43
Yusuf Nea Kakau Oeuso Poe Mesir Okata Benyamin
1 Muaine pani otoe Kanaan tewa nea. 2 Tau muaina waroni Yusuf nea kakau ororire on poe Mesir rei pusire nea. Oyo Yakub iasau osiso, iahata, “We hehuka. Masi oeu poe Mesir honu na ohane re maneiu umau osita honu.”
3 Ne Yehuda iasau osi amai, iahata, “Ama. Ia mainae poe otoe Mesir iasau osima, iahata, ‘Ainati. Munata orori moa wani mai osiku tewa mo, pene oeu mai tanuku nea.’ 4 Reiso munata arui mania wani na ikatama, mka aeuma poe, ahane manei. 5 Ne munata arui mania wani na ikatama tewa mo, ami apenema aeu. Tau sae? Ia mainae rei iasau, munata mania wani ikatama tewa, pene aeuma poe tanui nea.”
6 Iahata, “Nanie oasau osi ia onate rei ata moa wani muie isa waini ikataku, nanie taa hae? Nanie ouna anoku ererau, nanie taa hae?”
7 Oahata, “Ama. Ia onate rei iasei tanuma ia-ia rerihoni ami na mania enau. Iasei, ‘Moa ama iamahaiki asi? Moa wani muie isa waimo asi?’ Asima runa wani iasei tanuma mani. Sapani na ami anei ata ia mka iaisosima arori mania wani?”
8 Reiso Yehuda iasau osi amai, iahata, “Ama. Arui ia ikine rei ipusu na masi aeuma on sini mkane. Aeuma on sini tewa, mka pusita imata muaine. 9 Au sahoro usakai. Munata ununi roriki osia tewa mo, au sahoro uhana rosa rerihonia rotu-tu ria supani. 10 Sinana ipene mo, kani aeu nai ua nea.”
11 Iahata, “Munata sanrei, mai orori sae waroni iaka mai otoe reini pani mo karuni anoa. Ororire na oatoa ia mainae tau otoe Mesir rei. Orori hau rihua, kilalanta, ai unta, kamana, kahea pukuna, runa iana umau. 12 Runa orori kepeni waroni osupure pani mo karuni anoa rai. Orori kepeni rai runa kepeni umau honu na ohane manei honu. Hitio sio oaiinu sana kepeni pani karuni anoa. 13 Orori moa wani reini na oeu on sini. Oeu poe ia onate rei.” 14 Oyo Yakub iainisi sanrei, “Upuku Anahatana. Ano mo, me kawasa mainae erenesi pusire. Masi auna ia mainae tau otoe Mesir rei anoi runa we hehuka reini. Masi auna ia mainae rei na ihoka Simeon na onuni roriki runa Benyamin uaso. Ne munata au reini, we hehuka nanie tihoniso arihoniku, kani uasau sapani?”
15 Reiso Yusuf nea kakau orori atoana rai. Atoa hau rihua, kilalanta, iana rai. Orori kepeni waroni osupure pani karuni anoa rai. Orori kepeni umau honu na ohane manei honu. Oyo oeu poe otoe Mesir okata Benyamin. Hoka poe oyo oooso mai Yusuf uai anoe. 16 Taa Yusuf inoo Benyamin runa nea kakau oyo iasau osi ne makahaie waini ia mainae tau ne numa. Iahata, “Rori sio reini mai we numa. Ahutu makapana isa na nana muaine. Sio reini mka-mka oai ranie katopu runaku.”
17 Ia makahaie rei iuna sae wani Yusuf iaisosiki. Oyo irori Yusuf nea kakau runa wanini rei pani Yusuf ne numa.
18 Iroriso pani Yusuf ne numa, ne sio okaitau. Reiso oasau pani anoo, “Sio ororita mai reini, noso kepeni waroni ita inuni rorire pani karuni anoa waroni mataanoe ihokata mai ihane manei, tea? Nanie osotata samatoro onana re keledaiu oyo ounata tau no manianeu?’ 19 Reiso ohoka haineke Yusuf ne numa nene mitanunue oyo oasau osi ia makahaie rei, 20 “Upu. Ahokama mai taue isa nea ahane muaine. 21-22 Ne anunima oyo ahokama pani arena tinai tihue pannuhu mono nea reiso nanie anekema. Ahuka mania karuni rai anoo kepeni pusire uture waroni asenu maneiu rai waropa karuni anoa. Kepeni pani karuni anoa rai pusire pannuhu. Aanei tewa ia seia sahoro inusure pani karuni anoa rai. Ne ahokama reini nanie aunire osia. Aunire runa arori kepeni umau oi nanie ahane manei honu.”
23 Iahata, “Iake. Pene okaitau. Pene anomo rauponu. Anahatana wani moa ama runa omi oainisi oainaa runai kani inusu kepeni rai pani mo karuni anoa. Ne uararuma kepeni waroni osenu manei tanure nea.” Oyo ohoka Simeon osiso.
24 Ohokai osiso oyo okatai mai numa anoe. Irui tihu osiso na osohu aio atua. Irui muaine osiso na opana no keledaiu. 25 Taa sanrei oyo oseka tau no atoana osi Yusuf. Oseka tanure na oruire osi Yusuf. Mka ihokai tau ranie katopu. Tau sae? Sio osima osiso ata mka iai ikataso. 26 Taa Yusuf ihokai mai numa, oyo nea kakau orui no atoana rai osiki. Oruire ohahue tanui. 27 Oyo Yusuf iasei tanuso. Iahata, “Omi sapani? Naone oruni osiku rerihoni moa ama waini ikore-korei nea rei. Sapani runa moa ama rei? Waipani iake?”
28 Oahata, “Upu. Me manorine, mania ama waipa iake.” Ita ohahue honu nanie oamuirai.
29 Taa Yusuf inoo wanini, Benyamin, iahata, “Moa wani muie reini si? Ia waini oasau runai osiku reisi? Anaku. Uainisi na Anahatana irui iake osia.”
30 Oyo Yusuf anoi runa wanini. Iahana anoi kasiane nanie irani. Reiso ihoka san-sana iarihoni nea kakau runa wanini rei oyo inusui pani kakaranae anoe na irani. 31 Irani pusi oyo iauneu uai anoe oyo ihokai honu. Iapamese anoi na pene irani. Oyo iaisosiso onata muaina.
32 Yusuf iaiki tau ruai ne meya isa. Nea kakau runa wanini oaiso tau meya tamene isa oi. Sio Mesir wasomo rei oaiso tau meya tamene isa oi. Tau sae? Sio Mesir oai okata sio Ibrani mo, monne. Omasikikiso. 33 Yusuf ne meya runa nea kakau runa wanini no meya ramanane umau. Nea kakau runa wanini orue pusu no musum on ia iki manonete rotu ia muie. Taa onoo sanrei, oyo oasumata umau, osira. Oasei tau umau oahata, “Ira oe. Sapani na ianei ia seia sahoro ia manaonete, ia seia sahoro ia autihue, ia seia sahoro ia muie? 34 Orui muaine osiso arihoni Yusuf ne meya. Nea kakau osupu no pahakiani osa mani. Ne Benyamin isupu ne pahakiani nima. Oyo pusiso oai okata Yusuf rotu-tu tiao pokona.