ईसू मारी जियोम पाडरानो
16
1 पाबूरान चिरीक पोलेक मगदलीत मरीयम,
याकूबकूल ईय्या मरीयम,
आरू सलोमी,
नातेक बिड़ी किली ईसून मोड़ी ती मेरपीक बास तो नेय पात्तोव।
2 मारी ओपतेत पोईल चिरीक वेवूके,
पोकाल पेपेके आ आयचील ईसून मोड़ीन इडरान मोटतेल चेन्डूव।
3 आव “मोट कोलकीत वेल ती मूयूरान केल्लीन आमूंग एड ओड़पीक चियराड बे?”
एनी तामूंग तामी ऊबूरूव।
4 आव एके आना एदी किली चूड़ेक आ वेल तो बेड़तो केल्लीन एड आय आले ओड़पीक मेन्डीड।
5 आदूग आव मोट कोलकी बीतराम तान्नेक ओक इलेड रेच्चा विल कुड़ता तुन्दी किली वेला टिटाक उन्डी मेन्डीड।
आव ओनीन चूड़ी किली बाकयाक चेन्डोव।
6 ओड एके “ईम बाकयाकमोर।
कुरूस पारे ती कोटीकतेर जे?
आ नासरत तो ईसून मोड़ीन चूड़ू इना वेञ्ञोर नार।
ओड इना चिल्लाड;
जियोम पाड्डी चुलतेड नाड।
ओन मोड़ीन इडरान पाड्डीन चूड़ूर।
7 आरू ईम चेनी किली ओन चेलालेरीन आरू पतरसीन बेले ‘ईसू इमूंग ले मुन्नी गलील ती चेनमेड।
ओड पोक्की मेन्डान आकाट ओनीन ईम आना चूड़रार एनी पोकूर’” एनी पोक्केड।
8 तेबे आव एके नारचूरानूग तिरी उयरान आकाट एरी किली मोट कोलकी तीग वाल पेची किली तूलोव।
आव नारची मेन्डानूग एरीनी नाती नी पोकावी।
ईसू देका पाडरान पाटा
9 आनातले ओपतेत पोईल चिरीक पोकाई ईसू मारी जियोम पाड्डी चुलपेक,
ओड एके पोईल-पोईल मगदलीत मरीयमूग देका पाट्टेड।
मुन्नी आ आयालीन कान तीग ईसू सात गोटा बूत डुमेलीन वालीक मेन्डीड।a
10 ईसून चेलालेर जियोम केरूरान आकाट एरी किली आड़ आड़ी मेनेक आद चेनी किली “ईसू आनूंग देका पाट्टेड” एनी पोकोतो।
11 “एरोड ईसू एपोट जियोम मेन्डाड आरू ओनीन आन चूड़ेन” एनी आद पोकरान पाटेन ओर वेट्टेर,
एरोड बेले बिसवात चाजेरा।
ईसू इरूल चेलालेरूग देका पाडरानो
12 पिटतेल ईसू तान्न चेलालेर कान तीग इरूलूग ओर ओक पोलूब चेनेक आवूर मुरीत एरी देका पाट्टेड।
13 ओर मारी वेरी किली आवूर चेलालेरीन पोक चिञ्ञेर।
एरोड ओर एके आदीन बेले बिसवात चाजेरा।
ईसू इगारा जान चेलालेरूग देका पाडरानो
14 जाम्मेन ले पिटतेल मारी ईसू इगारा जान चेलालेर तिनूंग उन्डी मेनेक ओरूग देका पाट्टेड।
ईसू ओरीन,
“आनीन मापोरबू जियोम पाटतीकतान पिटतेल ‘ओनीन चूड़ोम’ एनी पोकरानूग नांग ऊबागेरी मेन्न तो लोग एरी मानोरा आरू बिसवात चाजोरा” एनी ओक पोद्द रिच्चोड पोक्केड।
15 आरू ईसू ओरीन “गुलाय मोंजीपूर ती चेनी किली एडो पाटेन जाम्मा जातूल-जातूल तो लोगीन पोक चियूर।
16 एड एरको आनीन बिसवात चाजी बपतीसमा एतानेर बाचूरार।
आनीन बिसवात चाजा लोग एके डेन्ड बेटूराड।
17-18 आनीन बिसवात चाजूरानेर एके ईटो पोरलेत काम तो चिनेल टोटीकतार:
आन्न पिदीर ती बूत डुमेन वालीकतार,
पुन पाटेन ऊबूरार।
बाम्बीन पेडोड आरू मोरेन उनोड बेले आव ओरूग एटनी एराया।
ओर नोयरान लोगीन ताम्म केय्योड टोडोड नोयरान लोग उजरूरार।
ईटो बानील आनीन बिसवात चाजूरानेर चाजू नाम्बीकतार” एट्टेड।
मापोरबू, ईसून सरग ती उञ्ञेड