¹ Pagkaligad ng pila ka adlaw, nagbalik si Hesus sa Capernaum. Nabalitaan nga yadto na siya sa bayay. ² Kadamò ang mga tawo nga nagtipon didto, nganì napunò ang bayay hasta sa puwertahan. Gingwali ni Hesus sa inda ang mensahe ng Dios. ³ May nag-abot nga paralisado nga ginabayawan ng upat ka tawo. ⁴ Kag sa kadamò ng mga tawo, indì sinda makapalapit kay Hesus. Nganì nagsakà sinda sa pantay nga bubungan kag gingbuhuan ninda ang bubong sa tungod ng ginatindugan ni Hesus. Kag nang nabuhuan na, gingtunton ninda ang paralisado nga nagahigdà sa banig. ⁵ Nang makità ni Hesus ang inda pagtuo, naghambay siya sa paralisado, “Akon amigo, napatawad na ang imo mga salà!”

⁶ Nang nabatian ini ng mga manunudlò ng Kasuguan nga nagapungkò didto, naghunahunà sinda sa inda kaugalingon, ⁷ “Basì niya ginahambay ang tiyad inà! Insulto inà sa Dios! Ang Dios lang ang makapatawad ng mga salà!”

⁸ Nasayuran nga daan ni Hesus ang inda ginaisip. Nganì naghambay siya sa inda, “Basì nagahunahunà kamo ng tiyad inà sa indo isip? ⁹ Diin baya ang mas malupos, ang maghambay sa ini nga paralisado, ‘Napatawad na ang imo mga salà,’ o ang maghambay, ‘Bangon, lukuta ang imo banig kag pumanaw?’ ¹⁰ Pamatuuran ko sa indo nga paagi sa akon paghumanon sa ini nga paralisado nga ako, ang Ongà ng Tawo, hay may otoridad diri sa kalibutan nga magpatawad ng mga salà.” Nganì hambay niya sa paralisado, ¹¹ “Bangon, lukuta ang imo banig kag umulì na!”

¹² Nagtindog ang paralisado, gingdaya niya ang iya banig kag nag-agi sa inda atubangan paluwas. Nganì natingaya gid sinda tanan kag gingdayaw ninda ang Dios, nga nagahambay, “Wayà pa kami ning may nakità nga tiyad ini.”

¹³ Pagkatapos, nagbalik liwat si Hesus sa alihid ng Dagat ng Galilea. Madamò nga mga tawo ang nagpalapit sa iya, nganì gingtudluan niya sinda. ¹⁴ Mintras nagapanaw siya, nakità niya ang miyugsukot ning buhis nga si Levi^a, ongà ni Alfeo. Nagapungkò siya sa bayaran ning buhis. Hambay ni Hesus sa iya, “Magsunod ka sa akon.” Nagtindog si Levi kag nagsunod sa iya.

¹⁵ Nang ulihi, mintras nagakaon si Hesus kag ang iya mga disipulo sa bayay ni Levi, madamò da nga mga miyugsukot ning buhis kag iban pa nga sayod nga mga makasal-anan ang kaibahan ninda sa inda pagkaon, kay madamò na gid ang nagasunod sa iya. ¹⁶ Nang makità ng mga manunudlò ng Kasuguan sa grupo ng mga Pariseo^b si Hesus nga nagakaon kaibahan ng mga makasal-anan kag ng mga miyugsukot ning buhis, nagpangutana sinda sa iya mga disipulo, “Basì nagakaon siya kaibahan ang tiyad inà nga mga tawo?”

¹⁷ Nabatian ni Hesus ang inda pangutana, nganì gingsabat niya sinda, “Ang tawo nga maayo ang lawas hay wayà nagakahinangyan ning doktor, kundì ang may sakit lang. Wayà ako nagkari agud tawagon ang mga nakakasayod nga sinda hay matarong, kundì ang mga makasal-anan.”

¹⁸ Isa ka adlaw, ang mga disipulo ni Juan nga Miyugbawtismo kag ang mga Pariseo hay nagapuasa^c. May mga tawo nga nagpalapit kay Hesus kag nagpangutana, “Basì ang mga disipulo ni Juan kag ang mga disipulo ng mga Pariseo hay nagapuasa, pero ang imo mga disipulo hay wayà?”

¹⁹ Nagsabat si Hesus sa inda, “Puydi ba arà nga indì pagpakaunon ang mga bisita sa kasay mintras kaibahan pa ninda ang kiyasayon nga lyaki? Syempre, indì gid puydi! ²⁰ Pero magaabot ang adlaw nang ang kiyasayon nga lyaki hay buy-on sa inda, kag imaw na inà ang adlaw ng inda pagpuasa.”

²¹ Gingbalitaan pa gid sinda ni Hesus ng mga parabola, “Wayà ning tawo nga nagahakpoy ning bag-o nga tela nga wayà pa mag-ukyò sa lumà nga barò kay kung ihakpoy ang bag-o nga tela magigisì ang lumà nga barò kag magapakabahoy pa gid ang gisì. ²² Kag wayà da ning tawo nga nagapiot ning bag-o nga ilimnanon sa lumà nga butangan nga panit ng hayop kay magigisì ang butangan kag magatuyò ang ilimnanon, kag indì na ini mapuslan. Nganì kahinangyan gid nga ang bag-o nga ilimnanon ibutang sa bag-o nga butangan nga panit ng hayop.”^d

²³ Isa ka Adlaw nga Inugpahuway, mintras nagaagi sina Hesus sa uma ng trigo, nagapinamuksì ang iya mga disipulo ning mga bunga. ²⁴ Nganì naghambay ning malaw-ay ang mga Pariseo kay Hesus, “Tan-awa ang ginahuman ng imo mga disipulo! Basì ginahuman ninda ang ginabawal ng Kasuguan sa Adlaw nga Inugpahuway?”

²⁵ Nagsabat si Hesus sa inda, “Dì ba nabasa na nindo ang gingsulat parti sa ginghuman ni David nang siya kag ang iya mga kaibahan hay nagkahinangyan ning pagkaon kay nagutom gid sinda? ²⁶ Nang si Abiatar imaw ang Pinakapunò ng mga parì, nagsuyod si David sa tolda ng Dios kag gingkaon niya ang tinapay nga ginghalad sa Dios kag gingtaw-an da ang iya mga kaibahan. Wayà sinda nagkasalà bisan pa nga ginabawal ini ng Kasuguan kay ang mga parì lang ng mga Judio ang puydi magkaon.”

²⁷ Kag naghambay pa gid si Hesus, “Gingbutang ang Adlaw nga Inugpahuway para sa kaayuhan ng tawo. Wayà ginghuman ang tawo para sa kaayuhan ng Adlaw nga Inugpahuway. ²⁸ Nganì ako nga Ongà ng Tawo hay may otoridad sa paghambay kung ano ang tamà nga humanon sa Adlaw nga Inugpahuway.”