¹ Oyo Yusuf iaisosi ne ia mamsaka numa rei iahata, “Aiinu sio reini no karuni tau manei rotu-tu taua. (Manei, nooi sani ana.) Aiinure rotu-tu haineke orori kuare tewa nea. Aiinu sana osa-osa no kepeni rai pani no karuni anoa rai roe manei hahae.

² Anusu we koinanae rei oi pani ia muie rei ne karuni anoe. We koinanae wani marainie rei. Wani sio onanai rerihoni perak. Anusui erekata ne kepeni waroni manei hunonie.”

Ia mamsaka numa rei iuna sani sae wani Yusuf iaisosiki.

³ Nene hanu omnano tun-tunne Yusuf nea kakau runa wanini oeu oarihoniki nanie onuniso pani noa ama pani Kanaan runa no keledaiu. (Keledai, nooi sani naitanane ne ikine.) ⁴ Matoro ohoka oarihoni kota rei hainau tewasi oimo Yusuf iaisosi ne ia mamsaka numa rei iahata, “Eu rapu apusu sio rei. Munata asupuso nea, asau osiso ahata ita iuna iake osiso, ne sio nanie ouna kahatene tanuta taa hae? ⁵ Nanie okimanaka we koinanae tau sae? Koinanae rei mo, upake tau uninu runa una nau tanui. Sio ouna kahatene mainae!’”

⁶ Reiso ia mamsaka numa rei ieu ipususo rotu-tu isupuso. Isupuso oyo iasau iahata, “Auna iake osimo, ne omi nanie ouna kahatene tanuma sanrei, nanie taa hae? Nanie okimanaka upuku ne koinanae, nanie taa hae? Koinanae rei mo ipake tau ininu runa iuna nau tanui. Omi ouna kahatene mainae sanrei, nanie taa hae?”

⁷ Oahata, “Asau runa me sae reini? Ami anei koinanae rei tewa. Ananai tewa. ⁸ Ruamu anei ata kepeni waroni asupure pani mani karuni anoa roe manei hahaya rai iae, anuni on pani Kanaan arorire osia nea rei, tea? Reiso akimanaka perak te hunahane te poe ia mainae ne numa rei tewa. ⁹ Mania neta. Munata koinanae rei asupui arihoni ami reini ia isa masike apasanai rotu-tu imatai runa ami mka auna manianeu osia.”

¹⁰ Iahata, “Iake. Ne hasae ia waini koinanae rei usupui noi tanui, mka ia sahoro iuna we maniane. Omi umau mka onunimo.”

¹¹ Reiso mata huni tewa oyo sana osa-osa irati ne karuni oyo ihukai. ¹² Oyo ia mamsaka numa rei iarinii sana osa-osa ne karuni arihoni on ia manaonete ne karuni rotu-tu ia muie ne karuni, oyo sira tau isupu koinanae rei. ¹³ Anoo rarau rotu-tu okiha no apia noi no patana. Oyo oapusaa no maneiu rai roe keledai totua unia. Oapusaare oyo onuniso poe kota honu.

¹⁴ Ohokaso poe, Yusuf waipo numa asi. Ohoka poe oyo ohahue mai tanui. ¹⁵ Oyo Yusuf iasei, “Sae wani ounai reini? Oanei tewa ata ia isa sani au mka iuna nau na ianei ia seia sahoro inana koinanae rei?”

¹⁶ Yehuda iahata, “Upu. Ami mka asau mani sou sae osia? Sapani na anamana auni runa ruama. Anahatana waini iapasanama tau mani rosau waroni naone. Muie reini pusima auna maniane tanua. Pusima runa ia waini koinanae supui pani ne karuni anoe rei.”

¹⁷ Iahata, “Tewa. Upeneku. Hasae ia waini supu koinanae poe ne karuni anoe rei, sahoro iuna maniane tanuku. Omi umau onunimo pani moa ama.”

¹⁸ Yehuda ihitio ieu haineke Yusuf iahata, “Upuku nanie uanamana mkane ee. Pene akapuku tanuku. Upuku, ano mo, ano sani ia ona aia Mesir ruai. ¹⁹ Naone ano asei tanuma, ahata, ‘Omi moa ama moa wani wasomo asi?’ ²⁰ Ami on poe asau ahata, ‘Mania ama waipa ikore-korei nea. Mania wani muie rei iamrai mo, mania ama ikore-korei nea. Ia ikine rei kakai uaso orue tiake osa, imatai nea. Reiso muie reini mo, nesie ia ruai. Reiso mania ama anoi runai naiosa. ²¹ Ano aisosima aroriki mai tanua nanie anooi. ²² Ne ami on poe asau ahata, ‘Ia ikine rei mka ieu iarihoni mania ama tewa. Ieu iarihoniki mo, mka mania ama imatai.’ ²³ Ita ano on poe asau honu, ‘Munata orori mo wani muie tewa, pene ohoka mai tanuku nea.’

²⁴ Reiso ami anunima pani mania ama oyo asau runa me anamanaya rai. ²⁵ Ita mania ama iaisosima aeu mai tau ahane muaina honu. ²⁶ Ne ami asau ahata, ‘Ami mka aeu poe rei tewa. Tau sae? Munata mania wani ipusu tewa, mka anoo ia mainae rei uai anoi tewa. Mka aeu sani mania wani ieu oi oo.’

²⁷ Oyo mania ama on poe iasau, iahata, ‘Omi oanei ata sahaku, Rahel, hasae ne hehuka sio ua mani. ²⁸ Ia iki manaonete iarihoniku nea. Kani binatang seae ereaiki nea. Tau sae? Rotu-tu reini nooi tewa nea. ²⁹ Munata onana ia iki muie reini iarihoniku honu na sae isa eremunai, we kasiana waroni ounare tanuku reini, mka raunaku tau umataku. Tau sae? Ukore-koreku nea.’

^30-31 Reiso upuku munata anunima pani mania ama akata mania wani tewa mo, mka mania ama imatai. Munata ia ikine rei imatai mka mania ama imatai oi. Tau sae? Ami auna ne kasiane reiso mka imatai. ³² Utotoe osi amaku nea. Munata ununi rori ia ikine reini tewa, mo uhana rosa rotu-tu ria supani. ³³ Reiso uainisi arihonia na au sahoro una maniane tanua ukati waniku reini, ne waniku reini inuni ikata nea kakau. ³⁴ Sapani na ununiku pani amaku, waniku inuni ikataku tewa? Upeneku asi. Upeneku unoo amaku anoi repunoko ruai.”