Ang Maayo nga Balità parti kay Hesu-Kristo nga Gingsulat ni
Marcos
Ang Pang-una nga Hambay
A. Ang Nagsulat
Wayà masayuri kung sin-o ang nagsulat ng ini nga libro, pero sunò sa ginapatihan ng mga nagatuo nang una hasta niyan, si Marcos ang nagsulat ini.
Si Marcos hay pakaisa ni Bernabe (Colosas 4:10), ongà ni Maria kag ginatawag da sa pangayan, Juan Marcos (Ginghuman 12:12). Siya hay kaibahan ni Pablo kag Bernabe sa una nga misyon para magwali ng Maayo nga Balità (Ginghuman 12:25, 13:5), pero nagbalik siya sa Jerusalem sa tunga-tungà ng misyon. Nganì wayà nalipay si Pablo kag indì na niya gusto nga day-on siya liwat sa iban nga misyon. Kag ang natabò nagbuyag sina Pablo kag Bernabe, gingdaya ni Bernabe si Marcos (Ginghuman 15:37). Pero pagkaligad ng pila ka tuig, nagkaibahan liwat sina Marcos kag Pablo sa ministeryo (2 Timoteo 4:11; Filemon 24). Nakaibahan da siya ni Pedro kag maayo gid ang inda relasyon sa isa kag isa, nganì gingtawag siya ni Pedro nga iya ‘ongà’ (I Pedro 5:13). Nganì may posibilidad da nga ang mga bagay nga iya gingsulat sa ini nga libro hay halin kay Pedro.
B. Ang mga Palatandaan ng ini nga Libro
I. Madamò ka beses gingsulat diri nga si Hesus hay ‘Ongà ng Dios’ (1:1; 3:11; 15:39), ‘Akon pinalanggà nga Ongà’ (1:11, 9:7), ‘Ongà ng Pinakamataas nga Dios’ (5:7), ‘Ongà nga Ginadayaw ng mga tawo’ (14:61). Bilang Ongà ng Dios, may gahom siya sa pagpalayas ng malain nga mga espiritu, pagpang-ayo sa mga may sakit, paghuman ning mga milagro, nganì natingaya gid ang mga tawo sa iya.
II. Wayà masulat kung pauno si Hesus ging-ongà kag ang iya pagbahoy, pero madamò ka beses gingsulat ni Marcos ang ginghuman ni Hesus sa iba-iba nga klasi ng tawo. Gingtaw-an niya ning importansya ang madamò nga mga natabò labi na gid nang ulihi nga mga adlaw ni Hesus.
III. May mga baynti ka beses nga milagro ni Hesus ang gingsulat ni Marcos, pero tuyo lang ka beses ang pagpanudlò ni Hesus (4:1-34, 10:1-52, 13:1-37). Ang rason kung basì gingsulat ni Marcos ang tiyad ini hay para ipasayod nga ‘... ako nga Ongà ng Tawo wayà nagkari diri sa kalibutan agud serbisyuhan, kundì magserbisyo...’ (10:45).
IV. Ang ‘nga daan’ nga hambay hay permi ginagamit sa ini nga libro (mga traynta ka beses) para ipakità nga si Hesus hay madalì nga daan magtabang kag magserbisyo.
V. Ini nga libro hay gingsulat para sa mga bukon Judio, kay malakà lang ang gingsulat diri parti sa mga kultura ng mga Judio (7:3; 14:12; 15:42).
Ang mga Suyod
I. Ang Pagprepapar ng Ministeryo ni Hesus (1:1-13)
II. Ang mga Ministeryo ni Hesus sa Galilea (1:14-9:50)
III. Ang mga Ministeryo ni Hesus Pakadto sa Jerusalem (10:1-52)
IV. Ang mga Ministeryo ni Hesus sa Jerusalem (11:1-13:37)
V. Ang Pagkamatay kag Pagkabanhaw ni Hesus (14:1-16:20)