27
Ishak Iainisi arihoni Upuri na Irui Iake Osi Yakub
1 Ishak ikore-korei iamtuai. Matai usena raputiso nea. Reiso taue isa ioi Esau, anai hanaie manaonete. Iahata, “Esau.”
Esau isana, “Oe, ama.”
2 Iahata, “Ano anei ata wani uamtuaku nea, tea! Reiso mka ukarihuru uamahai potuina tewa nea. 3 Reiso anana me henua niuna, na aeu akaohu na ahunu peni isa mai osiku. 4 Aroriki hokaya mai, oyo aapamasai ia-ia pusu sae wani we sukai rei. Roriki mai osiku na uaiki. Tiaku pokone pusi samatoro uainisi arihoni Upuri Anahatana na irui iake osia. Uainisi osia on wani uamkona asi reini.”
5 Ishak runa Esau wasoni oanamana ne, Ribka iatinu. Reiso ta Esau ihitio ieu iakaohui 6 oyo Ribka ioi Yakub. Iahata, “Yakub. Eu mai ee. Na uasau na sae isa reini wani mato uatinui. Amamu mato iasau osi kakamu. Iahata, 7 ‘Aeu na ahunu peni isa osiku mai. Apamasai ia-ia pusu sae wani we sukai rei. Na uaiku tiaku pokone samatoro uainisi arihoni Upuri Anahatana na irui iake osia. Uainisi osia on wani uamkona asi reini.’ 8 Reiso mai na atinu ia-ia runa sae wani nanie uasau osia reini. 9 Eua pani re makapanau naniaya na anini une-une honua hata ua waroni rapokotueso. Aninire na uapamasare ia-ia pusu sae wani amamu ne sukai rei. 10 Na aroriki osiki na iaiki. Iaiki tiai pokone na iainisi na Upuri Anahatana irui iake osia on waini iamkona asi reini.”
11 Ne Yakub iahata, “Ina, ano anei, tea! Kakaku mo, ne patane hunua panesi. Ne au mo, tewa. 12 Pene tutu amaku iakahuu hanaku atue na iahana ata hanaku atue nene hunua tewa, areimo uakarotai rei, tea! Reiso mka iainisi arihoni Upuri Anahatana na irui iake osiku tewa, ne mka iainisi arihoni Upuri Anahatana na irui kahatene osiku.”
13 Inai iahata, “Anaku. Pene anomu reuponu sanrei! Mka au sahoro uhana rosa rei. Reiso eu na anana sae wani uasau osia rei. Eu na anana une-uneu rai mai osiku. Pene anomu reupono.”
14 Ta sanrei oyo, Yakub ieu inana une-uneu rai osi inai. Iseka tau pusire pusi oyo iruire osi inai iapamasare. Iapamasare pusu sae wani amai ne sukai rei. 15 Iapamasare pusi oyo, inana Esau ne api honua waroni iaunuture mai numa anoe rei. Inanare osi Yakub. Oyo iausahure osi Yakub. 16 Ita inana une-une anae nene unte. Ipakei mai hanai atua runa tionai waroni hunua tewa rei. 17 Ipake pusi Yakub pusi oyo, irui muaina rai runa porotiu waroni iunare rai.
18 Yakub inanare arihoni inai oyo irorire osi amai. Hoka pani amai oyo iahata, “Ama.”
Amai isana, “Oe. Ano mo, ano seia? Ano Esau te, ano Yakub?”
19 Iahata, “Au mo, au Esau, tea! Anamu manaonete. Ama. Uhunu peni isa, uapamasai pusu sae wani aasau osiku rei. Hanu roe na aruea na ai peni wani uroriki osia reini. Ai pusiki oyo ainisi arihoni Upuri Anahatana na irui iake osiku.”
20 Iahata, “Asupui supa rapu-rapu mani rei, ama?”
Iahata, “Ama. Upumu Anahatana waini ano ainisi ainaa runai iruiki osiku.”
21 Iahata, “Reiso mai na uakahuua, ata kani titue ano mo, ano Esau?” 22 Oyo Yakub ieu ihaineke amai. Ihainekei oyo amai akahuui. Iakahuui oyo iahata, “Niomu mo, Yakub nioi. Ne hanamu atua mo, hana atu Esau!”
23 Reiso Ishak iationa Yakub tewa tau Yakub hanai atua hunua. Hunua sani Esau. Ne haineke Ishak nanie iainisi arihoni Upuri Anahatana na irui iake osiki, 24 ne iasei honu sanrei, “Titue ano mo, ano Esau?”
Iahata, “E-e. Ama. Au reini mo, au Esau, tea sahoro seia?”
25 Iahata, “Reiso rui peni reino mai na uaiki. Uai pusi oyo uainisi arihoni Upuri Anahatana na irui iake osia.”
Reiso Yakub irui muaina rai runa anggur nene sanaute mkane na ininu. 26 Iai pusi oyo iahata, “Eu mai hainekeku. Na amukiku mkane.”
27 Reiso Yakub ieu haineke amai nanie imukiki. Ne amai ioko Esau ne apia haua. Ioko sanrei oyo iainisi arihoni Upuri Anahatana na irui iake osiki. Iahata,
“Upuku Anahatana.
Anaku ne apia raini haua iaka.
Haua iaka sani hau nisi
wani ano auna nene atuhu huaya panesi.
28 Uainisi na arui uane on roe nante.
Auna ne nisiu nene atuhu panesi.
Uainisi na auna ne maneiu runa anggur nene huaya panesi naiosa.
29 Uainisi na auna niana waisa pusiso ouna manianeu tanui.
Auna sio mai otoa-otoa pusiso ohahue tanui.
Uainisi na auna nea upu momou
no kawasa mainae arihoni wanini nea upu momou.
Auna wanini nea upu momou ohahue tanuso.
Uainisi na arui kahatene osi sio wasoni nanie orui kahatene osiki.
Uainisi na arui iake osi sio wasoni nanie orui iake osiki.
Esau Iainisi Arihoni Amai na Amai Iainisi arihoni Upuri Anahatana na Irui Iake Osiki
30 Ishak iainisi arihoni Upuri Anahatana na irui iake osi Yakub pusi oyo Yakub ihokai arihoni amai. Mata huni tewa oyo Esau ihokai on pani wesie. 31 Ia iae irie peni rei iake oyo iroriki osi amai. Iahata, “Hanu roe nea ama. Aruea na ai we muaina waroni urorire osia reini. Ai na ainisi arihoni Upuri Anahatana na irui iake osiku.”
32 “Ano seia reini?”
Iahata, “Au ama. Au mo, anamu hanaie manaonete, tea?”
33 Ishak isira reiso ikana-kananunu. Ikananunu oyo iasei, “Ano rei sahoro ia seia waini sinasi irori peni osiku rei? Au uaire nea on anunia tewasi rei! Reiso au uainisi arihoni Upuri Anahatana na irui iake osiki nea. We mainisie reimo, we mainisie nanie haineke umataku. Reiso we mainisie rei osi ruai runa nea upu nea momou rotu-tu ria supani.”
34 Esau iatinu sanrei oyo irani nioi mainae. Irani iatamisi rotu-tu ipesi rau ruai. Oyo iasau, “Ama. Ainisi osi au reini oi. Ama.”
35 Iahata, “Wanimu sinasi ihokai mai iakarotaku. Uainisi arihoni Upuri Anahatana na irui iake osiki. Aikee nanie uainisi osi ano sanrei, ne ia mai inanare nea. Reiso uruire osiki nea.”
36 Esau iahata, “Areini mo, nai ua nea. Waniku iakarotaku. Reiso nanai panuhui. Inana we kawasa manaonete nea. Ita inana mainisie wani mka osiku rei. Ama ano me mainisie tamene isa tewa nea?”a
37 Iahata, “Uainisi na iuna mainae inesi ano. Uainisi na nea kakau nea waniu ouna manianeu tanui. Au iae uainisi na Upuri Anahatana iuna ne nisi nene manei huaya panesi, nene anggur huaya panesi. Reiso mka urui sae osia oi, ama?”
38 Esau iainisi arihoni amai sirinia. Iasei, “Ama. Ano me mainisie osa rei mani si? Ainisi na Upuri Anahatana irui iake osi au oi ama!” Iainisi sanrei ne irani sirinia.
39 Reiso amai iasau sanrei,
“Uane on roe nante osia tewa.
Me nisiu nene huaya panesi tewa.
40 Ano mo, mka amahaia ahita runa me nisau mani.
Ahita runa me tunue mani.
Mka auna maniane tau wanimu.
Ne masike sanrei iae mka ano ahanamata atinu tanui.
Ano mka arumaya arihoni ne kawasa sani koropou
wani sio okanihoo tionai erenosui
oyo ererumai arihoni upue ne kawasa.”
Ishak Iaisosi Yakub Irumai Pani Etei Laban
41 Reiso Esau ipenei tau wanini nea. Tau sae? Amai iainisi na Upuri Anahatana irui iake osi wanini. Irui osi Esau ruai tewa. Reiso Esau iasau pani anoi sanrei, “Potuina tewa nea oyo mka amaku imatai. Imatai oyo anoma rapunokoi. Anoma rapunokoi pusi oyo mka uhunu waniku.”
42 Ribka iatinu tau anamanae rei oyo iaisosiso na ooi Yakub. Iahata, “Mai na atinu anamanae reini ee. Kakamu ipenei tanua reiso nanie ihunua. 43 Reiso apusu we anamanae reini. Masi aeua rapu pani hotaku Laban waipani iruei pani nia Haran. 44 Aruea pani etemu rotu-tu potuina mkane rotu-tu kakamu ne sate rei eremanu 45 na anoi kanihue runa sae wani aunai tanui rei. Unoo ata kakamu anoi eresaa tewa nea, mka uaisosi sio umau pani, onanaya na anunia mai numa. Upeneku tau unoo we hehuka hanaia uamo omatamo tau ranie hatae osa.”
46 Reiso Ribka iasau osi sahai sanrei, “Uhanamata unoo Esau ne sio pina rakana ua rei. Upeneku tanuso. Munata Yakub iausahai mai otoe reini runa ia pina arihoni sio Het isa honu nene iake umataku nai osa.”