¹ Samuel iasau osi sio Israel pusiso sanrei, “Au usui pusire waroni omi oaisosiku na uunare. Uhiti ia onate aia osimo nea. ² On ranie hatae reini mo, ia sahoro iaisosimo. Au reini mo, ukore-kore uamtuaku nea. Au uaisosimo potuina nea. Uaisosimo on au honue asi ro-rotu-tu reini. Masi onoo. We hehuka sio mainaya nea. ³ Muie reini mo, au wani uooku mai uamo anoa. Kani au uuna sana tanumo osima onahuku osi Anahatana runa ia onate aia waini ihitiki. Au uuna sana tanumo sani unana mansia ne koropou te, ne keledai te, te tewa? (Keledai nooi sani naitanane ne ikine.) Au uakarota mansia te tewa? Au una mtinte tau mansia te tewa? Au unana kepeni arihoni mansia na pene usima na ne isanaya te tewa? Masi asau. Kani au uuna isanae sanrei na upamanisai.”

⁴ Sio Israel oasau oahata, “Tewa upu. Ano aakarotama tewa. Auna mtinte tanuma tewa. Ano anana mani sae isa tewa.”

⁵ Iahata, “Reiso ranie hatae reini mo Anahatana runa ia onate aia waini ihitiki oatinu ata we isanae isa tewa.”

Oahata, “E-e. Anahatana iatinu ata ano me isanae isa tewa.”

⁶ Iahata, “Anahatana inini Musa runa Harun oyo ihoka rea upu arihoni otoe Mesir. ⁷ Reiso napa ee. Au nanie uaunaumo. Nanie uakiramo na iarinii Anahatana ne atata manisata pusire osi omi runa moa upu pusimo utumo.

⁸ Yakub runa ne enau ohoka poe Mesir oyo sio Mesir ouna mtinte tanuso. Ouna mtinte tanuso reiso oainisi na Anahatana iakahaiso. Taa sanrei oyo Anahatana iaisosi Musa runa Harun. Iaisosiso oautunu moa upu ohoka arihoni Mesir. Oautunuso ro-rotu-tu ohoka oru-rueso mai otoe reini. ⁹ Ne sio anoo kanihua runa Anahatana waini naone oainisi oainaa runai. Anoo kanihua reiso itapiso ouna manianeu osi Sisera. Sisera waini ia kapitane tau Hazor ne soratatua. Ita itapiso ouna manianeu osi sio Filistin. Ita itapiso ouna manianeu osi ia onate aia Moab. Ia aia Moab iahita runaso samatoro inanaso tau manianeu. ¹⁰ Ouna manianeu oyo oainisi tau Anahatana. Oamanaku no rosau. Oahata, ‘Mania Upu, Anahatana. Ami apalalosa tanua nea. Ami aainisi aainaa runaya tewa nea. Ne ami aainaa runa anahatanau waroni titue tewa. Ami aainisi aanori runa Baal nene siaie runa Asytoret nene siaie. Ne muie reini mo, ami nanie aainisi na ano aapuheuma arihoni mania nisau. Aapuheuma oyo ami aainaa runaya honu.’ ¹¹ Oyo Anahatana iaisosi Gideon na iapuheuso arihoni no nisau. Ita iaisosi Barak na iapuheuso arihoni no nisau. Ita iaisosi Yefta. Ita iaisosi au ruaku tau muie. Ami pusima utuma aapuheumo arihoni mo nisau reiso oamahaimo okaitau tewa. Oamaturumo.

¹² Ne omi onoo ata Nahas ia onate aia otoe Amon nanie iapuoo manahitane iahita runamo oyo openemo tau Anahatana iuna aia tanumo nea. Oasau osiku, “Ami nanie anina ia tumata isa iuna aia tanuma nea.’ ¹³ Muie reini mo, masi onoo. Ia reini sahoro onini na iuna aia tanumo. Omi oainisiki reiso Anahatana ihitiki osimo nea. ¹⁴ Ne munata omi oamuira Anahatana, mka irui iake osimo. Munata omi oanori runai, mka irui iake osimo. Munata oatinu tanui, mka irui iake osimo. Munata omi runa ia waini iuna aia tanumo opusui, mka irui iake osimo sirinia. ¹⁵ Ne munata omi oatinu tanui tewa mka inesimo. Munata omi opusu ne maunauna tewa mka inesimo. Mka inesi omi sani inesi moa amau, moa upu.

¹⁶ Reiso masi oatinu. Masi onoo Anahatana ne sima-simane mka iunai mai uamo anoa. ¹⁷ Au nanie uainisi tau Anahatana oyo masike runne iae, mka iuna tinaa runa uane. Oatinu tinaa oyo oanei sapani na omi opalalosa mainae. Opalalosa oainisi na ia onate aia iaisosimo.”

¹⁸ Reiso Samuel iainisi oyo ranie hatae rei Anahatana iuna tinaa, uane sirinia. Sio Israel oamuira Anahatana runa Samuel uaso. ¹⁹ Reiso oasau osi Samuel sanrei, “Masi aainisi tau Upumu Anahatana. Aainisi na pene amatama. Tau sae? Ami aakapena rosa isa honu tau mania rosau waroni naone. Ami apalalosa honu ainisi na ia onate aia iaisosima.”

²⁰ Iahata, “Iake. Pene okaitau. Masike omi ouna kahatene ainisi aia nea iae, pene ouni oarihoni Anahatana. Ne oainisi oainaa runai tau anomo pusiki. ²¹ Pene opusu anahatanau waroni titue tewa. Anahatanau waroni oakahaimo tewa, oapuheumo tewa. Tau sae? Sio mka ouna sae isa tewa. ²² Anahatana itotoe nea. Mka ieu iarihonimo tewa. Tau sae? Ia ne maue iunamo ruai ne mansiau. Iarihonimo mka sio niana oruniki reiso ipenei. ²³ Au reini, au mka uarihoni uainisi tau Anahatana osimo tewa. Uainisi tewa, areimo upalalosa tau Anahatana. Mka uatuhetemo rerihoni sae wani iake, sae wani manisate. ²⁴ Ne osaka oamuira runa Anahatana. Oainisi oainaa runai ia-ia tau anomo pusiki. Anomo rapeka runa ne atata iaka osimo nea. ²⁵ Ne munata omi opalalosa sirinia, mka omi runa mo ia onate aia osupu siraka.