¹ Samuel waini ianori runa Anahatana iakahai Eli. Ia ikine asi. Tau tihue rei, Anahatana ianamana osi sio panesi tewa. Sio panesi onooi tau niine tewa. ² Tau onone isa, Eli waini inekei poe naniai roe Anahatana ne numa mainisie sani suiosa. Eli matai usena haineke raputiso nea. ³ Samuel iae waini inekei roe Anahatana ne numa mainisie rei. Anahatana ne peti wani sio oaiinu ne maunau hutusa rai tanui waro ne numa rei. Kamane wani ereai asi reiso kinoke tewasi. ⁴ Anahatana ioi Samuel. Ioiki, oyo isana, “Oe. Upu. Au wani rei.”

⁵ Samuel irumai poe Eli oyo iasau, “Sae rei, Upu? Au wani rei. Ano aoiku tau sae rei?”

Ne Eli on poe iasau, “Uoia tewa. Aeu anekea nea.” Reiso ieu inekei honu.

⁶ Ita Anahatana ioi honu, “Samuel.” Reiso ihanui honu ieu poe Eli iahata, “Upu. Au reini. Ano aoiku tau sae?”

Iahata, “Anaku. Uoia tewa. Aeu anekea nea.”

⁷ Samuel iationa Anahatana tewasi. Anahatana iatuhete ne anamanaya osiki tewasi.

⁸ Ita Anahatana ioi Samuel honu. Nai tonu nea. Ihanu oyo ieu poe Eli iasau, “Upu. Mai. Au wani rei. Ano aoiku tau sae rei?”

Eli ianeiki nea. Ianei ata Anahatana sahoro ioi ia iki rei. ⁹ Reiso iasau osi Samuel, “Aeu anekea honu. Munata ia isa ioia honu, masi aasau sanrei, ‘Upu. Masi aasau roe. Au, me manorine, wani uatinu nea.’”

Ita Samuel ieu inekei poe naniai honu.

¹⁰ Ita Anahatana ihokai honu iooi ioi Samuel honu, “Samuel. Samuel.”

Samuel isana, “Upu. Masi aasau roe. Au, me manorine, wani uatinu.”

¹¹ Reiso Anahatana iasau osiki, “Au nanie uuna sae isa osi omi Israel. Mka sio wasoni oatinui osira. ¹² Tau muie reinau mo, mka au uuna pusire waroni usopa uasau nanie au uunare. Usopa rerihoni Eli ne hehuka. Mka au uuna pusire on poe aikune rotu-tu roe atue. ¹³ Uasau osi Eli nea. Uasau ata mka uapasana ne hehuka rotu-tu ria supani. Tau sae? Ne hehuka hanaia rei omakaniaku. Eli ianei no rosau ne iakapuku tanuso tewa. ¹⁴ Reiso usopa rerihoni Eli ne hehuka. Usopa sanrei, “Masike sio okenu makapana sae mani, orui sae mani iae, au mka uusi no rosau tewa. Uapasanaso sirinia.”

¹⁵ Oyo Samuel inekei rotu-tu omnanoe oyo ihanui. Ihanu roe, oyo iheka Anahatana ne numa mainisie nene mitanunua. Iaumaa isima runa Anahatana ne anamanaya rai osi Eli. ¹⁶ Ne Eli ioiki iahata, “Anaku, Samuel.”

Iahata, “Oe. Upu.”

¹⁷ Iasau, “Anahatana iasau sapani? Isima runa sae osia? Masi aruni pusire osiku. Pene aauhuni sae isa. Aauhuni sae isa mo, mka Anahatana iapasanaya.”

¹⁸ Reiso Samuel isima runa Anahatana ne anamanaya pusire. Iauhuni maunaune isa mani tewa oi. Oyo Eli iasau, “Ia mo, ia Anahatana. Tapiki iuna sae wani iahata iake.”

¹⁹ Samuel iruhu rotu-tu ia mainae. Anahatana ikata runai. Sae wani Samuel iasau, iuna isuiki sirinia. ²⁰ Reiso sio Israel pusiso oamanaku ata Samuel waini ia mamsima runa Anahatana ne anamanaya. Samuel ianamana, sio Israel oatinu tanui suiosa.

²¹ Anahatana iatuhete ruai pani nia Silo sirinia. Iatuhete ruai osi Samuel oyo ianamana osiki.