Ang nagsulat ng ini nga libro hay wayà niya pagsulatan ang iya pangayan. Pero may mga tandà nga siya ‘ang disipulo nga pinalanggà ni Hesus’ (21:20) kag kaibahan gid siya permi ni Hesus. Sunò sa pamatuod ng Una nga Iglesya, siya si Juan, nga ongà ni Zebedeo (21:2) kag Salome, nga manghod ni Jacobos^a.

Sunò sa ginapatihan ng Una nga Iglesya, ang ulihi nga tuig ni Juan hay sa Efeso kung sa diin ang iya ministeryo hay ang magwali, magpanudlò kag magsulat. Pero may nagakuntra sa iya pagpanudlò parti kay Hesus, nganì gingdakop siya kag gingpadaya sa isla ng Patmos.

Ang Maayo nga Balità sunò kay Juan hay nagapakilaya kay Hesus bilang ang wayà katapusan nga Hambay ng Dios nga naging tawo. Gingsulat ini agud magtuo ang mga miyugbasa nga ‘si Hesus ang Kristo, ang Ongà ng Dios.’ (20:31)

Pagkatapos maipakilaya ‘ang Hambay ng Dios’ nga si Hesus naging tawo sa kapitulo 1, ang masunod hay nagabalità ng mga makatitingaya nga nagapamatuod nga si Hesus ang Kristo kag gingpromisa nga Manluluwas; kag ang abir sin-o nga magtuo hay makabaton ning regalo nga kabuhì nga wayà katapusan.

Sa kapitulo 13 hasta sa 17, mababasa ang permi nga pakikipagkaibahan ni Hesus sa iya 12 nga disipulo, labi na nang gab-i nga gingdakop siya. Nang bisperas ng paglangsang sa iya sa krus, gingpakusog niya ang inda tagipusuon agud maging alisto sa abir ano nga matabò. Sa ulihi naman nga mga kapitulo, gingsulat kung pauno siya gingdakop kag ging-imbistigahan. Mababasa da sa ini nga libro ang paglangsang sa iya sa krus, ang paglubong, ang iya pagkabuhì liwat kag ang madamò ka beses nga pagpakità niya sa mga disipulo. Diri gingtaw-an gid ning importansya ang libri nga kabuhì nga wayà katapusan paagi kay Kristo.

Ang kaayo-ayo diri hay ang paggamit ng ordinaryo nga mga bagay sa pagpanudlò ni Hesus sa pang-adlaw-adlaw nga pagpangabuhì agud magtao ning espiritwal nga gusto hambayon, pareho ng: tubì, tinapay, iwag, pastor kag mga karnero, punò ng ubas kag mga bunga kag madamò pa.