ईसू जियोम पाड्डी चुलतानो
20
1 ओपतेत पोईल चिरीक पोकाल पेपाका मेनेक,
मगदलीत मरीयम ईसून मोड़ीन इडरान गाडारेल चेनी किली मोट कोलकीत वेल ती मूयूरान केल्लीन ओड़पीक मेन्डानोन चुड़ोतो।
2 तेबे आद तूलेरी वेरी किली सिमोन पतरस आरू ईसून लाडराल चेलालीन लेग्गे चेनी किली,
“ओर मोट कोलकी तीग पोरबून उञ्ञेर नार आरू ओनीन आरे इट्टेर नार एनी आम पूनाम” एट्टो।
3 तेबे पतरस आवूर चेलाल चेंगे पेची किली मोटतेल चेन्डेर।
4 ओर इरूल चेंगे-चेंगे तूलूरीर;
एरोड आ आवूर चेलाल पतरसीन ले मुन्देल चेनी किली मोट ती एदेड।
5 आरू ओड मुडी किली बीतराम केचीक किली,
मोल्लेत पोटी गान्डा आना मेन्डानोन चूड़ेड;
एरोड बीतराम तान्नेडा।
6 तेबे सिमोन पतरस ओन पोटतेली एदेरनेड,
आरू मोट बीतराम तान्नी किली मोल्लेत पोटी गान्डा आना मेन्डानोन चूड़ेड।
7 आरू ईसून तेल्ल ती आलची मेन्डीर जे?
आ आंगोची एके,
मोल्लेत गान्डेल ले एलगा ओकान गेड़ीयाक किली इड्डी मेन्डानोन चूड़ेड।
8 तेबे मोट ती मुन्नी एदूरान आवूर चेलाल बेले बीतराम तान्नेड आरू चूड़ेड,
आरू बिसवात चाजेड।
9 एबले बेले ओर ईसू चाय्यरान कान तीग जियोम पाडरानो आय एनी,
मापोरबून कागेत ती मेन्डान लिकेन चोमजेरा।
10 तेबे चेलालेर ताम्म डेरेकेल मेल्ली वेञ्ञेर।
ईसू मगदलीत मरीयमूग देका पाट्टेड
11 एरोड मरीयम एके,
मोटूग ले वाल निलची किली आड़ आड़ी,
मुडी किली मोट बीतराम केचीकतो।
12 आतोड विल गान्डेल नूड़रान इरूल सरग दूतकूलीन ईसून मोड़ी मेन्डू जे?
आना ओकूरीन तेल्ल टिटाक आरू ओकूरीन केलूल टिटाक उन्डी मेन्डानोन चुड़ोतो।
13 ओर आदीन,
“ए बायी,
ईन नांग आड़मोत?”
एट्टेर।
आदूग आद एके,
“ओर आन्न पोरबून उञ्ञेर नार,
आरू ओर ओनीन आरे इट्टेर नार एनी आन पूनान” एट्टो।
14 आटनी एनी किली आद ओरी किली ईसू आना निलची मेन्डानोन चुड़ोतो;
एरोड ओड ईसू आय एनी आद चिताकपोया।
15 ईसू आदीन,
“ए मा,
ईन नांग आड़मोत?
आरू एरीन आय कान्डूकमोत?”
एट्टेड।
आद पार्रीन कामाकतानेड आय एनी चोमजी किली ओनीन,
“सियान,
ईन ओनीन उञ्ञोत नात एरोड,
ओनीन आरे इट्टोत नात आले?,
आनीन पोक चिय आरू आन ओनीन उयरान” एट्टो।
16 ईसू आदीन,
“मरीयम” एनी कूयेड।
आदूग आद ओन टिटाक ओरी किली इबरानी पाटे ती “रबूनी” एट्टो।
रबूनी एनोड ए गुरजी एन्डानो आय।
17 ईसू आदीन,
“आन एबेतार्रे बुवेन लेग्गे पोडी चेनानी,
आदूग ईन आनीन मोटीयाकमेन।
एरोड आन्न चेलालेर लेग्गे चेनी किली,
‘आन आम्म आरू इम बुवा,
आरू आन्न आरू इम मापोरबून लेग्गे पोडी चेनमेन’ एनी पोक काड” एट्टेड।
18 आदूग मगदलीत मरीयम चेनी किली चेलालेरीन,
तान पोरबून चूड़रानोन आरू ओड तानीन पोकरानोन ओरीन वेनपीकतो।
ईसू चेलालेरूग देका पाट्टेड
19 आ ओपतेत पोईल चिरीक,
पुल चुन्दरीग आकाट,
ओन चेलालेर ओक ओलेक ती उलजी किली एऊदीकूलीन सियानकूलीन नार्रूग कापाटीन केटची मेन्डीर।
आतोड ईसू ओर लेग्गे वेरी किली ओर नाड़बूल निलतेड आरू ओरीन,
“इमूंग चुक एरको” एट्टेड।
20 आरू आटनी पोकरान पिटतेल ओड ओरीन तान्न केय्यूल आरू काकचीपेन टोटीकतेड।
तेबे पोरबून चूड़रानूग चेलालेर निक्के वेड़का एञ्ञेर।
21 ईसू ओरीन मारी,
“इमूंग चुक एरको।
आम्म बुवा आनीन चोटतान आकाट आन इमीन चोडूकमेन” एट्टेड।
22 आटनी एनी किली ओड ओर पोडे तान्न नेञालीन ऊन्देड आरू “नाती केचूर चिला जियोमीन बेटूर” एनी किली,
23 “ईम एर पापदेरोमीन माप चाजोड ओरूग मापी टोन्डूरा।
ईम एरूग माप चाजाकोड ओरूग मापी टोन्डाया” एट्टेड।
ईसू आरू तोमाल
24 एरोड बारा जानीन कान तीग ओकूर दिदूमूसa एन्डान तोमाल ईसू आना वेरी मेनेक आना चिल्ला मेन्डीड।
25 आदूग आवूर चेलालेर ओनीन “आम पोरबून चूड़ोम” एट्टेर।
एरोड ओड एके ओरीन,
“आन ओन केय्य पोदोम ती कूटील कोट्टी मेन्डान चिनेन चूड़ी किली आ पाड ती वान्देनोड आरू ओन काकचीपे ती केय्योड ओयगाका आन मुरले बिसवात चाजाना” एट्टेड।
26 आँट दिनेल एर्रान पिटतेल,
ओन चेलालेर मारी ताम्म ओलेकी मेन्डीर आरू तोमाल ओर चेंगे मेन्डीड।
आरू कापाटीन केटची मेन्डीर,
एरोड बेले ईसू ओर नाड़बूल वेरी किली निलतेड आरू,
“इमूंग चुक एरको” एट्टेड।
27 तेबे ओड तोमालीन,
“इन वान्देन इना ओयगू आरू आन्न केय्यीन चूड़ आरू इन केय्यीन नीकी किली आन्न काकचीपे ती बेले ओयगू;
बिसवात चाजायेड मेनमेन;
एरोड बिसवात चाजूरानेड एर” एट्टेड।
28 आदूग तोमाल “ए आन्न पोरबू,
ए आन्न मापोरबू” एट्टेड।
29 ईसू ओनीन,
“ईन गो आनीन चूड़रानूग बिसवात चाजूमोत।
एरोड आनीन चूड़ाका बेले बिसवात चाजूरानेरूग आसतीर एरको” एट्टेड।
ई कागेत नांग लिकूरानो मेन्डा