Hɔ̀dɔ́m̀pa 15

Ti pa̰á̰ma ní n'tempú-nà tɔɔ̀pa.

¹ Tḭ́ńti mɛ̀m̀pà kú dandaní kpenì-pa, ti yònà é n'toó-ma mɛ̀m̀pà kú dandaní pú kpenì-pa sɔ̰̀ǹti. Ti pú yònà é m'pɛnti mìì kó ti n'nadi-sá. ² Bá ti mɛ̀ǹǹ dɛ̀ɛ̀-ko é m'pɛnti ò kó pa̰á̰-sa k'yé n'nadi tɔɔ̀o, óò tɛɛ̀-ní suumá, óò tempa-nà k'òo dandaní é kpɛ̰́ń. ³ Kídísì mɔ́nń de pú pɛháà ò naanà-sa. Múńdìkaà, pà wà̰tà Weèdi pɔ̀kàta mɛhɛká è yɔ̀: Cɔ̀ka p'àà tèù-ka, tón é dɔdi n hḭ́ǹka-dà. ⁴ Há̰kà, pà wà̰haà-sa wɛǹni nà dekáà wɔ̀ni Weèdi pɔ̀kàta mɛhɛká, p'èè wà̰haà è kpɛ̀i é biɔhàna tḭ́ńti-dà k'yé teha kà tí n'káá daḿma. Ye pà wà̰haà-sa mɛ̀ɛ ti kɔ̰́nì mùyɔ̰-dà, nà yɔ́dàma. ⁵ Weèdi mɛ̀nì yòǹ-di mùyɔ̰ nà yɔ́dàma yudí, é hédá kà nɛ́ n'fòù è you nɛ tɔɔ̀pa hḭ́mpú, é n'tṵ̀n Sèsí-Kídísì fòùmu. ⁶ Ye wɔ̀ni, nɛ wɛǹni, nà yàma màcɔ̰́ nà nùdi nìcɔ̰́, kà nɛ́ fa̰nta Weèdi, ti Teó Sèsí-Kídísì Báàa.

Weèdi wɛnaamá yòǹ boocí wɛǹni kpɛ́ɛmá-dà.

⁷ Ye kú kpɛ́mú, nɛ́ n'coní nɛ tɔɔ̀pa sukú, é n'yònà Kídísì nɛ codà-ma kú bookú. Nɛ́ n'hɔ̰n mɛma kà Weèdi yèdi é wɛhika. ⁸ N nɛ cakú-ma, kà Weèdi wɛɛ̀-sa, nì hɔ̰́ yè pa̰á̰-ma. Ye kú kpɛ́mú-dà tee Kídísì tɛ̀ni-má-ní é hḭn Sùwífùpa deho, è kó pa̰á̰ niìya̰ Weèdi de hḭ́nà nùdi pa yààpa è yɔ̀ nì kó pa̰á̰-sa. ⁹ Ò mɛ̀ɛ tɛ̀ni, è kpɛ̀i kà mɛ̀m̀pà pú yòǹ-pa Sùwífùpa-dà é duntà Weèdi nà ni pa̰á̰suumá kpɛ́mú, é n'yònà pà wà̰tà Weèdi pɔ̀kàta mɛhɛká è yɔ̀pu. Pà wà̰tà è yɔ̀:

N k'áa duntà-á-ma

boocí wɛǹni mɛhɛká,

é deèn a yèdi wɛhimú sá̰á̰pu.

¹⁰ Pà tṵ́mà wà̰tà Weèdi pɔ̀kàta mɛhɛká è yɔ̀:

Heèka boocí-nà,

dii-nà yaǹnaakú nà Weèdi nìku.

¹¹ Pà tṵ́mà wà̰tà é tuɛhɛ̀na è yɔ̀:

Teǹka nìku wɛǹni,

duntà-nà Bateó,

boocí wɛǹni é deèn

o wɛhimú sá̰á̰pu.

¹² Èsàyíì mɛ̀ɛ té de wɛdà è yɔ̀:

Pà kó pɛdá Sɛ̀séè yaàbíidí nìcɔ̰́nì,

kà ní yídá-ní é wódí heèka boocí hḭ́ǹka,

k'yèe boocí é taàa ci daḿma ni hḭ́ǹka.

¹³ Weèdi mɛ̀nì pɔ̰n-dí daḿma, é nɛ pa̰a̰ yaǹnaakú nà wɛ̀ɛ̀di sàma, nà dandaní nɛ káá-di ni hḭ́ǹka kpɛ́mú. Mɛma, nɛ daḿma kó dɔ̀hà é wɛhika-á-ma nà Weèdi Sèdi kpeèti kpɛ́mú.

Mìì tee-sá kà Pɔ́dì é pà wà̰hà mɛma.

¹⁴ N kúcàpa nà n potɔ̰ɔ̰̀pa-nà, n yá̰á̰-ma sukú è yɔ̀ nɛ káá nììma. Nɛ yá̰á̰-ma nɛ yònà é yá̰dá-sa wɛǹni, nɛ mɛ̀ɛ kó nɛɛ́-dà é teń nɛ tɔɔ̀pa. ¹⁵ Nà mɛma, n wa̰hàma màcɔ̰́ ye pɔ̀kàtà mɛntà kú mɛhɛká, n mà nɛ wa̰à̰haà nà kṵnnɔ̀ǹfa fàcɔ̰́fà-dà, è kpɛ̀i é heǹta nɛ yam̀màhàka niìya̰ nɛ yá̰á̰-sa hḭ́ǹka. N mà hḭn, è yɔ̀pu kpɛ́mú-dà Weèdi n pa̰à̰ pa̰á̰suumá, ¹⁶ kà n yòǹ Sèsí-Kídísì deho mɛ̀m̀pà pú yòǹ-pa Sùwífùpa kpɛ́mú. N pa̰kú dehèmu mɛ̀mù yòǹ-pu ni kpɛ́mú-dà, è cakú ni wɛnaamá mɛ̀m̀pà pú yòǹ-pa Sùwífùpa, è kpɛ̀i pá hḭn dɔ̀hɔ̀di suudí Weèdi yìhìka. Weèdi Sèdi-dà mɛ̀ɛ nì sukànì Weèdi yìhìka. ¹⁷ Yè yòǹ-mà mɛma, nà múnáma n káá-ma nà Sèsí-Kídísì, yè kó nɛɛ́ nà n nadi-í-ma, nà tɔmú n pa̰kú-pu Weèdi kpɛ́mú. ¹⁸ Kà n mɛ̀ɛ potà kṵnnɔ̀ǹfa è kó wɛdá yècḭ́ḭ̀ kú hḭ́ǹka, yè kó n'yòǹ Kídísì yɛ̀ɛ̀ nà mmí é pa̰à̰-sa-dà sá̰à̰di. Ò yɛ̀ɛ̀ nà mmí-dà, é tɛɛ̀ní mɛ̀m̀pà pú yòǹ-pa Sùwífùpa Weèdi pesá kà pà nì you-nà toòka. N wɛmá nà n pa̰á̰ma-dà ò mɛ̀ɛ de dehú-nà-ma. ¹⁹ Ò de tṵ́mà hɔ̰n mɛma, nà kpeèti Weèdi Sèdi de bɛkú-ti-dà, è pa̰kú pɔ́ńtápa̰á̰ma nà pɔ́ńtáyḭḭ́pa. É tódá Sèdìsàdɛ́m̀ háá nà Ìdìdíì tempáàku, n cakáà-á-ma dɛ́dɛ́í Kídísì wɛnaamá. ²⁰ N de bɔhàta ń caka wɛnaamá, bɛ̀m̀bɛ̀ka pà de mun pú yá̰dà-ka kú mɛhɛká cɔ̰́ɔ̰̀di-dà Kídísì yèdi. N de hḭn mɛma, mìì tee-sá n de pú kpɛ̀i é cetá n tɔmú tɔɔ̀o deháà-sa è yɔ̀ɔ. ²¹ N de tṵnà pà wà̰tà-sa-dà Weèdi pɔ̀kàta mɛhɛká è yɔ̀:

Pà de mun pú cakáà-pa o wɛmá,

k'óò dɛ́há-ma,

mɛ̀m̀pà mɛ̀ɛ de mun pú yeèkaà-pa yècḭ́ḭ̀ o hḭ́ǹka,

pà kó yekà-á-ma sukú.

Pɔ́dì wɛì o cà̰ǹku taáma Hɔ̀dɔ́m̀.

²² Mií-dà n kpanà cɛ̰má dɔ́ɔ́di n kó tɛ̀i-má-hɔ̰ nɛ hɔ̰́ɔ̰́hí. ²³ Àmá sá̰mà-ní, n koò pú kaá-nà tɔmú ka bɛ́ka. Yè yɔ̀ɔ beeká dɔ́ɔ́di, nà n kpɛ̀i-má é tɛ̀i-ho nɛ hɔ̰́ɔ̰́hí. ²⁴ N kpɛ̀i é tɛ̀ni é nɛ dɛ́há-ma, é nɛ pa̰á̰-nà daàka cɛ̰́ma, é kɔ̀ù níkú mɛ̀ǹkù n káá-ku è yɔ̀ ń nɛ dɛ́há, é nɛɛ́ taá Ɛ̀sìpáńyì teǹka. N mɛ̀ɛ dań-ma nɛ hḭ́ǹka è yɔ̀ nɛ kó n tempa-nà, ká n tadí ye heedì mɛhɛká. ²⁵ Àmá sá̰mà munkáà, n káà kɔ́dí Sèdìsàdɛ́m̀-dà, è kó taá tempa-nà Weèdi nìpa dehèmu mɛhɛká. ²⁶ Màsèdɔ́nì nà Àkàyíì tempáàti weèdɔɔ̀pa-dà ta̰kadà è yɔ̀ pà kó tɔ́hɔka dící, é tempanà Sèdìsàdɛ́m̀ weèdɔɔ̀pa mɛ̀m̀pà yòǹ-pa pɛ́íhí. ²⁷ Pa mɔ́m-mɔ́mpá-dà de ta̰kadà è yɔ̀ pà kó pà tempa-nà. Àmá mɔ́masí hḭ́ǹka, pà de yònà é mà hḭn-ń-ma, è yá̰á̰ Sùwífùpa mɛ̀m̀pà de kpáńtà-pa weèdɔɔ̀pa-dà de pà tempáà-nà, mɛmpá mɛ̀m̀pà pú yòǹ-pa Sùwífùpa kà pá dɛ́tá Weèdi cɔ̀ku kááma. Ye kú kpɛ́mú-dà tee, pà mɛ̀ɛ té de yònà-ma é pà tempa-nà nà pà káá-sa. ²⁸ N kó tíká pà kó tɔ́hɔka-sá-dà, éè kɔ̰́ɔ̰́ pà kpɛ̀i é tempa-nà-pa. Kà n yɔ̀ɔ miya̰, kà n ní n'kɔ́dí Ɛ̀sìpáńyì teǹka, é cɛ̰tá-ho nɛ hɔ̰́ɔ̰́hí. ²⁹ N mɛ̀ɛ yá̰á̰-ma è yɔ̀ n kó tɛ̀i tḭ́ń daadí nɛ hɔ̰́ɔ̰́hí, n kó ta̰ntá-ho nà Kídísì kónáma sàma-dà.

³⁰ N kúcàpa nà n potɔ̰ɔ̰̀pa-nà, n nɛ cɔɔ̀hu-ú-ma nà ti Teó Sèsí-Kídísì yèdi, é yídá nà dɔ́kàma Weèdi Sèdi kɔ̰́nì-ma, è yɔ̀ nɛ́ n tempa-nà mɔ̀di mɛhɛká, é n'dɔń Weèdi n kpɛ́mú. ³¹ Nɛ́ n'dɔń Weèdi kà n dá dɔdi Sùdéè yam̀ma mɛ̀m̀pà pú dań-pa Kídísì hḭ́ǹka nɔ̀hi mɛhɛká. Nɛ́ n'dɔń Weèdi, k'yé teha kà Sèdìsàdɛ́m̀ weèdɔɔ̀pa é ta̰ǹta nà yàma màcɔ̰́, pa̰dí n pà toó-di-ho. ³² Mɛma, n kó ta̰ntá-ho nɛ hɔ̰́ɔ̰́hí nà yaǹnaakú-dà kà Weèdi kpɛ̀i, ye wɔ̀ni é muhipa cɛ̰́ma nɛ cɔhɔ̀ka. ³³ Weèdi mɛ̀nì pɔ̰n-dí wɛ̀ɛ̀di é nɛ m'péé-nà nɛ wɛǹni. K'yé mà n'yòǹ.