Hɔ̀dɔ́m̀pa 16

Dɔɔ̀mu

¹ N nɛ nankù-ho ti potɔ̰ɔ̰̀ɔ̰ Fèbéè-dà, k'ò yòǹ weèdɔɔ̀-nàmɔ̀ni deho Sà̰ǹkèdéè yɔtí mɛhɛká. ² N'ɔ́ɔ̀ codá sukú mìì tee-sá ò yòǹ Teó kóoó-dà. N'ɔ́ɔ̀ codá weèdɔɔ̀pa yònà é cokamá pa tɔɔ̀pa. N'ɔ́ɔ̀ tempa-nà ò kó n'kpɛ̀i-sá wɛǹni mɛhɛká, mìì tee-sá ò tempáà-nà-á-ma nìpa dɔ́ɔ́di, è mɛ̀ɛ té n tempa-nà.

³ Nɛ́ n dɔa-ho Pìdìsídì nà Àkìdásì, pà yòǹ n dehàtɔ̀pa-dà Sèsí-Kídísì tɔmú mɛhɛká. ⁴ Pà yɛdáà pa wɔ̰ǹni-dà é fḭ́hìna n kpɛ́ɛdí. N pà sɛdí-ma sàma. N cɔ̰́ɔ̰̀di há̰ pú dɛɛ, weèdɔɔ̀pa mɛ̀m̀pà pú yòǹ-pa Sùwífùpa pa hòǹhòka wɛǹni mɛ̀ɛ té pà sɛdí-ma. ⁵ Nɛ́ n dɔa-ho mɛ̀ɛtékà, weèdɔɔ̀pa mɛ̀m̀pà pèèku-pá pa hɔ̰́ɔ̰̀ta mɛhɛká. Nɛ́ dɔa-ho n dópo Èpàìnɛ́tì. Ò de yòǹ cecedó-dà Àsíì tempáàku mɛhɛká, é taàa o dandaní Kídísì hḭ́ǹka. ⁶ Nɛ́ n dɔa-ho Màdí, mɛ̀ǹǹ pɛ̰ḭ-kó o kpɛ́ɛtí dɛ́dɛ́í nɛ kpɛ́mú. ⁷ Nɛ́ n dɔa-ho Àǹdònìkúsì nà Sùníyásì. Pà yòǹ n yɛɛ̀ma-dà, kà pà de pɛ́ɛ̀ é ti kpená kódeedí mɛhɛká. Pà yòǹ Kídísì tɔntɔndipá pà kɛ̀hi-pá-dà. Pà múńtà de kɔ̰́ɔ̰̀ pa cɔ̰́ɔ̰̀di Kídísì é n fuei-í-ma. ⁸ Nɛ́ n dɔa-ho À̰m̀pìàtúsì, n dópòbɔ̀ɔ̀di mɔ́nní-dà Teó cɔ̀ku mɛhɛká. ⁹ Nɛ́ n dɔa-ho Ùdìpɛ̰́ɛ̰̀, ti nɔɔ́tɔɔ̀o Kídísì tɔmú mɛhɛká. Nɛ́ tṵ́má é n dɔa-ho n dópòbɔ̀ɔ̀di Sìtàkísì. ¹⁰ Nɛ́ n dɔa-ho Àpèdɛ́sì, mɛ̀ǹǹ bɛkáà-ko o pa̰á̰ma mɛhɛká è yɔ̀ ò yòǹ weèdɔɔ̀o mɔ́nń-dà. Nɛ́ n dɔa-ho Àdìsìtòbúdì hɔ̰́ɔ̰́tà-kpɛ́ɛpá. ¹¹ Nɛ́ n dɔa-ho Hèdòdíyɔ̰́ɔ̰̀, n yɛǹn-dà. Nɛ́ n dɔa-ho Nààsísì hɔ̰́ɔ̰́tà-kpɛ́ɛpá mɛ̀m̀pà dań-pa Teó hḭ́ǹka. ¹² Nɛ́ n dɔa-ho Tìdìfɛ́nì nà Tídìfósì, poòpa-dà kà pà pɛ̰ḭ pa kpɛ́ɛtí Teó kpɛ́mú. Nɛ́ n dɔa-ho Pɛ̀ɛ̀sídì, poòo-dà kà n ò naanà dɛ́dɛ́í, k'ò mɛ̀ɛ té deháà Teó kpɛ́mú sukú. ¹³ Nɛ́ n dɔa-ho Hùdùfísì, Teó ta̰kadà-ko. Nɛ́ n dɔa-ho o màa, n mɛ̀ɛ té dìi-kó n màa. ¹⁴ Nɛ́ n dɔa-ho Àsɛ̰̀ǹkídítì, nà Fèdèkɔ̰́ɔ̰̀, nà Hɛ̀ɛ̀mɛ́sì, nà Pàtòòbásì, nà Hɛ̀ɛ̀másì, nà ti kúcàpa nà ti potɔ̰ɔ̰̀pa mɛ̀m̀pà kú wɛnnì pà péé-nà-pa. ¹⁵ Nɛ́ n dɔa-ho Fìdòdókì nà Sùdí, é n dɔa-ho Nɛ̀ɛ̀dé n'ɔ̀ɔ potɔ̰ɔ̰̀o, é yídá Òdìm̀pásì nà mɛ̀m̀pà kú wɛnnì yòǹ-pa Weèdi kpɛ́ɛpá è pà péé-nà. ¹⁶ Nɛ́ dɔa-ho nɛ tɔɔ̀pa sukú nà yàma màcɔ̰́. Kídísì kpɛ́ɛpá hòǹhòka wɛǹni nɛ dɔń-hɔ̰.

Pɔ́dì tencí dèǹdèǹci.

¹⁷ N kúcàpa nà n potɔ̰ɔ̰̀pa-nà, n nɛ cɔɔ̀hu è yɔ̀ nɛ́ pa̰á̰ yɔkàma nà mɛ̀m̀pà tookú-pa tɔɔ̀pa. Pà bɔ̀hɔ̀ta pá yehèna weèdɔɔ̀pa-dà, nà biɔhànamá pà kɔ̰́nì-ma kà mà pú pɛ́ɛ́-nà ti nɛ kɔ̰́ɔ̰̀-ma. Nɛ́ pà nátá-nà, ¹⁸ è yá̰á̰ ye kú nìpà kú bookù-ní, pà pú dehú ti Teó Kídísì kpɛ́mú, pà dehú pa piidí kpɛ́mú-dà. Nà pa nuùnaadí, nà pa wɛpɔmpàma, pà báńtí mɛ̀m̀pà kú yàma pú wɛhi-pá-dà. ¹⁹ Nɛ́na há̰kà, nìpa wɛǹni yá̰á̰-ma nɛ you-nà-ma toòka Teó. Mií-dà mɛ̀ɛ n nadi nɛ hḭ́ǹka. Àmá, n kpɛ̀i kà nɛ́ n'káá yaǹfòùma-dà, k'yé teha kà nɛ́ m'pa̰kú suumá, é n'césí é n'yemù kpákpààma. ²⁰ Weèdi mɛ̀nì pɔ̰n-dí wɛ̀ɛ̀di pú kó yóka é pɛ̰n-pɛ̰ntá Wɛɛ̀kupá wódo nɔɔ̀ti, kà nɛ́ nɔɔ̀nà o hḭ́ǹka. Kà ti Teó Sèsíì pa̰á̰suumá é nɛ m'péé-nà.

²¹ Tìmɔ̀téè n nɔɔ́tɔɔ̀o tɔmú mɛhɛká nɛ dɔń. Dùsìyúsì, nà Sàsɔ̰́ɔ̰̀, nà Sòsìpàtɛ́ɛ̀ n yɛɛ̀ma mɛ̀ɛ té nɛ dɔń. ²² Mmí Tɛ̀ɛ̀tìyúsì, Pɔ́dì wɛì kà mɛ̀ǹǹ wà̰hu-kó ye pɔ̀kàtà, mɛ̀ɛ té nɛ kɔ̰́nì n dɔɔ̀mu nà Teó mɛ̀ǹǹ ti múnà-ko yèdi. ²³ Kàyúsì mɛ̀ɛ té nɛ dɔń. O hɔ̰́ɔ̰̀ta-dà n bátà-ma. Weèdɔɔ̀pa hòǹhòni peèku ta mɛhɛká-dà. Èdásì mɛ̀ǹǹ púsí-ko yɔtí dící kɔ́ɔ̀ta, nà ti kúcàa Kààtúsì mɛ̀ɛ té nɛ dɔń. [\v 24 Ti Teó Sèsí-Kídísì pa̰á̰suumá é nɛ m'péé-nà nɛ wɛǹni. K'yé mà n'yòǹ.]

Duntàma dèǹdèma.

²⁵ Tí duntà-nà Weèdi. Mɛní-dà káá nɔɔ̀ti, è kó nɛɛ́ hédá kà nɛ dandaní ní n'kpenì ni cɔ̀ku mɛhɛká, nà wɛnaamá n cakú-ma Sèsí-Kídísì hḭ́ǹka. Mà fohìnì Weèdi de datà-sa-dà nà dekáà, k'yè sɔ̀di. ²⁶ Àmá sá̰mà-ní, nì yè fohìnà-á-ma pópóí, kà boocí wɛǹni kó nɛɛ́ nì yá̰dá nà Weèdi wɛtɛ̰́nápa wa̰à̰haà-sa. Weèdi mɛ̀nì kɔ́ɔ́-di yɔ̀ɔmá de kɔ̰́ɔ̰̀ ye kú nùdì, è kpɛ̀i boocí wɛǹni é taàa ci dandaní ni hḭ́ǹka-dà, é nì n'you-nà toòka. ²⁷ Weèdi cɔ̰́ɔ̰̀di-dà káá yaǹfòùma. Tí nì dùǹtà-nà k'yé n'kɔ́ɔ́ yɔ̀ɔmá. Tí nì dùǹtà nà Sèsí-Kídísì kpɛ́mú. K'yé mà n'yòǹ.