40
Yusuf Isima runa Niineu nene Manariti poe Pui
1 Oyo tau muie sio makahaia tau ia onate aia Mesir ua ouna sana tau ia ona aia rei. Sio makahaia reimo, ia isa ia mamsuhu anggur nene sanaute osi ia ona aia, ia isa isaka ikotu porotiu. 2 Ouna sana reiso ia ona aia anoi eresaa tanuso. 3 Oyo inususo pani pui anoe. Pui rei wapo ia kapitane tau sio mamsaka ia ona aia ne numa. Yusuf waini tanui oi. 4 Ia kapitane rei irui kawasa osi Yusuf na isakaso.
Uaso potuina pani pui anoe rei 5 oyo tau onone hatae isa uaso oneke oamnii. No niineu rai nene manariti osa tewa. 6 Oyo nene hanroe Yusuf ihokai mai tanuso. Inoo uaso anoo mtinta. 7 Reiso iasei tanuso, “We netau. Ranie hatae reini mo, unoo uamo anomo mtinta tau sae rei?”
8 Oahata, “Monosi uama aneke aamnii. Ia isa ianei isima runa nene manariti tewa.”
Iahata, “Anahatana mani sahoro isima runa niineu nene manariti. Masi oruni mo niineu rai roe.”
9 Ia mamsuhu anggur nene sanaute iasau, “Monosi uneke uamnii ai anggur eresapa mai uaku anoe. 10 Anggur eresapa nene sakata tonu. Nene sakata rai samatoro nene totua. Potuina tewa oyo nene kupako rarata. Oyo huaya rai munaya. 11 Tau rei ukata ia ona aia ne koinanae. Sani rei oyo unona anggur huaya rai oyo uhusire poe koinanae anoe. Uhusi pusire samatoro uruiki osiki.”
12 Yusuf iahata, “Wani sanrei. Sakata tonu raimo, onona tonu. 13 Reiso nesie onona tonu rai, mka ia ona aia ihokaya arihoni pui anoe. Iapasanaya tewa nea. Mka ihitia tau ne mamsuhu anggur honu. Mka arui koinanae osi ia ona aia sani naone rei honu. 14 Ne asupu me iake nea mo, anomu erepeka runaku. Masi aruni we masana reini osi ia onate aia na ihokaku rerihoni pui anoe reini. 15 Tewa mo, sio okimanakaku arihoni otoe wani sio Ibrani orueso. Ne mai Mesir reini mo, una masana isa tewa ne onusuku mai pui anoe.”
16 Ia mamkotu poroti rei iatinu tau ia mamsuhu anggur ne niine rei iake reiso iruni ne niine osi Yusuf oi. Iahata, “Uneke uamnii ukoku pakuna tonu taua tau porotiu. 17 Tau pakune wani on roe haha mo porotiu nitaya-nitaya osi ia ona aia. Ne manua rahoka mai raaire.”
18 Yusuf iahata, “Me niine rei wani sanrei. Pakuna tonu rai mo onona tonu. 19 Nesie onona tonu oimo ia ona aia mka iaisosiso na oroto roha unumu samatoro oakatana me patane roe hini. Oakatanai oyo manua rahoka rarutu me henate.”
20 Nene onona tonu oyo ia ona aia ne musum ereneni. Reiso iuna karisaa mainae osi sio mamsakaya. Iaisosi sanrei. Iahata, “Ohoka ia mamsuhu anggur runa ia mamkotu poroti arihoni pui anoe na ororiso mai sio mamsaka aia uao anoa.” 21 Hoka mai oyo ia mamsuhu anggur rei, ihitiki tau isuhu anggur honu. 22 Ne ia mamkotu poroti reimo, ohunui. Pusire raeu sani Yusuf iasau rei. 23 Ne ia mamsuhu anggur rei anoi erepeka runa Yusuf tewa. Anoi kanihue naiosa. Isima runa Yusuf ne masana tewa.