùdì-ní, Weèdi de pú nì hḭ́nà, è yɔ̀pu kpɛ́mú-dà Àbààhám̀ de tṵnà kpɛ̰́ńtìnùka hḭ́mpú. Nì de mà hḭn, è yɔ̀pu kpɛ́mú-dà ò de taà o dandaní ni hḭ́ǹka, kà nì mɛ̀ɛ óò dìda niìcoóko. ¹⁴ K'yè yònà mɛ̀m̀pà tṵ̀n-pá kpɛ̰́ńtìnùka hḭ́mpú cɔ̰́ɔ̰̀di-dà k'ó kpàdi Weèdi hḭ́nà nùdi è yɔ̀ nì kó ti kɔ̰́ɔ̰́-sa, ye wɔ̀ni dandaní pú yòǹ yècḭ́ḭ̀-dà mɛmɛ-ɛ̀, nùdi Weèdi hḭ́nà-di mɛ̀ɛ té koò pú yòǹ yècḭ́ḭ̀ mɛmɛ-ɛ̀. ¹⁵ Há̰kà, kpɛ̰́ńtìnùka-dà yíkànì Weèdi fɔ̰́di. Kpɛ̰́ńtìnùka kɔ́ɔ́-sa, yetáma hɔ̰́ n'kɔ́ɔ́.

¹⁶ Kà mɛmá-dà, Weèdi hḭ́nà nùdi è yɔ̀ ti kó kpàa-sá, nì yè hḭ́nà mɛ̀m̀pà kó taàa-pá pa dandaní ni hḭ́ǹka kpɛ́mú-dà, k'yé teha kà ní n'yòǹ fàdà pa̰dí. Nùdi Weèdi hḭ́nà-di, mɛ̀ɛ yòǹ Àbààhám̀ yaàbíiká wɛǹni kpɛ́ɛdí-dà. Nì pú yòǹ mɛ̀m̀pà tṵ̀n-pá kpɛ̰́ńtìnùka kpɛ́ɛdí cɔ̰́ɔ̰̀di, àmá nì yòǹ nà mɛ̀m̀pà dań-pa è yònà Àbààhám̀ kpɛ́ɛdí-dà. Àbààhám̀ yòǹ ti wɛǹni báàa-dà, ¹⁷ é n'yònà pà wà̰tà-sa Weèdi pɔ̀kàta mɛhɛká è yɔ̀: M'aa hḭ́nà, k'à yòǹ boocí dɔ́ɔ́di báàa-dà. Ò yòǹ ti báàa-dà Weèdi yìhìka, mìì tee-sá ò tàà o dandaní ni hḭ́ǹka. Ye mɛní-dà yá̰hínì kpíípa, mɛní-dà mɛ̀ɛ hɔ̰́ pa̰á̰ niìya̰ nà hécí. ¹⁸ Àbààhám̀ mɛnn baà de dań-ma, n'ɛ̀ɛ̀ baà de yɔ̀ɔ ta̰ntá-mà è yɔ̀ nìì koò dá n'dań. Ò de taà o dandaní Weèdi hḭ́ǹka-dà, ye kú kpɛ́mú-dà tee ò kpáńtà-ma boocí dɔ́ɔ́di báàa, é n'yònà Weèdi d'oò cakáà-ma è yɔ̀: A yaàbíiká k'ó n'wɛhi-í-ma. ¹⁹ Weèdi d'eè n'ɔ̀ɔ̀ cakáà, k'ò káá beeká kɔ̀ta kpɛ́ɛmá-dà. Nà mɛma, o dandaní de pú bókáà, n'ɔ̀ɔ̀ baà de yá̰á̰-sà è yɔ̀ ò tɔ́sí kṵ́mú, k'òo poòo Sàdáà koò pú kó nɛɛ́ pɛdá. ²⁰ Weèdi de ò hḭ́nà-di nùdi kú bɛ́ka, ò de pú pa̰à̰ yam̀màhàka kàdɛ́ɛ́ kàdɛ́ɛ́. Múńdìkaà, o dandaní de dɔɔ̀haà é kpeka-á-ma, k'ó duntà Weèdi. ²¹ Ò de yá̰á̰-ma dɛ́dɛ́í, è yɔ̀ Weèdi káá-ma kpeèti è kó nɛɛ́ pa̰á̰, nì hḭ́nà nùdi è yɔ̀ nì kó pa̰á̰-sa. ²² Ǹtɛ mìì tee-sá kà Weèdi de ò dìda niìcoóko, n'ɔ̀ɔ dandaní kpɛ́mú. ²³ Ye wɛnɔ̀dì pà hḭ́n-dì è yɔ̀: Kà Weèdi óò dìda niìcoóko, pà pú nì wà̰tà Weèdi pɔ̀kàta mɛhɛká Àbààhám̀ kú kpɛ́mú cɔ̰́ɔ̰̀di. ²⁴ Pà nì wà̰tà ti kú kpɛ́mú-dà mɛ̀ɛ té dɛɛ̀. Dandaní ti káá-di-dà mɛ̀ɛ té kó n'tee, kà Weèdi é ti diìda niìcoópa ni yìhìka, è yá̰á̰ ti dań ni hḭ́ǹka mɛní mɛ̀nì yá̰hìnà-di kpíípa mɛhɛká, ti Teó Sèsíì. ²⁵ Weèdi hédà kà p'óò kɔ̀ù ti sḭ̀ḭ̀ma kpɛ́mú-dà, àmá kà n'ɔ́ɔ̀ yá̰hìna è kó ti kpáhìna niìcoópa ni yìhìka.