29
Yakub Ihokai pani Laban ne Numa
1 Yakub ieui honu rotu-tu ihokai pani otoe wani ranie eresaa. 2-3 Ihokai pani oyo isira tau inoo parike pani otoe huie rei runa sio mamsaka rompau tonu. No rompau waroni ranekeso sui parike nusue. Tonuso wasoni onapa-napa no netau umau honu nanie oruru hatu arihoni parike hahae rei. Nanie ouna no rompau rai raninu. Raninu pusi oruru hatu rei roe, ererohi parike hahae honu. Hatu reimo, hatu mainae.
4 Yakub iasei tanuso. Iahata, “Wea amau. Omi reini, omi on supa?”
Oahata, “Ami on pani nia Haran.”
5 Iahata, “Oationa Laban, Nahor momoi rei?”
Oahata, “E-e.”
6 Ita iasei honu, “Waipani sapani? Ne patane miri-mirike?”
Oahata, “E-e. Waipani ne patane mirike, tea. Io, noo pani, anai pina ia rei pani. Waini on pani irori amai ne rompau. Anai pina rei, nanai Rahel.”
7 Iahata, “Omi muna na orui mo rompau raninu tewa rei? Oruire na raninu oyo ororire ria monota na raaiso. Tewa mo, ranie waro mainae asi rei. Mka ramakaneaso. Munata onusure pani koka anoe nea, mka ramakaneaso.”
8 Oahata, “Rotu-tu pusima amanouma samatoro aruru hatu reini arihoni parike hahae. Arurui na arui mani rompau raninu.”
9 Wasoni oanamanaso asi, sira tau Rahel ihokai, irori amai ne rompau. Rahel, ia mamsaka rompau oi. 10 Taa Yakub inoo hotai Rahel ihoka runa ne rompau oyo iruru hatu rei arihoni parike hahae rei. Irurui samatoro irui Rahel ne rompau raninu. 11 Irui ne rompau raninu oyo iatipuniki oyo irani. 12 Iahata, “Hota. Au inaku mo, amamu hotai.”
Taa Rahel iatinu sanrei oyo irumai pani no numa nanie isima osi amai. Hoka pani oyo iahata, “Ama. Hotaku waini ihokai on poe otoe Kanaan.”
13 Taa Laban iatinu ata etei waini ihokai reiso irumai poe tanui. Hoka poe oyo iatipuniki imukiki. Oyo ieui ikatai pani ne numa. Ihokai pani numa oyo Yakub isima osi etei iahata, “Inaku runa amaku wasopo ia-iake. Oaisosiku mai na nanie unina we ia pina isa mai rei.”
14 Etei Laban iahata, “Titue. Ita mo, kaka wani.”
Oyo Yakub iruei mai etei ne numa hunane katemae.
Yakub Iausahai Inana Lea runa Rahel
15 Taue isa Laban iasau osi Yakub. Iahata, “Ete. Masike ioi umau tau kaka wani iae pene pakariani osiku sanrei mani. Kahurae asupu me pakariani rei nene hunonie. Ainisi ina arihoniku?”
16-17 Ne Laban ne hehuka pinau ua. Ia manaonete nanai Lea. Matai kania hele. Ne anai pina muie reimo nanai Rahel. Ia mo, ia iake tunne.
18 Yakub iaunutu anoi tau Rahel nea. Reiso iahata, “Ete. Au pakariani osia rotu-tu musum itu hete nanie unana Rahel anamu pina muie rei.”
19 Iahata, “Nene iake ano ruamu nanai. Na pene uruiki osi sio tamena nea. Reiso aruea mai rei.”
20 Oyo Yakub ipakariani rotu-tu musum itu na nanie inana Rahel. Anoi erematai pusu ia pina hehuke rei reiso iahana musum itu rai, sani onona hataya tonusa te atesa mani.
21 Ipakariani rotu-tu musum itu oyo Yakub iasau osi etei, “Ete. Musum itu raniku nea, reiso pusita iapamata sou na uama aisenema nea.”
22 Taa sanrei oyo etei iasau runa onone wani etei runa anai pina uaso mka aiseneso. Reiso oanaha runa sio noi niane anoe rei pusiki mai tau no karisaa. 23 Onana karisaa, nene mono rei etei isaa iautunu Rahel tewa ne iautunu Lea osi etei. Oyo etei ineke runai. 24 Etei iae irui Lea ne ia pina makahaie isa nanai Zilpa.
25 Nene hanu omnanoe Yakub mato ianei ata ia reimo Lea. Oyo ieui pani etei. Iahata, “Ama. Aunaku sanrei nanie taa hae? Au upakariani rotu-tu musum itu rai mo, nanie unana Rahel. Ama, akarotaku tau sae?”
26 Iahata, “Mai niane reini mo nene monne sanrei. Ia muie mo iausaha iniku kakai tewa. 27 Reiso anapa rotu-tu maisene onona itu rai raniku samatoro anana Rahel honu. Ne mka apakariani osiku musum itu honu.
28 Yakub iamanaku. Taa maisene rei nene onona itu pusire oyo amai irui Rahel osiki. 29 Amai iae irui Rahel ne ia pina makahaie isa nanai Bilha. 30 Yakub iae ineke ikata Rahel oi. Ne Yakub anoi pusiki runa Rahel arihoni Lea. Ita ipakariani musum itu honu.
Yakub Isupu ne Hehuka
31 Taa Yakub iausahai pusi oyo Upuri Anahatana inoo ata Yakub anoi pusiki runa Lea tewa. Reiso Upuri Anahatana irui Lea isusu ne Rahel mo isusu tewa. 32 Lea tinaini taua oyo iruei runa anai hanaie isa. Iahata, “Upuri Anahatana inoo we kasiane reini. Reiso mka sahaku anoi runaku oi.” Reiso ihete anai hanaie rei nanai tau Ruben. Nene manariti, “Upuri inoo we kasiane.”
33 Ita tinaini taua honu. Oyo iruei runa ia iki hanaie isa honu. Iahata, “Upuri iatinu ata au mo sahaku anoi runaku tewa reiso irui ia ikine reini osiku oi.” Reiso ihete nanai tau Simeon. Simeon nene manariti, “Upuri iatinu.”
34 Ita tinaini taua honu. Oyo iruei runa ia iki hanaie isa honu. Iahata, “Mka sahaku ikataku suiosa. Tau sae? Ususu sio iki hanaia tonu.” Reiso ihete ia ikine rei nanai tau Lewi. Nene manariti, “Sokohuu.”
35 Ita tinaini taua honu. Oyo iruei runa ia iki hanaie isa honu. Iahata, “Nene taue reini uainaa runa Upuri Anahatana.” Reiso ihete ia ikine rei nanai tau Yehuda. Nene manariti, “Ainaa runa Upuri Anahatana.” Iruei runa Yehuda oyo isusu tewa nea.