¹ Reiso Daud irumai arihoni tihue Nayot rei mai nia Rama na ieui pani Yonatan oyo iasei tanui. Iahata, “Au we masana sae? Au una kahatene sae runa we rosa sae rei reiso nanie amamu ihunuku?”

² Yonatan on poe iasau, “Bisa tewa. Ano mo mka amaku ihunua tewa. Amaku mo isima na ne kaheuta pusire osiku, waroni mainaya, waroni mainaya tewa. Reiso amaku bisa iauhuni ne mauhunita arihoni au tewa. Reiso ano asau ata amaku nanie ihunui, areimo titue tewa.”

³ Iahata, “Amamu ianei ata ano anomu runa au mainae. Reiso ia mka iauhuni ata nanie ihunuku. Isima osia tewa. Munata isima mka ano anomu repunokoku. Usopa tau Anahatana waini iamahaiki nanai runa ano wani amahaia nanamu au haineke umataku nea.”

⁴ Iahata, “Sae wani ano ainisiki mka au unai osia.”

⁵ Iahata, “Ano mo anei tea. Hanroe karisaa tau Huna Honue. Kahurae uaiku ukata amamu. Ne munata ano amanaku, au mka ueu uauhuniku pani nisi rotu-tu pouarei mono-mono. ⁶ Munata amamu iasei runaku sanrei, ‘Daud ihokai mai tewa taa haa rei?’ Asau osi amamu ahata, ‘Daud iainisi arihoniku ata nanie inuniki pani ne niane, Betlehem mo, tau wasopani ouna karisaa okenu makapana osi Anahatana tau musum osa osi no ipane pusiki.’ ⁷ Munata amamu iasau iahata, ‘Iake.’ reimo mka ihunuku tewa. Ne munata anoi eresaa reimo ano anei nanie ihunuku. ⁸ Au uainisi arihonia, tau ita isopa nea. Arime runa re anamanaya waroni isopa rei. Isopa Anahatana inoota. Ne munata au usana, ahunuku nea. Ne pene aruiku osi amamu ihunuku.”

⁹ Iahata, “Pene anomu reuponu. Munata uanei titue-tue amaku nanie ihunua, mka usima osia.”

¹⁰ Iahata, “Munata amamu iakapuku tanua mka ia seia isima osiku?”

¹¹ Iahata, “Mai na uata ieuta pani nisi.” Oyo uaso oeu okata umau.

¹² Hoka pani, Yonatan iasau osi Daud. Iahata, “Mai na uata isopa reiso uainisi na Upuri Anahatana waini ita Israel iainisi iainaa runai rei inoo uata! Hanroe te pouarei ranie sanrei mka uasei tau amaku rerihoni ano. Munata anoi iake runaya mka usima osia. ¹³ Ne munata tewa, na nanie ihunua iae mka usima osia. Na ano arumaya na apuheu ruamu. Munata usima osia tewa uainisi na Anahatana ihunuku. Uainisi na Anahatana ikata runaya sani ikata runa amaku oi. ¹⁴ Munata au uamahaiku asi anomu erepeka runa uata isopa na Anahatana inoo. Anomu erepeka iakahai umau sani isopa rei. Ne munata umataku nea mo, ¹⁵ akahai we hehuka, wea momou, wea upu pani muie rotu-tu ria supani. Masike Anahatana ihunu me nisau pusiso iae, ¹⁶ iakahai umau sirinia. Pene anomu kanihue. Munata anomu kanihue Anahatana mka iapasanaya.”

¹⁷ Reiso nai ua nea Yonatan iaisosi Daud isopa ata anoi runai, noo sani anoi runa ruai oi.

¹⁸ Yonatan iahata, “Hanroe karisaa tau Huna Honue. Mka amaku ianei ata ano ahoka tewa. Tau sae inoo naniamu pani meya wani nanie iaita tanui huie. ¹⁹ Hanroe mani tewa, munata pouarei honu? Mka sapani honu? Reiso masi aeua pani naniamu wani naone ano auhunia rei na auhunia pani hatu waroni sio otanuhahare rei na anapaku. ²⁰ Pouarei au mka uana hatu wapani ano auhunia rei tau niuna hataya tonu. Uanai sani nanie ratakaleleso. ²¹ Oyo mka uaisosi we maniane iroma niuna rai. Oyo mka uasau sanrei, ‘Ee. Anana niuna waroni on mai hae reini.’ Areimo ano anei ata iake. Ahokaya iake. Au usopa tau Anahatana waini iamahaiki ano mo mka amaku ihunua tewa. ²² Ne munata uasau sanrei, ‘Ee. Niuna raimo waropa hainau reipani.’ Areimo Anahatana iaisosia arumaya. Reiso arumaya. ²³ Uainisi na Anahatana isaka na uata irime runa re anamanaya waroni uata isopa rei rotu-tu ria supani.”

²⁴ Reiso Daud iauhuniki pani nisi rei. Tau karisaa Huna Honue ia onate aia Saul ihokai nanie iaiki. ²⁵ Iruei haineke kasunepene, naniai wani iru-ruei rei sirinia. Yonatan iruei iamanane amai. Abner mai ia onate aia nusui. Ne Daud naniai mo, huie. ²⁶ Ne ia onate aia iasau runai tewasi. Iasau pani anoi, “Kani sae isa eremunai na iapaputiki reiso ihokai iai tewa?”

²⁷ Nene hanu sanrei, tau karisaa Huna Honue nene onona ua, Daud naniai mo huie sirinia. Reiso ia onate aia iasei tau Yonatan. Iahata, “Yonatan. Ranie hatae reini runa potusi Daud ihoka mai iaiki tewa taa hae?”

²⁸ Iahata, “Upu. Iainisi iarihoniku nanie ieui pani Betlehem. ²⁹ Iahata, ‘Uainisi arihonia na ununiku pani Betlehem. Tau sae ami ipane taue pusima nanie kenu makapana osi Anahatana. Kakaku iaunau runaku. Reiso munata anomu runaku atapiku ununiku ee. Ununiku pani wea kakau.’ Reiso ihokai mai iai ikatata tewa rei tea upu.”

³⁰ Ia onate aia iatinu sanrei reiso anoi eresaa. Iahata, “Ano iki ana hua! Au mato uanei ano auni mai Daud. Auna pumaa ruamu runa inamu! ³¹ Ano anei tewa? Munata Daud iamahaiki mo mka ano auna aia tewa mai otoe reini. Reiso aisosi sio umau oninai na ororiki mai kahurae ita ihunui!”

³² Iahata, “Ano. Ano nanie ahunu Daud taa hae? Ia ne masana sae?”

³³ Amai iatinu sanrei oyo inana atiene iraui nanie ihunui. Reiso Yonatan ianei ata amai nanie ihunu Daud sirinia. ³⁴ Anoi eresaa reiso iai tewa nea. Ieu iarihoni meya rei nea. Tau karisaa Huna Honue nene onona ua rai iai sae isa tewa. Anoi iake tewa tau iatinu amai iuna pananoko Daud noi mansia hutue.

³⁵ Nene hanu sanrei Yonatan ieui pani nisi na nanie isupu Daud sani wani uaso oasau osi umau rei. Ia irori ne ia iki maniane isa. Ia ikine rei, ia iki hanaie. ³⁶ Iasau osiki iahata, “Asaka aroma niuna waroni mka au uana pani hatu tinaie reipani.”

Ia iki hanaie rei suru pani iruma oyo Yonatan iana iniku ia ikine rei. ³⁷ Taa ia ikine rei ihokai pani niune nahae rei, Yonatan iahata, “Ee. Niuna raimo waromo hainau reipani! ³⁸ Rapu mkane! Pene ataehe.”

Ia ikine rei iroma niune rei oyo iroriki osi Yonatan. ³⁹ Ia ianei sae wani Yonatan iasaure osiki tewa. Anamanaya raimo hasae Daud runa Yonatan ruao sahoro oaneire. ⁴⁰ Taa sanrei oyo Yonatan irui ne henue runa niuna rai osi ne maniane rei, oyo iahata, “Anuni rori henue runa niuna rai poe numa.” Reiso ia ikine rei irorire poe kota.

⁴¹ Taa ia ikine rei suru poe ieu, oyo Daud ihokai arihoni naniai wani aihuniki rei. Naniai rei pani hatu muie. Ihokai oyo ihahue nai tonu mai Yonatan. Uaso orani omuki umau. Daud anoi repunoko ruai erenesi Yonatan. ⁴² Taa sanrei oyo Yonatan iahata, “Uainisi na Anahatana ikata runaya. Ita isopa osi umau Anahatana inoota. Isopa iahata, ‘Ainisi na Anahatana isaka na uata runa re hehuka, rea momou, iakahai umau sani uata isopa rei rotu-tu ria supani.”

Oanamana pusi oyo Daud ieui, oo Yonatan inuniki poe kota.