2
Hana Iainisi
1 Oyo Hana iainisi sanrei,
“Upuku Anahatana, auna au anoku mirike.
Aunaku uamkona.
Uaumani we nisau.
Tau sae? Akahaiku reiso anoku mirike.
2 Ano mo, ano manisate onate erenesi sio pusiso.
Ia isa waini sani ano tewa.
Ano ruamu sani hatu tinetae.
Hatu tinetae eresaka sio wasoni poe nene nohue
sani ano ararou nohu asakama.”
3 Iainisi sanrei suka oyo iahata,
“He. Wea kakau wea waniu.
Pene aanamana aainaa runa ruamo.
Aarihoni mo atata rai nea.
Upuku mo, Ia Anahatana waini ianei pusire.
Ia sahoro iapasanamo pusu mo atata pusire.
4 Ne sio soratatua wasoni oamkona mka sio umau okuparehi no henua.
Sio wasoni oamkona tewa, Anahatana mka iunaso oamkona.
5 Sio wasoni naone omakaneaso,
Anahatana mka iunaso omakaneaso tewa nea.
Ne sio wasoni naone ruao oai tiao pokona
muie reini onana tanei osi sio umau na ohane no muaine.
Ia pina waini naone imutui,
Anahatana irui ne hehuka, sio itu nea.
Ne ia pina isa honu waini ne hehuka panesi,
ne hehuka tewa nea reiso iatamisi.
6 Upuku iuna sio umau omataso,
sio umau honu, iapuhaiso.
Iaisosi sio umau oeu noi sio matana naniao,
iaisosi sio umau honu, onuniso mai tuniai reini honu.
7 Iuna sio umau omosokiniso,
iuna sio umau no kaya.
Irati sio mainaya arihoni ouna sio mainaya na sio ikina,
ihiti sio ikina na sio mainaya.
8 Inea sio mosokinia on poe tapune wenue.
Inea sio wasoni no muaine erelai tewa arihoni no makanokona.
Ihitiso na orueso tau katerau okata sio aiau no hehuka
na osupu muirani manetane.
Anahatana sahoro ihaye tau tuniai reini
reiso ia sahoro ne kawasa tau tuniai reini.
9 Isaka ne mansiau na pene osupu siraka.
Ne sio kahatena mo, iunaso na sinsaraso noi pumono.
Mansia isupu untu pusu ruai ne mkonae tewa.
10 Mka Anahatana ne nisau no kawasa tewa nea.
Iuna tinaa on roe noiyaha
iapasana sio tuniai pusiso.
Mka irui kawasa osi ia aia waini ruai ininiki
Ia aia rei mo, mka iamkona.”
11 Hana iaunauso suka oyo inuniki ikata Elkana sio pani nia Rama. Ne anai Samuel iruei mai nia Silo. Iruei mai Silo ianori runa Anahatana iakahai Eli.