¹ Imaw ini ang Maayo nga Balità parti kay Hesu-Kristo nga Ongà ng Dios. ² Nagtunà ini sunò sa gingsulat ni Isaias nga mensahiro ng Dios parti sa ginghambay ng Dios sa iya Ongà nga nagahambay, “ ‘Paunahon ko ang akon mensahiro para magpreparar ng dayan sa imo.’ ³ Ini nga mensahiro hay magasinggit sa malangkag nga lugar. Magahambay siya sa mga tawo, ‘Ipreparar nindo ang agihan para sa Ginoo, tadlunga ang dayan nga iya agihan.’ ”

⁴ Nganì natabò ini nang nag-abot si Juan nga Miyugbawtismo sa malangkag nga lugar. Nagawali si Juan sa inda nga nagahambay, “Talikuran nindo ang indo mga salà kag magpabawtismo, kag ang Dios magapatawad sa indo mga salà.” ⁵ Madamò nga tawo ang nagkadto sa iya halin sa mga banwa nga sakop ng Judea, kag madamò gid ang halin sa Jerusalem para magpamatì kay Juan. Ging-akò ninda ang inda mga salà kag gingbawtismuhan niya sinda sa Subà ng Jordan.

⁶ Ang barò ni Juan hay himò sa buyboy ng kamelyo, kag ang iya sinturon hay panit ng hayop. Ang iya pagkaon hay apan kag dugos ng putyukan. ⁷ Imaw ini ang iya ginawali, “May maabot nga masunod sa akon nga mas makagagahom pa sa akon kag indì gid ako angay nga iya maging kabulig.^{a 8} Ako ang nagabawtismo sa indo sa tubì, pero siya ang magabawtismo sa indo sa Espiritu Santo.”

⁹ Wayà madugay, nag-abot si Hesus halin sa Nazaret nga sakop ng probinsya ng Galilea, kag nagpabawtismo kay Juan sa Subà ng Jordan. ¹⁰ Paghaw-as ni Hesus sa tubì, nakità nga daan niya nga nag-abri ang kalangitan, kag nagababà pakadto sa iya ang Espiritu Santo kapareho ng salampati. ¹¹ Kag may boses nga nabatian halin sa kalangitan nga nagahambay, “Ikaw ang akon pinalanggà nga Ongà. Nalipay gid ako sa imo.”

¹² Adto nga daan gingpakadto siya ng Espiritu Santo sa malangkag nga lugar. ¹³ Kag didto siya nagtinir sa suyod ng 40 ka adlaw nga ginatinintar ni Satanas kag may mapintas nga mga sapat didto, pero ginaserbisyuhan siya ng mga anghel.

¹⁴ Nang napriso^b si Juan nga Miyugbawtismo, nagkadto si Hesus sa Galilea kag gingwali ang Maayo nga Balità halin sa Dios. ¹⁵ “Ang tamà nga oras hay nag-abot na,” hambay niya, “kag ang paghaharì ng Dios hay malapit na gid! Nganì talikuran nindo ang indo mga salà kag magpati sa Maayo nga Balità.”

¹⁶ Isa ka adlaw mintras nagapanaw si Hesus sa alihid ng Dagat ng Galilea, nakità niya ang magmanghod nga sina Simon kag Andres nga nagataktak ng inda pukot kay sinda hay miyugpangisdà. ¹⁷ Gingtawag sinda ni Hesus, “Nunot kamo sa akon kay tudluan ta kamo sa pagpangisdà ng mga tawo.”^{c 18} Adto nga daan gingbilin ninda ang inda mga pukot kag nagnunot sa iya.

¹⁹ Nagpadayon pa si Hesus sa pagpanaw kag nakità niya ang magmanghod nga sina Santiago^d kag Juan nga mga ongà ni Zebedeo. Sinda hay yadto sa inda baruto nga nagapreparar ng mga pukot, ²⁰ kag ging-agda nga daan sinda ni Hesus. Gingbayaan ninda sa baruto ang inda tatay nga si Zebedeo kaibahan ang mga gingsuhuyan nga mga tawo, kag nagnunot sinda kay Hesus.

²¹ Si Hesus kag ang iya mga kaibahan hay nag-abot sa banwa ng Capernaum. Pag-abot ng Adlaw nga Inugpahuway, nagsuyod nga daan siya sa sinagoga^e kag nagtunà siya sa pagpanudlò. ²² Ang mga tawo nga nakabatì hay natingaya gid sa iya pagpanudlò, kay nagatudlò siya nga may otoridad, kag bukon siya pareho ng mga manunudlò ng Kasuguan.

²³ Adto nga daan may isa ka tawo nga may malain nga espiritu ang nagsuyod sa sinagoga kag nagsinggit, ²⁴ “Hesus nga taga-Nazaret, ano ang humanon mo sa amon? Nagkari ka ba para pahugaan kami? Kilaya ko kung sin-o ka: ikaw ang Banal nga gingsugò ng Dios!”

²⁵ Pero gingsabyaw ni Hesus ang malain nga espiritu, “Maghipos ka kag magluwas sa inà nga tawo!”

²⁶ Gingpakurog ng malain nga espiritu ang tawo, nagsinggit ning tudo. Kag nagluwas ang espiritu sa iya. ²⁷ Ang tanan nga tawo hay natingaya, nganì nagpangutana sinda sa isa kag isa, “Ano baya ini? Bag-o ini nga klasi ng pagpanudlò! Ini nga tawo hay may otoridad sa pagsugò sa malain nga mga espiritu kag nagatuman sinda sa iya.”

²⁸ Nganì nabantog nga daan ang balità parti kay Hesus sa bilog nga probinsya ng Galilea.

²⁹ Naghalin si Hesus kag ang iya mga kaibahan sa sinagoga kag nagkadto sa bayay nina Simon kag Andres, kaibahan da sina Santiago kag si Juan. ³⁰ Nagahigdà ang panugangan nga babayi ni Simon, kay may sagnat siya. Kag adto nga daan gingpasayod ninda ini kay Hesus. ³¹ Nganì gingpalapitan siya ni Hesus kag ginghawiran sa kamot kag gingpabangon. Adto nga daan naduyà ang iya sagnat, kag gingserbisyuhan niya sina Hesus.

³² Nang pagtunod ng adlaw kag nag-abot ang gab-i, gingdaya ng mga tawo kay Hesus ang tanan nga may sakit kag adtong may malain nga mga espiritu. ³³ Tanan nga tawo sa banwa hay nagtipon sa atubangan ng bayay. ³⁴ Gingpang-ayo ni Hesus ang mga sarisarì nga sakit kag gingpalayas ang madamò nga malain nga espiritu. Wayà niya pagtuguti nga maghambay sinda; kay sayod ninda kung sin-o siya.

³⁵ Nang masunod nga adlaw maduyom pa, nagbangon si Hesus kag nagkadto sa malangkag nga lugar kag nagpangamuyò. ³⁶ Gingpangità siya ni Simon kag ng iya mga kaibahan. ³⁷ Pagkakità ninda kay Hesus naghambay sinda, “Ginapinangità ka ng tanan nga tawo.”

³⁸ Pero nagsabat si Hesus sa inda, “Makadto na kita sa malapit nga mga banwa para makawali ako didto, kay imaw ini ang akon gingkari sa kalibutan.”

³⁹ Nganì ginglibot ni Hesus ang bilog nga Galilea para magwali sa mga sinagoga kag magpalayas ning malain nga mga espiritu.

⁴⁰ May isa ka tawo nga kitungon nga nagpalapit kay Hesus. Nagluhod siya kag nagapakitluoy nga buligan siya. Hambay niya, “Kung gusto mo, paayuhon mo ako sa akon kitong.”

⁴¹ Naluoy gid si Hesus sa iya. Nganì ginghawiran niya siya kag naghambay, “Gusto ko. Malimpyo ka!” ⁴² Adto nga daan naduyà ang iya kitong kag nalimpyo siya.^{f 43,44} Gingpaandaman gid siya ni Hesus, “Ayaw gid magpamalità abir kay sin-o parti sa natabò sa imo, kundì magdiritso ka sa parì ng mga Judio kag magpasirò sa iya. Kag maghalad ka ning halad nga gingsugò ni Moises para magpamatuod sa mga tawo nga nalimpyo ka na.” Pagkatapos, gingpapanaw siya nga daan ni Hesus.

⁴⁵ Kag nagpanaw adto nga tawo, pero nagtunà ning pinamalità parti sa natabò sa iya. Nganì nabantog ang balità sa tanan nga lugar sa Galilea, kag indì na makasuyod si Hesus sa mga banwa ning lantaran, didto na lang siya nagtinir sa malangkag nga lugar. Pero sige pa gihapon ang pagkadto ng mga tawo sa iya halin sa tanan nga lugar.