¹ Nagkadto liwat si Hesus sa sinagoga^a kag didto may tawo nga paralisado ang iya kamot. ² May mga Pariseo^b didto nga nagatinguhà kung pauno ang pag-akusar kay Hesus. Ginabantayan ninda kung paayuhon niya adtong tawo sa Adlaw nga Inugpahuway. ³ Naghambay si Hesus sa tawo nga paralisado ang kamot, “Magpalapit ka diri sa atubangan ko.” ⁴ Pagkatapos, nagpangutana siya sa inda, “Ano baya ang ginatugot ng Kasuguan sa Adlaw nga Inugpahuway: ang paghuman ning maayo sa mga tawo o ang paghuman ning malain? Ang pagluwas ng kabuhì o ang pagpatay?”

Pero wayà gid ning may nagsabat. ⁵ Gingsirò sinda ni Hesus nga may kahangit, nalisod siya kay matugas gid ang inda uyo. Pagkatapos, naghambay siya sa tawo nga paralisado ang kamot, “Unata ang imo kamot!” Ging-unat niya ini, kag nag-ayo siya. ⁶ Nagluwas ang mga Pariseo kag nagpakigkità nga daan sa mga miyembro ng grupo ni Herodes. Nagplano sinda kung pauno ninda patyon si Hesus.

⁷ Nagkadto si Hesus kag ang iya mga disipulo sa alihid ng Dagat ng Galilea. Nagsunod sa inda ang madamò nga mga tawo nga halin sa probinsya ng Galilea kag sa Judea. ⁸ Madamò da ang naghalin sa siyudad ng Jerusalem, sa rehiyon ng Idumea, sa kabuak ng Subà ng Jordan, kag sa palibot ng siyudad ng Tiro kag Sidon, kay nabatian ninda ang iya ginapanghuman. ⁹ Agud indì siya maipit, ginghambayan niya ang mga disipulo nga magpreparar ning baruto para sa iya kay madamò gid nga mga tawo ang nagadinagusò sa iya. ¹⁰ Madamò ang iya gingpang-ayo, nganì ang tanan nga may sakit hay nagatinuyuran para makatandog sa iya. ¹¹ Kag kung makità siya ng mga tawo nga may malain nga espiritu, nagaluhod sinda sa iya kag nagasinggit, “Ikaw ang Ongà ng Dios!”

¹² Pero gingpaandaman gid niya sinda nga indì magbalità kung sin-o siya.

¹³ Pagkatapos nagtukad si Hesus sa bakuyod, gingtawag niya ang gusto niya nga makaibahan. Nganì nagpalapit sinda sa iya. ¹⁴ Gingpilì niya ang 12 nga iya makaibahan nga gingtawag niya nga mga apostol, agud iya suguon para magpangwali. ¹⁵ Gingtaw-an niya sinda ning otoridad agud magpalayas ning malain nga mga espiritu.

¹⁶ Imaw ini ang 12 nga iya gingpilì: si Simon (nga gingpangayanan niya nga Pedro), ¹⁷ sina Santiago^c kag Juan nga mga ongà ni Zebedeo (nga gingpangayanan niya nga Boanerges nga ang gusto hambayon, ‘mga Ongà ng Dayugdog’)^d, ¹⁸ si Andres, si Felipe, si Bartolome, si Mateo^e, si Tomas, si Santiago nga ongà ni Alfeo, si Tadeo, si Simon (nga nang una rebilde sa gobyerno ng Roma), ¹⁹ kag si Judas Iscariote nga sa ulihi hay imaw ang magatraidor kay Hesus.

²⁰ Pagkatapos nagbalik sina Hesus kag nagtipon liwat ang mga tawo didto, nganì si Hesus kag ang iya mga disipulo hay wayà na ning oras bisan magkaon. ²¹ Nang masayuran ng iya pamilya ang parti sa mga ginahuman ni Hesus, nagkadto sinda didto agud sugaton siya kay naghambay ang mga tawo, “Nasiraan siya ning uyo!”

²² Ang mga manunudlò ng Kasuguan nga nag-abot halin sa siyudad ng Jerusalem hay naghambay, “Ginggamhan siya ni Satanas^f. Nganì paagi sa gahom ng pinunò ng malain nga mga espiritu, ginapalayas niya ang malain nga mga espiritu.”

²³ Nganì gingtawag ni Hesus ang mga tawo nga magpalapit. Kag naghambay siya sa inda paagi sa ini nga mga parabola, “Pauno nga si Satanas magpalayas kay Satanas? ²⁴ Kung ang mga pumuluyò ng isa ka nasyon mag-iyaiya kag mag-inaway, inà nga nasyon indì magdugay. ²⁵ Imaw da ang matabò sa pamilya: kung ang mga miyembro sa pamilya mag-iyaiya kag mag-inaway, magakabuyag-buyag ang pamilya. ²⁶ Nganì imaw da inà ang matabò kung si Satanas kag ang iya mga grupo hay mag-iyaiya kag mag-inaway, ang iya gingharian masirà kag indì magdugay.

²⁷ “Wayà ning abir sin-o nga makasuyod sa bayay ng makusog nga tawo kag magpangawat ning mga gamit kundì gapuson anay niya adtong makusog nga tawo, tapos magahiwat na siya sa pagbuoy ning mga pagkabutang sa adto nga bayay.^g

²⁸ “Sa matuod lang, ang tanan nga klasi ng salà bisan pa ang paghambay ning malain kuntra sa Dios hay mapatawad. ²⁹ Pero ang bisan sin-o nga nagainsulto sa Espiritu Santo, indì gid mapatawad. Ini nga salà hay wayà gid ning kapatawaran abir san-o.” ³⁰ Ginghambay ini ni Hesus kay nagahambay ang mga manunudlò ng Kasuguan nga may malain siya nga espiritu.

³¹ Nag-abot ang nanay kag ang mga manghod ni Hesus. Mintras nagatindog sinda didto sa luwas ng bayay, gingpatawag ninda siya. ³² Madamò nga mga tawo didto ang nagapungkò sa palibot ni Hesus. Hambay ng mga tawo sa iya, “Ang imo nanay kag ang imo mga manghod yarà sa luwas, ginapatawag ka ninda.”

³³ Nagsabat siya, “Sayod ba nindo kung sin-o ang akon nanay kag mga manghod?” ³⁴ Nagsirò siya sa mga tawo nga nagapungkò sa iya palibot kag naghambay, “Imaw ini ang akon nanay kag mga manghod! ³⁵ Ang bisan sin-o nga nagapamatì kag nagatuman sa Dios, imaw ang akon nanay kag mga manghod.”