¹ Daud ianamana runa Saul suka, oyo Saul anai hanaie, Yonatan ioiki tau wanini. Anoi runa Daud sani anoi runa ruai. ² Oni ranie hatae rei Daud ikata-kata Saul. Saul itapiki inuniki poe amai ne numa tewa nea. ³ Yonatan anoi runa Daud reiso isopa ata mka iuna ne neta tanui rotu-tu ria supani. ⁴ Yonatan inosu ne papi naue oyo iruiki osi Daud. Iruiki runa ne papi manahitane, ne tunue, ne henue, runa ne koropou unte.

⁵ Saul iaisosi Daud iahita, ne untu sui osa. Reiso ihitiki tau ia mainae tau ne soratatua. Saul iuna sanrei, pusiso runa ne kapitana no suka.

⁶ Daud ihunu ia Filistin rei nea oyo sio soratatua pusiso onuniso. Sui kotau pusire sui Israel sio pinau ohokaso arihoni no kotau rai oatapea ia onate aia Saul. Sio ohete ahinaya anoo mirika. Sio omaraso. Oaise tihana kapirana waroni nene mamono inata. Oaise sae isa nooi sani gitar. ⁷ Sio omara-maraso ohete-hete ahinae sanrei, “Saul ihunu sio nihun-nihun ne Daud ihunu sio nihu hutu-hutusa.”

⁸ Saul iatinu sanrei, anoi eresaa. Iahata pani anoi, “Sio oamanaku ata Daud ihunu sio nihu hutu-hutusa. Ne sio oamanaku ata au uhunu sio nihun-nihun mani. Mka sio ohitiki tau aia tea.”

⁹ Oni ranie hatae rei Saul ianana Daud.

¹⁰ Nene hanu roe waipa ne numa ikata ne atiene iruni runa Anahatana ne anamanaya. Sira taa Anahatana itapi sakahatene rekarotai. Taa sanrei oyo ianamana sani imukei. Daud waini iaise maisene nooi sani gitar sani sui osa. ¹¹ Saul iahata pani anoi, “Urau Daud tau atiene rei eresuhoi rekahuu kasunepene.”

Oyo irau Daud nai ua. Ne Daud iatanohoi reiso irau mosai tewa.

¹² Saul ianei ata Anahatana ikata runa Daud ne ieu iarihoni Saul ruai nea. Reiso ikaitau Daud. ¹³ Taa sanrei ihiti Daud tau ia kapitane tau sio soratatua nihun na pene ino-nooi mai ne numa. Reiso Daud iaisosi ne soratatua tau manahitana pusire. ¹⁴ Anahatana ikata runai reiso ne taneiu pusire raeu iake. ¹⁵ Saul inoo ata ne taneiu pusire raeu iake reiso ikaitaui mainae. ¹⁶ Ne sio Israel runa sio Yehuda pusiso anoo runai. Iaisosiso tau no manahitana reiso anoo runai.

¹⁷ Saul inina na sio Filistin ohunu Daud tau manahitane. Na pene ruai ihunui. Reiso tau ranie hatae isa Saul iasau osi Daud, “Mai. Mka urui anaku pina manaonete, Merab, osia ananai. Hete sae, ano anori runaku asi. Anori runaku auna ano soratatue wani me parane na ahita osi Anahatana.”

Iahata pani anoi, “Daud iahita, kani mka sio Filistin ohunui?”

¹⁸ Iahata, “Upu. Au reini au seia? Ami mani ipane mo ikine mani. Sapani na au una msahane tanua?”

¹⁹ Ne Daud nanie inana Merab nea, anei tewa, Saul iunai inanai Adriel, arihoni Mehola.

²⁰ Ne Saul anai pina muie tunne, Mikhal, anoi runa Daud. Taa Saul iatinu anamanae rei ia ne suka. ²¹ Iasau pani anoi, iahata, “Iake. Urui Mikhal osi Daud. Uruiki na uakarota Daud na sio Filistin ohunui.”

Saul iasau osi Daud. Iahata, “Nai ua nea urui arena osia na auna we msahane.”

²² Oyo iaisosi ne makahaia na oasau pannuhu huie osi Daud. Oasau oahata, “Anahatana ia onate aia anoi runaya na ne makahaia pusiso, reiso muie reini ano ananai iake.” ²³ Reiso sio oasau anamanae rei osi Daud. Ia iasau, “Sapani na au mosokinie reini usenu kua hunonini? Au mosokinie samatoro sio panesi oationaku tewa.”

²⁴ Sio makahaia osima runa Daud ne anamanaya rai osi aia Saul. ²⁵ Reiso Saul iaisosiso oasau osi Daud sanrei, “Wani ia onate aia inina tau anai pina hunonini mo, ahunu sio Filistin sio utuni na arehiso. Arehiso na anuni orori no unta. Sio ohunu ita reiso ita ihunu sio oi.” (Ne areini sahoro Saul ne maue na sio Filistin ohunu Daud.)

²⁶ Ne makahaia oasau na anamanaya rai osi Daud. Iatinu tau Saul ne anamanaya rai iake. Nanie iuna ia onate aia ne msahane. Reiso oaunutu umetene na Daud ihunu sio Filistin rei. Panuhu umetene tewasi oimo, ²⁷ ieu runa ne netau ohunu sio Filistin sio utuni ua. Ohunuso oyo onana no unte samatoro Daud irui pusire osi Saul. Irui pusire na Daud iuna ia msaha aia. Oyo Saul irui anai pina Mikhal na inanai.

²⁸ Tau rei Saul ianei ata Anahatana ikata runa Daud. Ianei ata anai pina iae anoi runa Daud. ²⁹ Reiso Saul ikaitau hunu ruai mainae tau Daud. Na ipenei tanui rotu-tu imatai.

³⁰ Sio Filistin ohokaso oahita runa sio Israel supani mani Daud ihunu panesi arihoni Saul ne kapitana tamena. Reiso sio Israel ohete-hete Daud nanai.