41
Ia Ona Aia Inekei Iamnii
1 Yusuf isima runa uaso no niineu, musum ua raniku nea oyo ia ona aia inekei iamnii. Ineke iamnii iooi nau waene wani nanae Nil nusue. 2 Sira tau inoo koropou itu rahotu on poe waene rei. Koropou rai noore kopotuena samatoro pasa-pasanisia. Rahotu oyo raai monota sui waene nusue. 3 Ita koropou itu honu rahotu. Koropou rai mo rakahanokaso. Nene unta rapunu unia. Koropou kahanokana rai, raoo mai koropou waroni pokotuena mai waene nusue. 4 Oyo koropou kahanokana rai, raai koropou pokotuena. Sani rei oyo ia ona aia ihanui.
5 Ita inekei honu. Ineke iamnii manei huaya itu waroni mtuaya nea. Nene kania rai maka-makaya. Huaya itu rai raruhu tau nene sakate osa. 6 Ita hua itu raruhu honu. Ne ramkukuso. Isia iaka tewa. Ramotoso tau ihu titie. 7 Oyo kania waroni ramkukuso rai rarono manei waroni isia iaka rai. Taa sanrei oyo ia ona aia ihanui samatoro isira ata inekei iamnii. 8 Nene omnanoe rei ia ona aia anoi ererau. Reiso ioi sio nau upua runa pakakasi upua. Oyo iruni ne niineu rai osiso. Ne ia osa-sa ianei nene manariti tewa.
9 Oyo ia mamsuhu anggur nene sanaute iasau osi ia ona aia, iahata, “Ranie hatae reini matoro uamanaku we isanae. We isanae wani usima runa Yusuf, ia makahaie, ne masana tewa. Anoku kanihue reiso usima runa ia makahaie waini ia Ibrani pani pui anoe rei ne masana tewa. 10 Naone ano akapuku tanuku runa ia mamkotu porotiu uama oyo aisosiso onusuma pani pui anoe poe ia kapitane tau sio mamsaka me numa. 11 Tau mono isa uama aneke aamnii. Uama ma niineu rai nene manariti osa tewa. 12 Ia isa rerihoni Ibrani ikatama pani rei. Ia mo ia makahaie tau ia kapitane rei. Ami aruni ma niineu rai osiki oyo isima runa nene manariti. 13 Pusire pannuhu sani iasaure rei. Ano ahiti au mai we tanei wani mataanoe honu. Ne aaisosiso ohunu ia mamkotu porotiu rei.”
14 Reiso ia ona aia iaisosiso na ohoka Yusuf arihoni pui anoe. Reiso ohokai san-sana. Yusuf ikoma ne manapesiu samatoro iausahu ne apia oyo ieui ria ia ona aia. 15 Ia ona aia iahata, “Uneke uamnii, ne ia isa ianei we niine rei nene manariti tewa. Ia isa isima osiku rerihoni ano ata ano mo, aanei asima runa niine nene manariti.”
16 Ihata, “Upuku. Au uanei tewa. Ne Anahatana sahoro irui nene manariti rai.”
17 Iahata, “Uneke uamnii uooku nau Wae Nil nusue. 18 Oyo koropou itu rahotu on poe waene anoe. Koropou raimo kopotuena runa pasa-pasanisia. Rahotu oyo raai monota nau waene nusue rei. 19 Ita koropou itu honu rahotu. Koropou raimo kahanokana. Nene unta rapunu unia. Unoo koropou kahanokana sanrei mai Mesir tewasi. 20 Koropou waroni rakahanokaso rei raai pusi koropou waroni kopotuena rai. 21 Ne koropou waroni rakahanokaso rei rakahanokaso sirinia. Oyo uhanuku. 22 Ita unekeku honu. Uneke uamnii maneiu hua itu waroni mtuaya nene isia iaka. Raruhu tau sakate osa. 23 Ita maneiu hua itu honu, maneiu raimo ramkukuso. Isia iaka tewa. Ramotoso tau ihu titie. 24 Maneiu waroni ramkukuso rai rarono maneiu waroni mtuaya rai. Uruni we niineu ua rai osi sio nau upua runa sio pakakasi upua ne ia isa ianei nene mamariti tewa.”
25 Iahata, “Upuku. Me niineu ua raimo, uare osa. Anahatana isima osia runa sae wani mka iunai. 26 Koropou itu waroni pokotuena rai runa manei waroni mtuaya, areimo musum itu. Uare nene manariti osa. 27 Ne koropou kahanokana itu waroni rahotu tau muie runa manei kani kukuta tau ihu titie, areimo musum itu honu. Tau musum itu rai, mka musum muaine tewa. 28 Sani uasau osi upuku rei, Anahatana iatuhete osia sae wani mka iunai. 29 Musum itu, muaina panesi mai Mesir pusiki. 30-31 Oyo mka musum itu, muaine tewa. Na muaina panesi mka anori kanihua. Tau sae? Musum muaine tewa mka otoe reini sio anoo mtinta. 32 Me niineu ua raimo, nene manariti Anahatana ruai iautuei na mka iunai san-sana.
33 Reiso nene iake mo, aroma ia isa waini ianei iheu iake. Ianei iaisosiso rotu-tu ne kaheute ereeu iake. Aromai oyo arui kawasa osiki na isaka otoe Mesir reini. 34-35 Kahurae ahiti mamsakaya tamena na arui kawasa osiso na oamanou maneiu umau. Oaisosi sio mamrahua rei na osama no maneiu tau pahakiani nima. Pahakiani osa osi sio mamsakaya rai osakare, pahakiani ate osi sio ruao oaire orahure. Aisosiso sanrei tau musum itu rai muaina panesi. Oyo sio mamsakaya oaunutu no pahakiani noi kotau na osakare. 36 Osakare rotu-tu musum itu muaine tewa. Mka ita mai otoe Mesir reini, oaire tau musum itu rai, na pene imata muaine.”
Ia Ona Aia Ihiti Yusuf tau Ia Mainae tau Otoe Mesir
37 Ia ona aia runa ne makahaia oatinu tau Yusuf ne anamanaya rai iake. 38 Reiso ia ona aia iasau osiso iahata, “Mka isupu ia isa iake sani Yusuf reini tewa. Ia iake tau Anahatana ne Inaha ikata runai.”
39 Reiso ia ona aia iasau osi Yusuf iahata, “Anahatana irui pusire reini osia reiso ano aanei pusire anesi ia seia mani. 40 Ano mo, mka uhitia tau ano mainae tau otoe Mesir reini. Mka sio pusiso oatinu tanua. Hasae au sahoro au mainae unesi ano.
41-42 Reiso ia ona aia inosu ne sapauu arihoni hanai nakate. Sapauu rei sio ouna siaie tanui na oationa ata ia ona aia ne sapauu. Inosui oyo inusui tau Yusuf hanai nakate. Iahata, “Runa sapauu reini uhitia na auna mainae akawasa mai otoe Mesir pusiki.”
Ita iausahu papi naue wani ohie osiki. Ita iausahu rante hunahane osiki oi. 43 Oyo irui kareta isa wani naitanane ereroriki. Kereta rei, areimo osi ia ona aia hanai wanane. Ia onate aia ne mamsakaya oeu oanaone arihoni kareta rei na oaka-akapona, “Suka arihoni arena. Suka arihoni ia ona aia hanai wanane.” Reiso ihiti Yusuf na iuna ia mainae iakawasa otoe Mesir. 44 Ia ona aia iahata, “Au mo, au aia. Munata ano amanaku tewasi, utapi ia isa iuna sae isa tewasi .” 45 Oyo ia ona aia ihete nananake Mesir isa osi Yusuf, areimo ikati nanai tau Zafnat-Paaneah. Irui ia pina isa osi Yusuf tau sahai. Ia pina rei nanai Asnat. Ia mo, ia Potifera anai pina. Potifera, ia isaka ianori runa sio Mesir no anahatana ranie wani titue tewa. Isaka poe kota Heliopolis.
46 Yusuf mato ipakariani osi ia ona aia tau ne musum hutu tonu. Reiso Yusuf ieui iarihoni ia ona aia ne numa oyo ieu sui otoe Mesir na isaka sio wasoni oamanou manei kania. 47 Tau musum itu atuhu rahua panesi. Reiso muaina panesi. 48 Maneiu rai, Yusuf iaisosiso oamanoure samatoro oaunuture sui kotau. Tau kota isa oaunutu maneiu waroni sio onanare arihoni no nisiu haineke rei. 49 Maneiu waroni oaunuture rai, panesi-panesi rotu-tu oarihoni oheu tanure. Oheure tewa nea. Tau sae? Panesi sani sisia nau nuae.
50 Musum itu muaina tewa rahoka tewasi. Musum itu muaina panesi asi. Yusuf sahai Asnat isusu ne hehuka hanaia ua nea. 51 Yusuf iahata, “Anahatana iuna anoku kanihue tau au sinsaraku runa wea enau arihoni amaku.” Reiso ihete anai hanaie manaonete nanai tau Manasye. Manasye mo, atinui sani sou Ibrani wani nene manariti anoi kanihue. 52 Ita iasau honu, “Anahatana irui we hehuka mai otoe wani au sinsaraku tanui.” Reiso ihete anai hanaie muie nanai tau Efraim. Efraim mo, atinui sani sou Ibrani wani nene manariti isusu nai ua.
53 Musum itu muaina panesi raniku nea. 54 Oyo musum itu muaina tewa. Ereeu sani Yusuf iasau rei. Sui tuniai pusiki muaina tewa. Hasae mai otoe Mesir sahoro no muaina. 55 Taa sio Mesir no muaina pusire nea oyo oainisi muaine tau ia ona aia. Oyo ia ona aia iaisosiso sanrei, “Oeu noi Yusuf. Opusu sae wani ia iasau osimo.”