¹ Ia kaya isa nanai Kisy. Ne ipane Benyamin. Kisy amai tau Abiel. Abiel amai tau Zeror. Zeror amai tau Bekhorat. Bekhorat amai tau Afiah. Afiah ne ipane Benyamin. ² Kisy anai hanaie nanai Saul. Saul, nooi ia iake erenesi sio hanaia pusiso mai Israel. Ia mo, ia noa-noae. Sio pusiso oo kua manai mani.

³ Taue isa, Kisy ne keledaiu tihonire. (Keledai, nooi sani naitanane ne ikine.) Reiso iasau osi Saul, “Masi aeu akata ia manorine isa na uamo oeu onina keledaiu rai.”

⁴ Reiso Saul runa ia manorine rei uaso oeu sui pupua pani otoe Efraim runa otoe Salisa. Ne osupu keledaiu rai tewa nea. Oyo oeu-eu rotu-tu ohokaso poe otoe Sahalim. Ohoka poe, ne osupu keledaiu rai tewa sirinia. Ita oeu onina-nina sui otoe Benyamin. Ne osupure tewa oi. ⁵ Hoka poe otoe Zufoyo, Saul iausau osi ia manorine rei. Iahata, “Mai, na inunita nea. Mka amaku anoi ereupono runa ita. Anoi ereupono runa keledai tewa nea.”

⁶ Ia manorine on poe iasau, “Upu. Napa ee! Mai niane reini waini ia mamsima runa Anahatana ne anamanaya isa. Sae waroni iasau ata mka nanie ereeu, ereeu sirinia. Reiso sio panesi oamuirai. Mai, na ieuta pani tanui. Kani mka isima runa keledaiu rai waroni sui supa?”

⁷ Iahata, “Ne munata ieu, mka irui sae osiki? Ita re wekau pusire nea. Re sae isa tewa nea na iruiki osi ia mamsima runa Anahatana ne anamanaya rei, tea?”

⁸ Iahata, “Upuku. Masi anoo. Au we perak mkane reini. Mka uruiki osi ia mamsima runa Anahatana ne anamanaya na isima runa keledaiu rai osita.” ⁹ (Naone, pani Israel, munata ia isa nanie iasei tau Anahatana, iasau, “Mai, na ieu pani ia mamruni runa Anahatana ne anamanaya.” Naone sio oaoiki tau ia mamrunie. Ne muie reini iaoiki tau ia mamsimate.) ¹⁰ Iahata, “Iake. Mai na ieuta.” Reiso oeu poe ia mamsima runa Anahatana ne anamanaya ne niane rei.

¹¹ Hoka poe, uaso wasoni onoa pupue isa nanie oeu roe ne niane oyo osupu sio pina hehuka umau wasoni nanie oeu oripa tihu. Reiso oasei, “Ia mamruni runa Anahatana ne anamanaya waini?”

¹² Oahata, “Waini. Wairo uae. Masi oeu rapu. Mato ihokai mai niane reini sinasi. Sio nusa niane nanie okenu makapana osi Anahatana roe pupue reiro. ¹³ Mka onusu pani niane, oyo osupui. Osupui on ieu roe pupue tewasi. Mka iai roe pupue rei. Sio nusa niane oai tewa sani ihokai tewasi. Tau sae? Iainisi na Anahatana irui iake osiso samatoro okenu makapana osi Anahatana. Iainisi pusi samatoro sio wasoni oanaha runaso oaiso. Reiso oeu nea. Mka osupui.”

¹⁴ Ohoka pani niane rei, nanie onusui, oyo sira tau osupu Samuel. Waini ihokai mai tanuso nanie ieu roe pupue. Pupue wani sio okenu makapana osi Anahatana tanui rei.

¹⁵ Potusi Anahatana iatuhete Samuel sanrei, ¹⁶ “Hanroe, ranie sanrei, mka uaisosi ia isa on pani otoe Benyamin mai tanua. Hitiki na iuna ia aia tau we mansiau, sio Israel. Mka iapuheu we mansiau rerihoni no nisau, sio Filistin. Unoo we mansiau nea. Orani oainisi na uakahaiso. Uatinu nea.”

¹⁷ Samuel inoo Saul, oyo Anahatana iasau osiki, “Ia reini sahoro uasau osia. Ia sahoro mka irime we mansiau.” ¹⁸ Saul ieu rotu-tu ihokai mai Samuel. Samuel waini haineke pakelo nene mitanunue. Pakelo wani erehori niane rei. Saul ihokai mai tanui oyo iasei, “Ama. Ia mamruni runa Anahatana ne anamanaya ne numa wani sui supa?”

¹⁹ Samuel on poe iasau, “Au mo, au wani ia mamrunie rei. Masi aeu aanaone roe pupue. Pupue wani sio okenu makapanau osi Anahatana tanui. Tau sae? Ranie hatae reini ano mka aaia akataku. Hanroe omnanoe samatoro usima runa pusire. Pusire waroni anomu erenoa runare. Usima runa pusire samatoro anunia pani me numa honu. ²⁰ Rerihoni me keledaiu rai onnaha tonusi waroni tihonire rei, pene anomu reupono. Sio osupure nea. Waroni nea. Isa honu, sio Israel pusiso wasoni oainisi na ia aia isa irimeso. Mka ia aia rei arihoni amamu ne mansiau. Ia reimo, ano.“”

²¹ Iahata, “Ne au rerihoni ipa Benyamin, tea? We ipane mo, mansiau mkana mani. Ami sahoro ami ipa ikina nai osa mai Israel. Au wea amau, wea kakau wea waniu, sio ikina rerihoni ipane rei. Sio ikina onesi sio pusiso. Reiso aasau sanrei, nanie ta hae?”

²² Oyo Samuel iautunu Saul runa ne manorine na onusu pani numa mainae, oyo iaisosiso orueso roe uae. Sio oanaha runa kani sio hutu tonusa sanrei. Ohokaso nea. Pusiso nanie oaiso. ²³ Samuel iasau osi ia matanunue sanrei, “Arori henate rei mai. Henate wani sinasi uaisosia aaunutui rei.”

²⁴ Reiso ia matanunue inana makapana kanakae runa pusire osiki oyo iautuere mai Saul naniai. Oyo Samuel iasau, “Areini mo, pahakiani wani sio oaunutui osia. Ai nea. Ami aaunutui osia na aaiki runa sio wasoni ami aanaha runaso oi.” Reiso Saul iaiki. Iai ikata Samuel.

²⁵ Oaiso suka oyo okaisunu on roe pupue rei onuniso poe niane. Saul isupu naniai roe numa hahae oyo inekei.

²⁶ Nene hanroe tau kinoke asi Samuel ioi Saul nea. Saul wairo numa hahae rei. Samuel ioiki iasau, “Hanu roe. Ueu uautunua mkane pani niane rurue reipa na anunia.”

Saul ihanu oyo uaso oeu okata umau. ²⁷ Wasoni haineke niane rurue nea oyo Samuel iasau osiki sanrei, “Aaisosi me manorine rei na ieu ianaone.”

Reiso Saul ne manorine rei ieu ianaone. Oyo Samuel iasau honu, “Napa mai rei mkane na usima runa Anahatana ne maunaune isa osia.”