¹ Ia onate aia Saul ² inini sio Israel nihu tonu nanie iahita runa sio Filistin. Ininiso ruai ikata sio nihu ua mai Mikhmas mai otoe pupua mai Betel. Anai hanaie, Yonatan, ikata sio nihun honu. Ikataso oyo oeuso nau nia Gibea nau sio arihoni ipane Benyamin no otoe. Sio nesia, Saul iaisosiso onuniso sui no numau.

³ Yonatan sio oahita runa sio Filistin umau ria Geba. Oahitaso oyo sio Filistin pusiso oatinu ata oahita runa umau. Reiso Saul iaisosiso oauhona rompa nene sepi-sepie sui otoe Israel pusiki. Sio oasau, “Omi Israel oatinu.” ⁴ Reiso sio Israel oasau osi umau. Oahata, “Saul sio oahita runa sio Filistin nea.” Oasau osi umau rotu-tu sio Israel pusiso oatinu rerihoni manahitane rei. Oahita runa umau reiso sio Filistin openeso tau sio Israel. Taa sanrei oyo Saul ianaha runa sio Israel na oamanouso na okatai. Oamanouso mai nia Gilgal.

⁵ Sio Filistin oamanouso oi nanie oahita runa sio Israel. Oamanou kereta manahitane nihu tonu, sio mamsaa keretau rai sio nihu nome, runa sio soratatua panesi. Sio panesi sani sisia nau nuae. Sio onekeso poe Mikhmas poe Bet-Awen on mai hae. ⁶ Sio Israel onoo sanrei oyo oanei ata sio osusa. Taa sanrei oyo orumaso. Sio umau oruma oauhuniso pani hatu nohua. Sio umau honu oauhuniso sui monota kapitoruna. Sio umau oauhuniso sui hatu, poe parikeu, poe kunenana. ⁷ Sio umau orumaso pani wae Yordan pani hae. Orumaso hainau rotu-tu ohokaso pani otoe Gad runa otoe Gilead.

Saul iruei mai Gilgal sirinia. Sio soratatua wasoni okatai okaitau hunu ruao. Okaitau rotu-tu okana-kananunu. ⁸ Saul inapa Samuel rotu-tu onona itu sani Samuel iaisosiki. Inapa Samuel na Samuel ikenu makapana osi Anahatana. Onona itu nea Samuel ihokai mai Gilgal tewasi. Ihokai tewasi mato Saul ne mansiau umau orumaso nea. ⁹ Reiso iasau osiso iahata, “Wea inau, wea amau. Masi orori makapana wani nanie iakanupui osi Anahatana na iusi re rosau mai. Roriki mai runa makapana isa honu. Makapana rei mka ikenui iaiki iheu nisa runa Anahatana.”

Ororire mai oyo Saul ruai iakanupu makapana rei osi Anahatana. ¹⁰ Mato iakanupui pusi oyo isira tau Samuel ihokai. Ihokai oyo Saul ihitio nanie iatapeai. ¹¹ Ne Samuel iasei, “Amuna rei?”

Iahata, “Upuku. Unoo sio panesi orumaso mato ano ahoka tewa panuhu umetene wani iaunutui. Uatinu ata sio Filistin oamanouso poe Mikhmas nea. ¹² Au uata kani mka sio Filistin osaa oahita mai Gilgal. Pene rotu-tu osaa uainisi na Anahatana anoi runata tewa. Taa sanrei reiso uahana kahurae ruaku uakanupu makapana rei osi Anahatana.”

¹³ “Arirunea. Upumu Anahatana irui maunaune osia nea. Sinana apusui, titue ano runa mea upu ouna aiau mai Israel rotu-tu ria supani. ¹⁴ Ne apusui tewa reiso mka auna aia ereeu potuina tewa. Ano apusu Anahatana ne maunaune tewa reiso inini ia isa nea. Mka ikatia. Inini ia isa waini iuna sae wani ne suka. Mka ihiti ia reini na iuna aia tau ne mansiau.”

¹⁵ Oyo Saul ieui iarihoni Gilgal nanie ieui poe Gibea poe otoe Benyamin. Hoka poe oyo ireken tau sio wasoni okatai. Oreken tanuso, sio utun nomesa sanrei.

⁴⁷ Saul iuna aia oyo iahita runa sio Israel no nisau suru ria, suru nau, suru poe, suru pani. No nisau wasoni sio Moab, sio Amon, sio Edom, sio Filistin, runa ia onate aia tau otoe Zoba. Ikua sio pusiso. ⁴⁸ Ia ne parane iahita runa sio Amalek ro-rotu-tu ikuaso. Iapuheu sio Israel arihoni sio pusiso wasoni onana no sae isa.

⁴⁹ Saul ne hehuka hanaia wasoni Yonatan, Tiswi, runa Malkisua. Anai pina manaonete nanai Merab. Anai pina muie nanai Mikhal. ⁵⁰ Saul sahai nanai Ahinoam. Ahinoam amai tau Ahimaas. Ia kapitane tau Saul ne soratatua nanai Abner. Abner amai tau Ner, Saul memai. ⁵¹ Saul amai tau Kis. Abner amai tau Ner. Kis runa Ner noa ama tau Abiel.

⁵² Oni Saul mato iuna aia ro-rotu-tu imatai Saul iahita mtinte runa sio Filistin. Reiso sui supani mani Saul inoo ia isa waini iamkona, waini ne parane inanai na iunaso tau soratatua.