15
Saul Iahita Runa Sio Amalek
1 Samuel iasau osi Saul iahata, “Au sahoro Anahatana iaisosiku na uhitia tau aia. Anahatana ihitia tau aia osi ne mansiau, sio Israel. Reiso atinu tau Anahatana waini ne kawasa mainae erenesi pusire. Atinu tau ne maunaune nanie iaisosia reini. 2 Anahatana waini ne kawasa mainae erenesi pusire iasau sanrei, ‘Naone sio Israel ohoka arihoni otoe Mesir oyo sio Amalek onesiso. Onesiso reiso muie reini nanie uapasanaso. 3 Reiso masi oeu na oahita runa sio Amalek. Omi Israel oapahia no apia pusire ia-ia. Pene oapuhai ia isa. Ohunu sio Amalek pusiso utuso. Ohunu sio pinau, sio hanaia pusiso utuso. Ohunu sio ikina, sio iki msinana pusiso utuso. Ohunu no koropou, no rompau, no untau, no keledaiu pusire uture. ‘Unta, nene totu unie mo, nene pupua sonota. Keledai, nooi sani naitanane ne ikine.’”
4 Reiso Saul ianaha runa ne soratatua na oamanouso mai Telaim. Sio soratatua rei wasoni sio Israel sio 200.000 runa sio noa kaka wani sio Yehuda sio 10.000. 5 Oamanouso oyo Saul ikataso poe kota Amalek. Hoka poe oyo osaka sio Amalek poe waene rentai. 6 Saul iasau osi sio Keni iahata, “Ainati. Masi oeu oarihoni sio Amalek. Tea mo, ami nanie ahita runaso. Pene rotu-tu ami ahunu omi oi. Naone mania upu, sio Israel, ohoka oarihoni otoe Mesir omi moa upu iake runaso.”
Reiso sio Keni oeu oarihoni sio Amalek rei.
7 Oyo Saul iahita runa sio Amalek. Inesiso on poe Hawila rotu-tu pani Syur poe Mesir on mai hae. 8-9 Sio ohunu sio Amalek pusiso. Hasae oapuhai Agag ia onate aia tau sio Amalek. Saul runa ne soratatua osotai mani. Ouna sanrei runa sio Amalek no koropou, no rompau oi. Oapuhai koropou runa rompau waroni iaka. Oapuhai koropou anaya runa rompau anaya waroni rakopotueso. Oapuhai pusire waroni iaka. Hasae ohunu sae waroni iaka tewa. Ohunu sae waroni ramankaeso mani. Openeso ohunu pusire.
Anahatana Ipenei Tau Saul Iuna Aia Nea
10 Oyo Anahatana iasau osi Samuel iahata, 11 “Uhiti Saul tau aia uatamisi nea. Tau sae iuni iarihoniku nea. Ipusu we maunauna tewa nea.”
Samuel anoi repunoko ruai. Iainisi iakapona osi Anahatana rotu-tu manahane. 12 Nene hanroe tau kinoke asi Samuel ihanui nanie isupu Saul. Ne sio osima osiki oahata, “Saul ieui pani kota Karmel nea. Ieui pani Karmel nanie iapuoo hatu na sio anoo rapeka runai. Iapuooi pani Karmel samatoro inuniki ria kota Gilgal.”
13 Samuel iapasupuna runa Saul oyo Saul iatapeai sanrei, “Upuku. Uainisi na Upumu Anahatana irui iake osia! Anahatana iaisosiku, au pusui nea. Uahita runa sio Amalek nea.”
14 Ne Samuel on poe iasau, “Ne munata apusui ahunu pusiso sapani na uatinu koropou nioa runa rompau nioa?”
15 Iahata, “Sio soratatua onana koropou runa rompau rai rerihoni sio Amalek. Oapuhai no rompau iaka, no koropou iaka nanie okenure osi Upumu Anahatana. Ne ami ahunu koropou runa rompau nesia pusire nea.”
16 Iahata, “Purumene. Nanie usima runa Anahatana ne anamanaya osiku monosi rei.”
Iahata, “Upu. Masi asau roe.”
17 Iahata, “Masike ano ahata ruamu ano ikine honue mani, ano auna ano mainae tau sio ipana Israel tea. Anahatana ihitia tau ano onate aia tau sio Israel nea tea. 18 Hitio Anahatana iaisosia ahunu sio Amalek wasoni sio kahatena rei. Iaisosia ahita runa sio Amalek rotu-tu omata pusiso. 19 Ano apusu Anahatana ne maunaune tewa nan taa hae? Sapani na anomu mirike anana sio Amalek no apia no makapanau rai? Sapani na auna sae wani Anahatana isopo?”
20 Saul isana, “Upu. Au upusu Anahatana ne maunaune sirinia. Uhita runa sio Amalek sani iaisosiku tea. Uhunu sio Amalek pusiso nea tea. Usota no ia onate aia nanai Agag nea tea. 21 Ne we soratatua sahoro onana sio no rompau iaka, no koropou iaka rerihoni no rompau, no koropou pusire. Onana waroni iaka nanie okenure osi Upumu Anahatana mai Gilgal.”
22 Samuel iahata, “Anahatana anoi iake pusu sae? Anoi iake pusu ikenu makapana osiki, irui sae isa osiki? Te anoi iake pusu iatinu tanui? Nene iake ipusu Anahatana rerihoni iakanupu makapana osiki tea. Nene iake iatinu tau Anahatana rerihoni irui rompa nene minae osiki tea. 23 Ipeneta iatinu tau Anahatana, areimo rosa sani iuna nau. Iahata ruari ita mainaya, areimo kahatene sani iainisi iainaa runa anahatanau waroni titue tewa. Ano apenea tau Anahatana ne maunauna nea. Reiso Anahatana ipenei tau ano auna aia nea.”
24 Iahata, “Upu. Upalalosa nea. Upusu Anahatana ne maunaune tewa. Upusu ano me maunaune tewa. Au ukaitau sio nusa niane reiso sio sahoro uatinu tanuso. 25 Ne muie reini uainisi na ano anomu kanihue na we rosa reini. We rosa wani uhunu sio pusiso tewa. Uainisi na ano anunia akataku na uainisi uainaa runa Anahatana.”
26 Ne Samuel iahata, “Upeneku. Upeneku ununiku ukataya nea. Ano apusu Anahatana ne maunaune tewa reiso ipenei tau ano auna aia osi sio Israel nea.”
27 Oyo Samuel iuni nanie ieui. Ne Saul irime tau ne papi naue. Irime tau ne papi naue oyo wakihai. 28 Samuel iasau osiki iahata, “Tau ranie hatae reini Anahatana ipenei tau ano auna aia nea. Iruiki osi ia isa honu na iuna aia. Iruiki osi ia isa waini iake rerihoni ano. 29 Anahatana waini ita Israel iainisi iainaa runai waini rinane wani ita-itane eresita. Iakarota tewa. Iapamata sou, iuniki tewa. Ia tumata tewa reiso iapamata sou, iuniki tewa.”
30 Saul iahata, “Upu. Upalalosa nea. Ne masi akahaiku na anunia akataku. Akataku na uainisi uainaa runa Upumu Anahatana. Amuiraku sui sio onata rerihoni we mansiau runa sio Israel pusiso.”
31 Reiso Samuel ieu ikata Saul ria Gilgal. Ikatai iainisi iainaa runa Anahatana.
32 Oyo Samuel iaisosiso sanrei, “Oautunu ia aia Agag mai.”
Agag ihokai anoi ererau tewa nea. Iahata pani anoi, “Mka umataku tewa. Mka ihokaku sirinia.”
33 Oyo Samuel iasau iahata, “Ano me tunue erehunu sio ikina panesi rotu-tu noa inau no hehuka tewa nea. Reiso inamu oi mka ne hehuka tewa nea.”
Oyo Samuel iroto-roto Agag mai Gilgal. Iroto-rotoi Anahatana inoo.