¹ Yakub iatinu ata maneiu waropo otoe Mesir oyo iasau osi ne hehuka hanaia iahata, “Uatinu ata maneiu panesi waropo Mesir. Oeu poe na ohane na pene imata muaie. Omi nanie oru-ruemo oasumata umau mani taa hae?”

³ Reiso Yusuf nea kakau hutusa oeu poe ohane manei poe Mesir. ⁴ Ne Yakub irui Benyamin, Yusuf wanini rei, ieu ikataso tewa. Tau sae? Ikaitau pene rotu-tu siraka isa rekahuui.

⁵ Yakub ne hehuka runa sio panesi oeuso poe na ohane manei. Tau sae? Pani otoe Kanaan muaina tewa. ⁶ Ia waini iaheni manei osi sio tuniai reini pusiki mo Yusuf, ia mainae tau otoe Mesir. Reiso Yusuf nea kakau ohokaso mai ohahue mai tanui. ⁷ Yusuf inoo nea kakau, iationaso. Ne iakarota ata iationaso tewa. Iasei tanuso nioi makae, “Omi reini mo, omi on supa?”

Oahata, “Upuku. Ami mo, ami Kanaan. Ahokama mai, nanie ahane manei.”

⁸ Masike Yusuf iationa nea kakau iae, sio oationa ia tewa. ⁹ Anoi erepeka runa ne niine rerihoni nea kakau. Reiso iasau iahata, “Omi reini mo, omi osaka osima-sima osi mania nisau. Omi ohoka mai nanie onoo mania niane, ata kani asaka paka supa tewa.”

¹⁰ Oahata, “Tewa, upu. Ami mo, me manianeu. Ahokama mai nanie ahane manei mani. ¹¹ Ami mo, ami kaka wani. Ami mo, ami makarotana tewa. Asaka asima-sima tewa.”

¹² Iahata, “Tewa. Omi mo, oakarota! Ohokamo mai nanie onoo mani niane rei, ami asaka paka supa tewa.”

¹³ Oahata, “Upuku ami reini mo ami kaka wani hutusa rahana ua. Mania ama waipa Kanaan. Ia isa arihoni ami, imatai nea. Mania wani muie waipani ikata mania ama.”

¹⁴ “Titue sani uasau rei. Omi reini mo, omi osaka osima-sima. ¹⁵ Nanie ureamo. Usopa tau ia ona aia nanai. Munata moa wani ihokai mai tewa, omi mka oeu oarihoni otoe reini tewa. ¹⁶ Ia isa arihoni omi rei, mka inuni suru pani, inana moa wani muie rei. Omi umau onapa mai rei pani pui anoe rotu-tu onuni mai orori moa wani rei. Munata tewa, usopa tau ia ona aia nanai, omi mo, osaka osima-sima osi mania nisau!”

¹⁷ Reiso inususo pani pui anoe rotu-tu onona tonu.

¹⁸ Nene onona ua oyo Yusuf iasau osiso iahata, “Uamuira Anahatana. Mka uapuheumo hete sae ouna sani wani uasau reini. ¹⁹ Ouna sanrei na uanei ata oakarota tewa. Ia isa arihoni omi mka inusu pui. Omi umau onunimo orori maneiu waroni ohanere osi mo enau na pene omata muaie. ²⁰ Taa sanrei oyo orori mo wani muie osiku. Na uanei ata omi mo anamanaya rai titue na mka uhunumo tewa.”

Sio oamanaku tau Yusuf ne anamanaya. ²¹ Reiso oasau osi umau oahata, “Imatata. Anahatana waini iapasanata nea. Tau sae? Naone iuna rosa tau rea wani. Iainisi na pene ihunui. Ne ipeneta iatinu tanui. Masike inoo ata ia sinsarai, ipeneta iatinu tanui sirinia. Reiso muie reini siraka reini rekahuuta nea.”

²² Ruben iahata, “Hmm. Naone uasau mo, oatinu tau au tewa. Reiso rasa na rasa. Uasau ata nanie pene ipalalosa tanui. Ne oatinu tau au tewa. Reiso muie reini ne nasi wani reasei tanuta.”

²³ Sio oahata Yusuf ianei no sou tewa. Tau sae? Sinasi oanamana osi Yusuf tau ia isa isima runa no anamanaya tau ruao no sou. Reiso sio oahata kani Yusuf ianei no sou tewa. Aikee ianei. ²⁴ Yusuf iatinu Ruben iasau sanrei anoi runai reiso iuni ikusa matai waena. Iapamese anoi oyo iuni ianamana osiso honu. Iaisosiso onana Simeon iarihoniso na okanihooi. Reiso okanihooi noi nea kakau nea waniu uao anoa.

²⁵ Taa sanrei oyo Yusuf iaisosi ne makahaia iahata, “Oaiinu no maneiu tau no karuni. No kepeni rai, oaiinure noi no karuni anoa. Orui no wekau na oaire sui arena.” Ia ne anamanaya rai, opusure. ²⁶ Reiso nea kakau oapusaa no muaina rai roe keledaiu totua. (Keledai nooi sani naitanane ne ikine.) Oapusaare oyo onuniso.

²⁷ Nanie onekeso pani arena tinai tihue, ia isa ihuka ne karuni nanie ipana ne keledai. Ihukai oyo sira tau isupu ne kepeni rai roe karuni anoe. ²⁸ “Ira! Masi oeu mai! Au we kepeni waroni maa! Waroni mai we karuni hahae.”

Anoo rarau okaitau hunu ruao oyo oasei tau umau, “Sae wani Anahatana iunai tanuta reini?”

²⁹ Yusuf nea kakau ohokaso pani noa ama pani otoe Kanaan. Ohoka pani, oruni runa sae wani ia ona mainae tau otoe Mesir iunaso. Oasau oahata, ³⁰ “Ama. Ia ona mainae waini ne kawasa tau otoe Mesir ianamana makae tanuma. Iahata, ‘Omi mo, omi osaka osima-sima runa mai otoe reini.’ ³¹ Ne ami asau osiki ata, ‘Upu. Ami mo, ami iaka. Asaka asima-sima tewa. Ami mo, ami makarotana tewa. ³² Ami kaka wani pusima, ami hutusa rahana ua. Ami pusima arihoni mani ama osa. Ia osa imatai nea. Ia muie mo waipani ikata mani ama pani Kanaan.’ ³³ Iahata, ‘Nanie ureamo ata kani omi makarotana te tewa. Ia isa arihoni omi reini pusimo mka inapa mai rei. Omi umau onunimo. Onunimo orori manei osi mo enau wasoni omata muaine. ³⁴ Rotu-tu orori moa wani muie samatoro uanei ata omi mo, osaka osima-sima tewa. Na omi mo oakarota tewa. Ororiki samatoro uhoka moa wani moa kaka reini osimo. Na oruemo mai otoe reini, mo suka oaheni ohane.’”

³⁵ Reiso ohuka karuni oyo osuhu maneiu rai. Osuhure arihoni karuni samatoro sira tau onoo no kepeni rai. Osupu no kepeni pani nene naniaya anoa. Onoore oyo okaitau hunu ruao. Noa ama iae ikaitau oi. ³⁶ Reiso noa ama iasau, “Yusuf waini tewa nea. Simeon waini tewa nea. Ita nanie orori Benyamin honu? Mka orori we hehuka pusiso oarihoniku. Pusimo oheta tanuku.”

³⁷ Oyo Ruben iasau osi amai iahata, “Arui Benyamin osiku ee, ama. Mka ununi roriki osia. Munata ununi roriki osia tewa mo, asaka ahunu we hehuka hanaiya uaso.”

³⁸ Iahata, “Au upeneku asi! Benyamin mo, pene ororiki. Kakai imatai nea. Nesie ia ruai sahoro waini ikataku. Pene rotu-tu isupu siraka sui arena tinai tihue. Au reini mo, ukore-koreku nea. We kasiana waroni ounare reini mka raunaku umataku.”