ईसून चेयतान पोरकूरानो
4
1 आनातले ईसू नाती केचूर चिला जियोमीन ताकोतीन चेड़ीगेन बेटी किली,
एरदन पेरेड लेग्गाट तीग मेल्लेड;
आरू नाती केचूर चिला जियोम ओनीन उसकाकतानूग चिड़ा पाड ती चेन्डेड।
2 आरू चालीस दिनेल चेयतान पिदीर तो बूत डुमेलीन मुकीयाट a ओनीन पोरकूरू आरू आ वादेक ईसू नाती तिनाका नीवता मेन्डीड आरू आ दिनेल पूर्रानूग ओनूग पोट्टा आन्डोतो।
3 तेबे चेयतान ईसून,
“ईन चेत्ते मापोरबून चिन्ड आय एरोड,
ई केल्लीन पोक,
रोटील एरकोव” एनी पोक्कोतो।
4 आदूग ईसू आदीन,
“‘आमान रोटीलीन तिन्दान ती मांजा जियोम मेनाडा’b एनी मापोरबून कागेत ती लिका मेन्डा” एट्टेड।
5 आनातले मारी चेयतान ओक निक्के डेंगाट पाड ती ओनीन उञ्ञो आरू डेन्डीक तीग ई मोंजीपूर तो जाम्मा राजूलीन टोटीकतो।
6 आरू ओनीन,
“आन ई मोंजीपूरीन आंगरूरान पान्नीन आरू आदीन निरबे चाबाव तो मोल्लेत बानीलीन इनूंग चियरान।
ईव जाम्मा आन्न पान्न ती मेन्डाव आरू आन एरीन मेन्न चाजोड ओनूग जाम्मा चियू नाम्बीकतान।
7 आदूगी ईन केलूल पाड्डी आनीन मोड़कोड ई जाम्मा इनूंग एर चेन्डाव” एनी पोक्कोतो।
8 आदूग ईसू चेयतानीन,
“‘ईन आमान आपला यावे मापोरबूनी मोड़कू आरू आमान ओन सेवा ई चाज’c एनी मापोरबून कागेत ती लिका मेन्डा” एनी पोक्केड।
9 तेबे चेयतान ईसून एरूसेलेम ती उय्यी गुडीत चिक ती नीतीकतो आरू ओनीन,
“ईन मापोरबून चिन्ड आय एरोड,
इना तीग किड़ी तिर्र।
10 एटे एनोड,
‘इनीन राका चाजू मापोरबू तान्न सरग दूतकूलीन इन बीतेर ती तियारताड’d
11 आरू ‘इन पोदोमूल केल्ल ती पोरचा मेनको एनी ओर इनीन आपला केय्यूल ती पोडी एतीकतार’e एनी मापोरबून कागेत ती लिका मेन्डा” एट्टो।
12 आदूग ईसू चेयतानीन,
“‘ईन,
आपला मापोरबू यावेन पोरकूरानो एरा’f एनी मापोरबून कागेत ती लिका मेन्डा एनी पोक्केड।
13 चेयतान ईसून जाम्मा टिटाक ले पोरकू पोल्लान पिटतेल,
डेन्डीक तीग ओन लेग्गाट तीग गूचोतो।
ईसू काम चाजू मुरीयाकतानो
14 आनातले ईसू मापोरबून जियोमीन ताकोत तीग गलील देचे ती चेन्डेड आरू ओन बीतेर तो पाटेल लेग्गे लेग्गेत जाम्मा देचेल ती वेलोव।
15 आरू ओड एऊदीकूल बिन्ती जोड़रान ओलेकूल ती मेरचीकतीड आरू जाम्मा लोग ओनीन जाम्मेग ले बेड़तेड आय एनी मानूरीर।
नासरत गेड़े ती ईसू
16 आनातले ओड तान चान्दरान नासरत पोलूब ती वेञ्ञेड।
आरू रोजेत आकाट पाबूरान चिरीक एऊदीकूल बिन्ती जोड़रान ओलेक ती चेन्डेड आरू पोड़ू निलतेड।
17 आरू मापोरबून कान तीग काबेर वेन्नी किली लोगीन पोक चियरान एसाया गुरून कागेतीन ओनूग चिञ्ञेर।
आदूग ओड आ तोल तो कागेतीन कुयकीक किलीg ईटे लिकी मेन्डान पाड्डीन बेटेड आरू पोड़ेड:
18 पोरबून जियोम आन्न कान मेन्डा।
एटे एनोड गेरीब लोगीन एडो पाटेन वेनपीक ओड आनीन आचेड नाड
आरू बान्देन ती काटकी एर्रान लोगीन चोड़ाकतान काबेर वेनपीक
आरू कानालेरीन चूड़पीक,
बोजे तीग चेपाक एर्रानेरीन चोड़ाक
19 आरू पोरबून पेम तो बेरेन इसाबीन पोक चियू आनीन चोटतेड नाड”h
एनी पोड़ेड।
20 आनातले ओड कागेतीन बोन्द चाजी किली पारा वालीयालीन केय्य ती चिञ्ञेड आरू किड़ी उन्ड काट्टेड।
एऊदीकूल बिन्ती जोड़रान ओलेक ती जाम्मा लोगीन नेंजेरूल ओन कानी मेन्डूव।
21 तेबे ईसू ओरीन,
“इनेनी मापोरबून कागेत तो ई लिका इम मुन्देल पूरा एञ्ञो” एनी पोक्कू मुरीयाकतेड।
22 तेबे जाम्मा लोग ओन बीतेर ती रेच्चा पोक्केर,
आरू ओन चोन्ड तीग पेतान माया पेम तो पाटेल तीग काबा एञ्ञेर।
आरू “एटे,
ऊड यूसूपीन चिन्ड एरा आदूग?”
एनी पोक्केर।
23 तेबे ईसू ओरीन “ईम आनीन,
‘ए केम्बूर चियरानोतीने!
इनीन ईनी उजराक’ आरू ‘कपरनाऊम ती नातीन-नातीन चाजोत एनी आम वेट्टोम नाम आदीन इना आपला पोरूरान पोलूब ती बेले चाज’ एन्डान पाटेन आनीन चेत्ते पोकरार” एट्टेड।
24 आरू ईसू ओरीन,
“आरो एरको मापोरबून कान तीग काबेर वेन्नी किली लोगीन पोक चियरान गुरून आपला पोलूब ती नी गो मानारा एनी आन इमीन चेत्ते पोक्कूमेन” एट्टेड।
25 आरू मारी,
“आन इमीन चेत्ते पोक्कूमेन मापोरबून कान तीग काबेर वेन्नी किली लोगीन पोक चियरान एलीया गुरून वादेक मुकपोकाल चोय गोटा नेलींगूल आर्रे वाञी पाडोया।
जाम्मा देचे ती निक्के चाकोल पाट्टो।
आतोड इसराएल देचे ती कुबे केटाचील मेन्डूव।
26 एरोड मापोरबू एलीयेन आवीन कान तीग एर कानी चोटपेडा।
आमान सयदेत सारपतीत ओक केटालीन कान चोटतेड।i
27 आरू मापोरबून कान तीग काबेर वेन्नी किली लोगीन पोक चियरान एलीसाल गुरून वादेक इसराएल देचे ती कुबे कोड़ बेमारूलतेर मेन्डीर।
एरोड सूरीया देचेतेड नामानीन चायी किली ओर कान तीग एडी बेले उजरी किली ओगराक एरेरा” एट्टेड।j
28 तेबे ई पाटेन वेन्नी किली एऊदीकूल बिन्ती जोड़रान ओलेक ती मेन्डान जाम्मा लोग निक्के रिच एञ्ञेर।k
29 आरू ओर चुलची किली ओनीन आ गेड़े तीग वाल पुच्चेर आरू ताम्म पोलूब उन्डी मेन्डान आ कोप्पा चिक तीग ऊनीन तीनपार एनी उञ्ञेर।
30 एरोड ईसू ओर कान तीग गूची किली नाड़बूलोड पेची चेन्डेड।
बूत डुमा चुम्मी मेन्डान मांजेन उजराकतानो
31 मारी ओड गलील देचेत कपरनाऊम गेड़े ती चेनी किली पाबूरान चिरीक ती लोगीन मेरचीकतीड।
32 आरू ओन पाटेल पान्न तोव मेन्डानूग जाम्मा लोग ओन पाटेन वेन्नी काबा एञ्ञेर।
33 एऊदीकूल बिन्ती जोड़रान ओलेक ती ओकूर बूत डुमा चुम्मी मेन्डानेड मेन्डीड।
ओड ईसून,
34 “ए नासरत तो ईसूने!
ईन इना तीग गूच।
इनूंग आम्मोड नातो काम मेन्डा?
एटे ईन आमीन नाचाक वेञ्ञोत नात आदूग?
ईन एड आय एनी आन पुट्टेन।
ईन मापोरबून नाती केचूर चिलायोत आय” एनी निक्के जोड़ ती कोलार एञ्ञेड।
35 तेबे ईसू एके ओनीन कावडी किली,
“किटूक मेन आरू ओन कान तीग पेची किली चेन” एनी पोक्केड।
तेबे बूत डुमा ओनीन ओर नाड़बूल आपटाक किली ओनीन एटनी चाजाका ओन कान तीग पेची चेन्डो।
36 आदूग जाम्मा लोग काबा एञ्ञेर आरू,
“ईव एट्टो पोद्दूल आय?
ओड पान्न आरू ताकोत तीग बूत डुमेलीन बेले तियारूकमेड आरू आव पेची किली चेनमोव” एनी तामूंग तामी ऊबूरीर
37 आरू ओड चाजूरान कामूल इसाब तो काबेर बोँरेक मेन्डान ओक-ओक पाडकूल ती वेलोतो।
पतरसीन आञ्ञेन आरू आवूर लोगीन उजराकतानो
38 ईसू चुलची किली एऊदीकूल बिन्ती जोड़रान ओलेक तीग पेची सिमोनीनl ओलेक चेन्डेड।
आना सिमोनीन आञ्ञा निक्के नूम्बीरूग माड्डी मेन्डू।
आरू ओर आदीन उजराक ईसून गुवारतेर।
39 ईसू आदीन लेग्गे निलची किली नूम्बीरीन कावडेड आरू नूम्बीर चायोतो आरू आद तुरते नी चुलची किली ओरूग मान दान चाजू मुरीयाकतो।
40 मारी पोकाल पाडरान पिटतेल,
पाबूरान चिरीक पोलानूगm एर-एर कान बानीग-बानीग तो बेमारूलतेर मेन्डीर,
ओर जाम्मा लोग ओरीन ओन कान एन्देरनेर।
आदूग ओड ओकूर ओकूरीन पोडे केय्य टोड्डी उजराकतेड।
41 आरू बूत डुमेल बेले “ईन मापोरबून चिन्ड आय” एनी कोलार एरी किली पेच पेची तूलोव।
ओड एके आवीन कावडी किली आवीन पोक्कू इडेडा।
एटे एनोड ईसू ई मसीयाल आय एनी आव पुन्दूव।
ईसू बिन्ती जोड़रान ओलेकूल ती मेरचीकतानो
42 पोका वेवूरानूग ओड आना तीग पेची किली ओक चिम चामनाय तो पाड ती चेन्डेड।
आरू जोप तो लोग ओनीन कानची-कानची ओन लेग्गाट वेञ्ञेर आरू ओर “ईन आम्म लेग्गाट तीग चेनमेन” एनी तेबाक मुरीयाकतेर।
43 आदूग ओड एके ओरीन “आनूंग मापोरबू आंगरूरान इसाब तो एडो पाटेन आवूर गेड़ेल ती बेले पोक चियरानो आय।
आदूगी आय आनीन मापोरबू चोटतेड नाड” एनी पोक्केड।
44 आटनी एनी किली ओड एऊदीया देचे ती एऊदीकूल बिन्ती जोड़रान ओलेकूल ती मेरचीक-मेरचीक मेट्टेड।