¹ Ishak iatinu sanrei oyo ioi Yakub. Yakub taa iooi mai mitanunue oyo Ishak iasau iahata, “Anaku. Mka Upuri Anahatana ikata runaya. Reiso mai na arue na uasau na sae isa reini ee. Pene anana ia iki pina isa arihoni sio Het mai Kanaan reini. ² Aeua pani otoe Mesopotamia pani momomu Betuel na ausahaya runa etemu anai pina isa. ³ Uainisi na Anahatana waini ne kawasa erenesi pusire irui iake osi ano runa sahamu na irui me hehuka mea upu mea momou panesi. Ano mka auna numa upue tau sio niana panesi. ⁴ Uainisi na Upuri Anahatana irui iake osia runa mea upu mea momou sani Upuri Anahatana irui iake osi momomu Abraham rei. Uainisi na arue mai otoe wani aruea tanui reini wani Anahatana iruiki osi momomu Abraham. Otoe reini wani irue tanui reini sani ita rakana mka tuamane reini osi ruari.”

⁵ Reiso Ishak iaisosi Yakub ieui pani Mesopotamia pani etei, Laban. Laban amai tau Betuel arihoni sio Aram.

⁶ Esau iatinu ata amai iainisi na Upuri irui iake osi wanini oyo iaisosiki ieui pani otoe Mesopotamia na inina sahai isa pani rei. Isopoi na pene inana ia pina mai otoe Kanaan. ⁷ Esau ianei ata wanini ipusu inai runa amai no maunauna. Ieui pani Mesopotamia nea. ⁸ Reiso ianei ata inai runa amai uaso openeso tau sio pina Kanaan rei. ⁹ Esau ianei sanrei nea oyo, ieui pani oai Ismael. Ismael mo, momoi Abraham anai. Oyo inana oai anai pina isa waini nanai Mahalat, Nebayot hotai. Reiso inana sahai isa honu.

¹⁰ Yakub ieui iarihoni nia Bersyeba nanie ieui pani nia Haran. ¹¹ Ihokai ria otoe isa mo ranie eremanu-manu nea. Reiso ia inekei ria otoe rei. Inekei inaka unui tau hatu isa. ¹² Ineke munui naiosa oyo inekei iamnii. Ineke iamnii inoo oane isa ereoo poe tuamane rotu-tu erehokai roe nante. Inoo Upuri Anahatana ne sio maisosia on roe noiyaha osipu osaa tau oane rei. ¹³ Inoo Upuri Anahatana iooi mai nusui oyo iasau osiki, “Au sahoro Upumu Anahatana waini momomu Abraham runa amamu Ishak oanisi oainaa runaku. Mka urui tuamane wani anekea tanui reini osi mea hehuka, mea upu, mea momou . ¹⁴ Mea upu mka sio panesi sani tapuna waroni poe tuamane. Sio mka onana tuamane on ria, on nau, rotu-tu no tuamana panesi. Mka urui iake osi sio niana pusiso pusu ano runa mea upu, mea momou. ¹⁵ Anomu erepeka. Aeua sui supani mani, mka ukata runaya nanie usakaya. Mka ununi uroria mai otoe reini. Mka uarihonia tewa. Mka una sae wani utotoe osia reini.”

^16-17 Oyo Yakub imaranae. Isira reiso iasau pani anoe. Iahata, “Ira oe. Upuku Anahatana waini reini! Waini otoe reini. Ne muie reini samatoro uanei! Otoe reini reasiraku. Areini mo, Anahatana ne numa maa! Areini noiyaha nene mitanunue maa omi!”

¹⁸ Nene hanu omnanoe tau kinoke asi Yakub ihanui oyo inana hatu wani inaka unui tanui rei nanie iapuooi. Iapuooi tau hatu wani ereunaso anoo rapeka sapani na Anahatana itotoe osiki. Inana mina zaitun oyo iohui roe hatu rei. Iohui roe hatu rei na iunai osi Anahatana ruai. Hatu reimo, hatu monne. ¹⁹ Ihete otoe rei nanae tau Betel wani nene manariti Anahatana ne numa. (Naone otoe rei nene nanae Lus.) ²⁰ Oyo Yakub isopa, “Upuku Anahatana. Munata ano akata runaku runa asakaku tau arena tinai tihue reini runa arui we muaina runa apia ²¹ rotu-tu ununiku nau inaku runa amaku na iake mo, mka uainisi uainaa runaya rotu-tu ria supani. ²² Mka usama we sae mani wani aruiki osiku tau pahakiani hutusa samatoro urui pahakiani osa osia. Hatu wani uapuooi reini, mka sio oainisi oainaa runaya mai tanui.”