45
Yusuf Isima Runa Ruai Osi Nea Kakau
1 Yusuf iapamese kua anoi tewa nea mai ne makahaia. Reiso iaisosiso oeu arihoniki na nanie isima runa ruai osi nea kakau runa wanini. 2 Taa ne makahaia ohokaso arihoniki oyo irani kua-kuati. Rotu-tu sio Mesir pani manahane oatinu oi. Irani kua-kuati rotu-tu sio pani ia ona aia ne numa oatinu. 3 Yusuf iasau osi nea kakau runa wanini sanrei. Iahata, “Au reini mo, au Yusuf. Rea ama iamahaiki asi?”
Nea kakau onoo sanrei oyo okaitau hunu ruao nai osa. Okaitau reiso osana tewa.
4 Yusuf on poe iasau honu, “Masi oeu mai.”
Oyo oeuso hainekei. Euso hainekei oyo iahata, “Au mo Yusuf wani omi oaheniku mai otoe Mesir. 5 Pene okaitau te, oapunoko ruamo te tau oaheniku. Areimo Anahatana ruai iroriku mai rei uanaone arihoni omi pusimo na uapuhai sio panesi. 6 Muie reini mato musum ua muaina tewa. Nesie musum nima asi sio mka orahu runa oapahia nisi tewa. 7 Anahatana sahoro iroriku uanaone arihoni omi pusimo na uapuhaimo runa mo mansiau umau na pene omata muaine na sio tuniai reini osira. 8 Anahatana sahoro iaisosiku mai rei ne omi tewa. Ia sahoro iuna au tau ia ona aia hanai wanane mai Mesir reini. Ia sahoro irui we kawasa tau ne numa reini runa Mesir pusiki.
9 Reiso onuni rapu pani amari na oasau osiki, oahata, “Anamu Yusuf iasau sanrei, ‘Anahatana iunaku we kawasa tau Mesir pusiki. Hoka rapu mai tanuku. 10 Ama, mka aruea mai otoe Gosyen haineke au. Ahokaya mai akata mea hehuka, mea momou, me rompau, me une-uneu, me koropou runa me apia pusire. 11 Munata ano wani Gosyen mka uapiaraya. Nesie musum nima muaina tewa. Reiso uapiaraya. Tewa mo, mka ano runa me hehuka, runa me makapanau omata muaine.’
12 Wea kakau. Omi ruamo onoo au reini, tea? Runa waniku Benyamin ruamu wani atinu we anamanaya raini. Titue-tue au mo, au Yusuf. 13 Asau osi amari ahata we kawasa mainae mai Mesir reini. Oruni osiki runa sae wani onooi mai rei. Na roriki mai on sini.”
14 Taa ianamana pusi oyo iatipuni wanini Benyamin oyo irani. Benyamin iae irani oi. Irani iatipuni kakai. 15 Iatipuni Benyamin pusi oyo wani irani asi, ieu iatipuni nea kakau pusiso runa imukiso. Taa sanrei oyo oanamana osi umau.
16 Sio pani ia ona aia ne numa oatinu ata Yusuf, nea kakau runa wanini ohokaso, reiso ia ona aia runa sio makahaia pusiso anoo mirika. 17 Reiso ia ona aia iasau osi Yusuf, “Aisosi mea kakau runa wanimu rei na oapatau no manei tau no karuni na oapusaare roe keledai totu hahaya na onuniso pani otoe Kanaan. 18 Onuniso pani na on pani orori moa ama runa mo mansiau. Ororiso na oeuso mai rei. Mka urui tuamane wani iake mai otoe Mesir reini osiso. Na orueso mai tuamane rei, na atanane amrahuso iake na oamahaiso. 19 Aisosiso oi na orori karetau hua inasa on mai rei osi no pina hehuka wasoni sio ikina asi. Onana moa ama na ororiki mai oi. 20 Pene anomo runa mo apia waroni oarihonire. Tau sae? Mka osupu iaka mai otoe Mesir reini. Sae waroni iaka mai otoe Mesir reini mka osiso.”
21 Yakub ne hehuka ouna sae wani ia ona aia iaisosiso ounai rei. Yusuf irui karetau sani sae wani ia ona aia iasau rei. Irui no wekau na oaire sui arena tinai tihue. 22 Irui no api honua hua osa-osa osiso. Ne irui Benyamin ne perak kilo tonu samatihue runa ne apia honua hua nima. 23 Iauwatu apia waroni iaka mai Mesir osi amai. Iapusaare roe keledaiu hata hutusa honu. Ita iauwatu manei, poroti, runa muai tamena roe keledai inaya hata hutusa nene totu hahaya. Nanie tau no wekau na oaire sui arena on pani Kanaan ereeu na poe Mesir. 24 Oyo iaisosi nea kakau runa wanini na oeuso oyo iaunauso, “Pene oatana runa umau sui arena tinai tihue.”
25 Oeu arihoni Mesir na onuniso na pani Kanaan oyo osupu noa ama Yakub. 26 Hoka pani, oyo oasau, “Ama. Yusuf waipo iamahaiki poe Mesir asi maa! Ia mo, ia iuna mainae ne kawasa tau otoe Mesir!”
Iatinu anamanaya rai noo sani iparisaa tewa. 27 Ne oruni sae waroni Yusuf iasau osiso runa oautuu runa karetau na sae waroni Yusuf iauwature osiki rei na nanie ororiki poe Mesir. Oruni mato isira. Iparisaa. 28 Iahata, “Titue si? Anaku Yusuf iamahaiki asi. Mka ueu na uno-nooi on umata tewasi reini. Hasae rei sahoro uninai.”