19
Saul Nanie Ihunu Daud
1 Saul iasau osi anai hanaie Yonatan runa ne makahaia pusiso. Iahata, “Mai na ihunu Daud.”
Ne Yonatan anoi runa Daud nai osa, 2 reiso iasau osi Daud sanrei, “Amaku inina nanie ihunua. Reiso asaka-saka ruamu. Hanu roe omnanoe auhunia pani nisi na anapaku pani rei. 3 Au mka ueu ukata amaku pani naniamu wamo auhunia rei na aoo hainekea. Oyo mka uanamana rerihonia osi amaku. Au mka unoo runa uatinu ne anamanaya sapani na mka usima osia.”
4 Reiso nene hanu omnanoe sanrei oyo Yonatan ianamana runa amai pani nisi wapani Daud iauhuniki rei. Iahata, “Ama. Ano pene apalalosa ahunu Daud. Tea mo ia ipalalosa tanua tewa. Ne iakahaia runa ne mkonaya pusire. 5 Ia irui ne inaha osi Goliat ia Filistin rei ne Daud ihunui. Anahatana irui untu mainae osi ita Israel. Anahatana iakahai Daud reiso ita Israel re untu mainae nea. Ama, ano ruamu anoo manahitane rei na anomu mirike. Reiso ano nanie ahunu ia waini ne isanae tewa rei taa hae?”
6 Saul iatinu Yonatan ne anamanaya oyo isopa, “Anahatana inoota. Au mka uhunu Daud tewa.”
7 Reiso Yonatan ioi Daud iruni sae wani amai uaso oanamanai. Oyo ieu ikata Daud poe amai, Saul, oyo Daud ianori runai sani naone rei.
8 Sio Israel oahita runa sio Filistin honu oyo Daud ieu iahita runaso. Ihita hunu sio panesi oyo sio umau orumaso.
9 Ne taue isa Saul iruei pani ne numa anoe iatinu Daud ne maisene wani nooi sani gitar. Saul ipusu Anahatana ia-ia tewa nea reiso itapi sakahatene rekarotai honu. Samatoro Saul waimo iakahuu ne atiene. 10 Sakahatene rekarotai reiso nanie irau Daud eresonai rekahuu kasunepene. Ne Daud iatanoho reiso atiene rekahuu kasunepene mani. Nene mono rei oyo Daud irumai iapuheu ruai.
11 Ne pumono rei oyo Saul iaisosi ne makahaia oeuso pani Daud ne numa na osaka-sakai rotu-tu omnanoe na nanie ohunui. Ne sahai Mikhal iasau osiki sanrei. Iahata, “Munata arumaya tau pumono reini tewa, mo hanu roe omnanoe tunne mka sio ohunua.”
12 Oyo sahai iautunui arihoni yanela oyo irumai. Irumai reiso sio ohunui tewa. 13 Taa sanrei oyo sahai inana no anahatana wani titue tewa nene siaie oyo iuna siaie rei erenekei poe koi samatoro inana une-une hunua iaunuture roe unui oyo iasinehai tau nipae.
14 Saul iaisosi ne makahaia nanie osota Daud. Ohokaso pani Daud ne numa nanie osotai ne sahai iahata, “Daud waini ikupui.”
15 Ne Saul iaisosiso honu, iahata, “Masi oeu pani onoo tau ruamo mo matamo kania na ororiki mai runa ne koi rei na uhunui.”
16 Oyo Saul ne makahaia rei onususo pani kamar anoe. Onususo samatoro onoo siaie rei poe ne koi rei runa une-une hunua wamo siaie unue rei. 17 Saul iasau osi anai pina, iahata, “Ano akarotaku tau sae? Ano atapi we nisa rei irumai.”
Anai pina on poe iasau iahata, “Daud iasau iahata, ‘Tapiku na urumaku. Tewa mo mka uhunua.’”
18 Taa Daud irumai oyo ieui ria Samuel ne numa ria nia Rama. Hoka ria oyo isima inahu Saul iahata, “Saul nanie ihunuku”. Isima suka oyo uaso oeuso pani tihue Nayot na orueso pani rei. 19 Taa Saul iatinu ata Daud waira Nayot haineke Rama. 20 Reiso Saul iaisosi ne makahaia nanie osota Daud. Ne ohokaso ria osupu sio mamsima runa Anahatana ne anamanaya umau oyo Anahatana ne Inaha ihokai mai Saul ne makahaia rei. Ihokai mai tanuso reiso omara-maraso runa oaka-kapona okata sio mamsima runa Anahatana ne anamanaya rei. Samuel sahoro iai-aisosiso. 21 Ita Saul iatinu sanrei honu reiso iaisosi sio makahaia umau honu. Ne hoka ria sira ita sira tau Anahatana ne Inaha ihokai tanuso honu. Oyo omara-maraso oaka-kapona sani sio sinasi. Ita Saul iaisosi sio umau honu. Ohokaso mai tanuso oyo sira tau Anahatana ne Inaha ihokai mai tanuso sirinia. Reiso omara-maraso oaka-kaponaso okata sio wasoni sinasi honu. 22 Ita Saul ruai ieui ria Rama. Ihokai ria parike wani mainae ria Sekhu. Hoka ria oyo iasei, “Samuel runa Daud uaso wasoni paka supa?”
Oyo sio ria rei osima osiki oahata, “Uaso wasora Nayot haineke Rama.”
23 Reiso ieui ria. Ne ia iae, Anahatana ne Inaha ihokai mai tanui. Sira tau imara-marai runa iaka-kapona sui arena rotu-tu ihokai ria Nayot haineke Rama. 24 Taa ihoka ria oyo inosu ne apia pusire samatoro imara-marai runa iaka-kapona mai Samuel uai anoe. Iamnohoi poe tuamane inekei sanakui rotu-tu pumono ita rotu-tu manahane honu. Reiso sio oasei oahata, “Saul iae ia mamsima runa Anahatana ne anamanaya?”