16
Anahatana Inini Daud Tau Ia Onate aia
1 Anahatana iasau osi Samuel iahata, “Ano mka anomu repunoku Saul rotu-tu inasa? Upeneku tau ia iuna aia tau omi Israel nea. Masi anana mina zaitun mkane oyo aeua ria nia Betlehem. Aeua ria ia waini nanai Isai. Tau sae? Unini anai isa tau aia nea.”
2 Ne Samuel on poe iasei sanrei, “Mka ueuku sapani? Mka Saul iatinu oyo ihunuku tea.”
Iahata, “Rori koropou anae isa. Asau, ‘Nanie ukenu koropou anae rei osi Anahatana.’ 3 Nanie kenui nea, anaha runa Isai na ipusu karisaa rei. Mka uaisosia auna sae isa. Mka ahiti ia waini uasau osia. Ahitiki tau ia onate aia.”
4 Anahatana iaisosi Samuel sanrei, Samuel ipusui. Ihokai ria Betlehem oyo sio onata tau niane rei okana-kananunu okaitau ohunu ruao. Reiso oasei, “Upu. Ahokaya mai tau iake te tewa?”
5 “E-e. Iake. Uhokaku mai nanie ukenu makapana osi Anahatana. Reiso oatipusi mo rosau na okenu makapana okataku.”
Oyo iatipusi Isai runa ne hehuka no rosau samatoro ianaha runaso na okenu makapana okatai.
6 Pusiso oamanouso nea oyo Samuel inoo Eliab, Isai anai hanaie rei. Iahata pani anoi, “E-e. Ia reini sahoro Anahatana ininiki.”
7 Ne Anahatana iasau osi Samuel iahata, “Pene anini apusu nitae. Pene anini ia waini nooi iake, ia waini ia noa-noae. Au unini ia tewa. Au unoo sani tumatau onoo tewa. Tumata inoo nitae, ne au unoo tumata anoi.”
8 Ita Isai ioi anai hanaie Abinadab. Iaisosiki ieui pani Samuel. Hoka pani oyo Samuel iasau iahata, “Ia iae, Anahatana ininiki tewa.”
9 Ita Isai iaisosi Syama ihuu. Ihuu oyo Samuel iahata, “Ia iae, Anahatana ininiki tewa.”
10 Reiso Isai iaisosi ne hehuka hanaia ituso oeu pani Samuel ia isa pusi ia isa ne Samuel iahata, “Sio reimo, Anahatana ininiso tewa.”
11 Oyo Samuel iasei tau Isai, “Sio reini mo, sio me hehuka hanaia pusiso nea?”
Iahata, “Nesi ia osa asi. Ia iki muie. Ne waini isaka we rompau.”
Iahata, “Aisosiso oeu oiki mai. Tau sae? Munata ia ihokai tewasi, mka ita iai tewa.”
12 Reiso Isai iaisosiso oi ia ikine rei. Ihokai poe oyo nooi ia hehuke waini nooi ia iake. Ikarihurui. Matai usena iaka. Oyo Anahatana iasau osi Samuel, “Ia reini sahoro uniniki. Masi ahitiki.”
13 Reiso Samuel inana mina zaitun rei samatoro isonai roe Daud unui. Isonai ihitiki. Nea kakau pusiso onoo. On ranie hatae rei Daud isupu kawasa rerihoni Anahatana Ne Inaha. Anahatana Ne Inaha ikatai sui osa. Samuel ihitiki suka oyo inuniki nau nia Rama honu.
Daud Ianori Runa Saul
14 Anahatana ne Inaha ieu iarihoni Saul nea. Anahatana itapi sakahatene rekarotai. 15 Reiso ne makahaia oasau oahata, “Mania upu. Ami anei ata Anahatana itapi sakahatene rekarotaya. 16 Reiso ami nanie anina ia isa waini ianei iaise maisene wani nooi sani gitar. Mka iaise ne maisene rei panuhu sakahatene rei rekarotaya. Iaisei oyo mka ano ahana iake honu.”
17 Iahata, “Masi onina ia isa waini ianei iaise maisene rei iake na ororiki mai.”
18 Ne makahaie isa on poe iasau, “Upuku. Isai anai hanaie isa ianei iaise iake. Isai iruei poe nia Betlehem. Ia Betlehem. Anai hanaie rei ia ne parane. Ianei iahita. Ianamana iake, nooi iake. Anahatana ikata runai.”
19 Reiso Saul iaisosi sio umau poe Isai na oasau sanrei, “Masi aisosi anamu hanaie Daud mai. Daud ia waini isaka rompau rei. Aisosiki mai tanuku ee.”
20 Reiso Isai iaisosi Daud pani tanui. Iaisosiki ieu ikata keledai isa wani repunia porotiu. (Keledai, nooi sani naitanane ne ikine.) Iaisosiki ieu ikata keledai rei runa une-une anae isa na une-une unte wani sio oaiinui tau anggur nene sanaute. 21 Daud ihokai pani Saul, ianori runai iaise maisene rei. Saul anoi runai reiso ininiki na irori ne atiene, ne henue, ne tunue. 22 Iaisosi ia isa ieu poe Isai iaisosiki iasau sanrei. Iahata, “Anoku runa Daud. Tapiki iruei mai rei ikataku na ianori runaku.”
23 Reiso Anahatana itapi sakahatene rei rekarota Saul oyo Daud inana ne maisene iaisei. Oyo sakahatene rei ereeu rerihoniki. Ereeu rerihoniki oyo anoi rematurui. Iahana iake nea.