¹ Samuel ikore-korei nea, oyo ihiti ne hehuka hanaia tau sio mansia mainaya wasoni oasau sae wani titue, sae wani titue tewa. Ihitiso na sio ouna mansia mainaya osi sio Israel. ² Samuel anai manaonete nanai Yoel. Anai muie nanai Abia. Sio ouna mainae pani nia Bersyeba. ³ Ne no hali ouna sani noa ama tewa. Onina kepeni osi ruao mani. Onana kepeni rerihoni mansiau waroni sio rei oruire osiso na uaso opusu no anamanae. Sio oasau sae wani titue, sae wani titue tewa reimo, ouna osa osi pusiso tewa.

⁴ Reiso sio onata pusiso tau sio Israel oamanouso. Oamanouso oyo ohokaso mai Samuel mai nia Rama. ⁵ Oahata, “Mania upu. Ano mo, akore-korea nea. Samatoro me hehuka hanaia opusu Anahatana sani ano ruamu tewa. Reiso nene iake mo, ahiti ia aia isa osima na irimema. Ahiti ia aia isa osima sani sio niana no aiau rei.”

⁶ Ne sio oainisi na Samuel ihiti aia osiso, Samuel anoi iake tewa. Reiso iainisi tau Anahatana. ⁷ Taa sanrei oyo Anahatana iasau osiki, “Masi aatinu tau pusire waroni sio Israel oasau osia rei. Sio peneso tau ano tewa. Ne au sahoro openeso tanuku. Openeso tau au uuna aia tanuso nea. ⁸ Aikee uhokaso arihoni otoe Mesir, ne openeso tanuku sirinia. Openeso tanuku rotu-tu reini. Opusuku tewa. Ne opusu anahatanau waroni titue tewa. Muie reini wasoni ouna sanrei tau ano oi. Opusua tewa oi. ⁹ Reiso aatinu tanuso. Ne aasau osiso rerihoni mka ia aia iunaso sapani.”

¹⁰ Reiso Samuel isima runa Anahatana ne anamanaya rai pusire. Isima osi sio wasoni oainisi na ihiti ia aia na irimeso. ¹¹ Iahata, “Mka ia aia irimemo, iuna mo iake tewa. Mka itentene mo hehuka hanaia na ouna soratatua. Sio umau orori ne karetau manahitane. Karetau waroni naitanana ranesare. Mka sio umau osaa naitanana, sio umau oruma naone arihoni karetau rai. ¹² Sio umau mka ihitiso na oaisosi sio soratatua nihuni, sio umau oaisosi sio soratatua hutu nima. Sio umau okani ne tuamane na orahu osiki, sio umau oamanou ne atuhu osiki. Sio umau onana saniata manahitane osiki. Sio umau onana apia osi ne karetau. ¹³ Mka inana mo hehuka pinau na iaisosiso ouna mina hau rihue osiki. Oatanunu osiki. Okotu porotiu osiki. ¹⁴ Mka inana mo nisiu waroni iaka ranesi mo nisiu pusire. Inana mo nisi anggur huaya waroni iaka. Inana mo nisi ai zaitun waroni iaka. Inanare na iruire osi sio wasoni onana ne taneiu rai. ¹⁵ Mka iaisosimo osama mo atuhu tau pahakiani hutusa oyo inana pahakiani osa osi sio wasoni onana tanei osiki. ¹⁶ Iainisi mo manorina wasoni iaka erenesi sio manorina pusiso na onana tanei osi ia ruai. Iainisi mo koropou waroni iaka, mo keledai waroni iaka (keledai, nooi sani naitanane ne ikine) na ranana tanei osi ruai. ¹⁷ Iaisosimo osama mo une-uneu, mo rompau tau pahakian hutusa, oyo inana pahakian osa osi ruai. Omi ruamo mka iunamo tau ne manianeu. ¹⁸ Mka iuna sani mato uasau rei, oyo omi oainisi tau Anahatana sanrei mo, ‘Mania Upu Anahatana. Akahaima ee. Ami wani sinsarama nai osa tau ia aia reini. Inana mani atuhu, mani makapanau suiosa. Iuna mtinte tanuma suiosa. Aakahaima na pene iuna mtinte tanuma nea. Pene iuna aia tau ami nea.’ Ne Anahatana mka ipenei iatinu tanumo.”

¹⁹ Ne sio Israel openeso oatinu tau Samuel oahata, “Tewa. Ami anina na ia aia isa irimema. ²⁰ Ami anina na ami sani sio niana rei. Anina na ia aia irimema na ikata runama noi manahitana.”

²¹ Samuel iatinu tau rai pusire oyo isima runa pusire osi Anahatana. ²² Anahatana iasau, “Atinu tau sio na ahiti ia aia isa osiso.”

Oyo Samuel iasau osi sio Israel, “Pusimo onunimo nea.”