11
Saul Iahita Runa Sio Amon
1 Nahas, ia aia Amon runa ne soratatua ohori kota Yabesh pani otoe Gilead nea. Sio Yabesh oasau osi Nahas sanrei, “Mai na ihunu anamanae. Mka ami aanori runamo.”
2 Ne Nahas on poe iasau sanrei, “Iake. Hete sae omi oamanaku ouna sanrei. Mka ami apeku pusimo matamo kania hae wanane na sio Israel pusiso oaumaa tau omi.”
3 Oyo sio ona Yabesh oasau, “Ami aainisi na omi onapa onona itu na ami aaisosi sio umau osima runa rei sui sio Israel pusiso. Ne munata sio umau ohoka oakahaima tewa mka ami aamanaku.”
4 Taa sanrei, oyo oaisosi sio umau ohori otoe Israel. Ohoka nau Gibea, Saul ne niane. Ohoka poe osima runa no sou rei. Oatinu tau rei sio Gibea orani. 5 Saul mato ihokai on poe nisi ipusu ne koropou. Reiso iasei, “Sae rei? Sio pusiso orani tau sae?” Oyo sio osima runa sio Yabesh no sou rei. 6 Iatinu tau rei oyo, Saul isupu kawasa rerihoni Anahatana ne Inaha. Oyo anoi eresaa. 7 Reiso inana ne koropou hata ua ihuture sinta-sinta samatoro iauwatu sinta-sinta rai sui otoe Israel pusiki. Iaunau sio Israel sanrei, “Ia seia ipenei iahita runa sio Amon ikata Saul runa Samuel, mka sio ohutu ne koropou pusire sani koropou rai.”
Sio Israel pusiso okaitau hunu ruao rerihoni mka Anahatana iuna sapani.. Okaitau ata mka Anahatana iapasanaso. Sani oapuheu sio Yabesh tewa, mka iapasanaso. Reiso sio pusiso oamanouso tau osa nanie oahita runa sio Amon. 8 Oamanouso poe Bezel samatoro sio oreken tanuso. Sio Israel, sio 300.000. Sio kaka wani, sio Yehuda, sio 30.000. 9 Sio Yabesh umau ohoka ria Beza oyo sio Israel oaisosiso sanrei, “Asau osi sio Yabesh ata hanroe omnanoe, ranie katopu tewasi, mka ami akahaimo.”
Reiso onuniso nau Yabesh osima oahata, “Sio Israel oamanaku oakahaima nea.” Sio Yabesh oatinu tau rei anoo mirika. 10 Reiso oasau osi Nahas oahata, “Hanroe mka ami arui ruama osimo oyo opeku matama kania opusu ruamo mo maue.”
11 Nene hanroe tau kinoke tewasi oyo Saul isama ne soratatua tau tikana tonu. Tau kinoke sio onusu pani sio Amon rei naniao onekeso. Ranie roe katopu tewasi Saul runa ne soratatua rei onesi sio Amon nea. Sio Amon panesi omataso nea. Noo sani ai ehuka. Sio wasoni oamahaiso orumaso owena-wenaso. Ia isa ikata ne neta tewa nea.
Sio Israel Oamanaku Saul tau Aia
12 Saul sio onesi sio Amon suka oyo sio Israel oasei tau Samuel, “Sio wasoni naone oasau ata Saul iuna aia tau ita iake tewa wasoni sui supa? Roriso mai rei na ami ahunuso.”
13 Ne Saul on poe iasau, “Pene. Sio ruao. Ranie hatae reini, pene ohunu ia isa. Anahatana iapuheu ita Israel nea.”
14 Oyo Samuel iasau osiso sanrei, “Mai na pusita ieu nau nia Gilgal na iamanaku Saul tau aia.”
15 Reiso sio pusiso oeu nau Gilgal. Hoka nau oyo oamanaku Saul tau aia. Anahatana inoo. Hoka nau oyo okenu makapana osi Anahatana. Okenu makapana rei rekakina ata sio oheu nisa runa Anahatana nea. Okenu makapana oyo Saul runa sio Israel ouna karisaa mainae.