46
Yakub Ieui Poe Otoe Mesir Runa Ne Numa Hutae
1 Yakub iautotu ne numa samatoro ieui ikata ne numa hutae. Ieu rotu-tu ihokai poe otoe Bersyeba oyo iainisi iainaa runa Anahatana. Anahatana waini amai Ishak iainisi iainaa runai oi. Iainaa runai irehi makapana osiki. 2 Irehi makapana oyo nene pumono rei, Yakub inekei iamnii. Ineke iamnii Anahatana ianamana osiki sanrei, “Yakub, Yakub.”
Yakub on poe isana, “Oe, Upu. Upuku anamana roe. Au wani uatinu.”
3 Iahata, “Au Anahatana waini amamu iainaa runaku. Pene akaitau. Ne aeua poe otoe Mesir. Au mka una mea momou mea upu sio panesi poe Mesir. 4 Mka ukataya rotu-tu ahokaya poe Mesir. Mka ununi rori mea momou mea upu mai otoe reini honu. Mka amataya mo, Yusuf iruei mai nusumu na irohi matamu usena.”
5 Reiso nene hanu omnanoe sanrei oyo Yakub ieui iarihoni Bersyeba. Ne hehuka oapusaai roe kareta runa no pina hehuka. Pusiso osaa karetau waroni ia ona aia Mesir iauwature osiso rei. 6 Orori makapanau runa no apia waroni osupure pani Kanaan rei oi. Oyo ororire poe Mesir. Yakub on pani ieu ikata ne numa matae pusiki. 7 Areimo ne hehuka, nea momou, nea upu.
Yakub Ne Hehuka, Nea Momou, Nea Upu
8-15 Areini mo Yakub ne hehuka wasoni noa ina tau sahai Lea. Pusiso oeuso okata Yakub poe otoe Mesir.
Anai hanaie manaonete nanai Ruben.
Ruben ne hehuka hanaia wasoni nanao:
Henokh, Palu, Hezron, runa Karmi.
Simeon ne hehuka hanaia wasoni nanao:
Yemuel, Yamin, Ohad, Yakhin, Zohar, runa Saul. (Saul inai mo, Yakub sahai arihoni otoe Kanaan.)
Lewi ne hehuka hanaia wasoni nanao:
Gerson, Kehat, runa Merari.
Yehuda ne hehuka hanaia wasoni nanao:
Er, Onan, Syela, Peres, runa Zerah. (Ne Er runa Onan omataso pani Kanaan nea, on amai ieui poe Mesir tewasi.)
Peres ne hehuka hanaia wasoni nanao:
Hezron runa Hamul.
Isakhar ne hehuka hanaia wasoni nanao:
Tola, Pua, Ayub, runa Simron.
Zebulon ne hehuka hanaia wasoni nanao:
Sered, Elon, runa Yahleel.
Yakub ne hehuka reini mo oamraeso pani otoe Mesopotamia runa noa hota, Dina. Pusiso sio hutu tonu rahana tonu.
16-18 Areini mo Yakub ne hehuka hanaia wasoni noa ina tau Zilpa. Zilpa mo ia waini iuna ia makahaie tau Laban anai pina Lea. Laban iruiki osi anai pina, Lea.
Gad ne hehuka hanaia wasoni nanao:
Zifyon, Hagi, Syuni, Ezbon, Eri, Arodi, runa Areli.
Asyer ne hehuka hanaia wasoni nanao:
Yimna, Yiswa, Yiswi, runa Beria. Runa noa hota Serah.
Beria ne hehuka hanaia wasoni nanao:
Heber runa Malkiel.
Sio reini mo, sio hutusa rahana nome.
19-22 Areini mo Yakub ne hehuka hanaia wasoni noa ina tau sahai Rahel.
Yusuf ne hehuka hanaia wasoni nanao:
Manasye runa Efraim. Uaso oamrai poe Mesir. Noa ina tau Asnat, Potifera anai pina. Potifera waini isaka ianori runa sio Mesir no anahatana ranie wani titue tewa poe Heliopolis.
Benyamin ne hehuka hanaia wasoni nanao:
Bela, Bekher, Asybel, Gera, Naaman, Ehi, Ros, Mupim, Hupim, runa Ared.
Sio reini mo, sio hutusa rahana ate.
23-25 Areini mo Yakub ne hehuka hanaia wasoni noa ina tau Bilha. Bilha mo ia waini iuna ia makahaie tau Laban anai pina Rahel. Laban iruiki osi anai pina Rahel.
Dan ne hehuke hanaie waini nanai:
Husim.
Naftali ne hehuka hanaia wasoni nanao:
Yahzeel, Guni, Yezer, runa Syilem.
Sio reini mo, sio itu.
26 Yakub nea hehuka, nea momou, nea upu wasoni oeuso poe Mesir rei, sio hutu nome rahana nome. Ne mananua reken tanuso tewa. 27 Yusuf runa ne hehuka ua wasoni oamrai poe Mesir runa Yakub ne hehuka wasoni oeu okatai poe Mesir, pusiso sio hutu itu.
Yakub Runa Ne Numa Hutae Ohokaso Poe Mesir
28 Yakub sio ohokaso mai otoe Gosyen nea. Reiso iaisosi Yehuda ieu ianaonei nanie ioi Yusuf na ieui mai amai mai Gosyen. 29 Yusuf isaa kareta wani naitanane erenesai na ieui mai amai. Tau osupu umau oyo Yusuf iatipuni amai oyo irani rotu-tu potuina. 30 Yakub iasau osi Yusuf iahata, “Masike umataku iae iake, hete nanie unooa amahaia asi rei.”
31 Oyo Yusuf on poe iasau osi nea kakau runa wanini muie runa no pina hehuka. Iahata, “Au nanie ueuku poe na usima osi ia ona aia runa amaku, wea kakau runa waniku, runa no pina hehuka wasoni ohokaso on pani otoe Kanaan nea. 32 Mka uasau ata omi mo, omi mamsaka rompau runa koropou. Makapanau rai mo waroni orori pusire mai rei nea runa mo apia pusire. 33 Munata ia ona aia ioimo na iasei tanumo, iahata, ‘Mo pakariani sae?’ 34 Oahata, ‘Ami mo asaka makapanau on ami ikina asi. Sani mania upu oi.’ Oasau sanrei mo, mka iaisosimo oruemo mai otoe Gosyen reini.”
Yusuf iasau sanrei tau sio Mesir oahana omasikiki tau sio mamsaka rompau.