4
Ang Parabola parti sa Miyugpanguma
(Mateo 13:1-9; Lucas 8:4-8)
1 Nagpanudlò liwat si Hesus sa alihid ng Dagat ng Galilea. Madamò gid nga mga tawo ang nagtipon sa iya palibot. Nganì nagsakay siya kag nagpungkò didto sa baruto nga nakapundo nga malapit sa baybay kag ang mga tawo nagpabilin sa alihid ng baybay. 2 Madamò nga mga bagay ang iya gingtudlò sa inda paagi sa mga parabola.
3 Hambay niya, “Magpamatì kamo! May isa ka miyugpanguma nga nagsabwag ning binhì. 4 Sa iya pagsabwag, ang iban nagtupà sa alihid ng dayan kag gingpangtukà ini ng mga pispis. 5 Ang iban nagtupà sa kabatuhan. Manipis lang ang dutà, nganì madalì nga nagtubò ang mga binhì kay mababaw lang ang dutà. 6 Pero naglayong ini nang nainitan ng adlaw, kay matag-od lang ang gamot. 7 Ang iban nga binhì nagtupà kag nagtubò sa dutà nga may mga bayagon nga tunukon, pero paglabog ng mga bayagon gingkamangan ang tanom, nganì wayà nakapamunga. 8 Ang iban pa gid nga binhì nagtupà sa maayo nga dutà, nagtubò ini kag nagpamunga: ang iban tamà-tamà lang ang bunga, ang iban kadamò kag ang iban hay kadamo-damò gid.”a
9 Hambay pa ni Hesus sa inda, “Dapat intindihon gid nindo maayo ang indo nabatian.”
Basì Ginggamit ang mga Parabola
(Mateo 13:10-17; Lucas 8:9-10)
10 Paghalin ng mga tawo, ang 12 nga disipulo kag ang iban pa gid nga yadto sa palibot ni Hesus hay nagpangutana sa iya kung basì ginggamit ang mga parabola. 11 Nagsabat si Hesus sa inda, “Ang mga sekrito parti sa paghaharì ng Dios hay ginahambay sa indo ning diritso, pero sa iban, ang tanan nga bagay parti sa paghaharì ng Dios ginahambay sa inda paagi sa mga parabola, 12 agud,
Magsinirò man sinda pero indì makakità,
kag magpinamatì man sinda pero indì makaintindi.
Kay kung makaintindi sinda, magahinuysoy
kag patawaron sinda ng Dios.”b
Ging-isplikar ni Hesus ang Parabola parti sa Miyugpanguma
(Mateo 13:18-23; Lucas 8:11-15)
13 Nagpangutana si Hesus sa inda, “Kung indì kamo makaintindi ini nga parabola, pauno nindo maintindihan ang iban pa nga mga parabola? 14 Ang gusto hambayon ng akon parabola hay imaw ini: ang gingsabwag ng miyugpanguma hay wayà ning iban kundì ang hambay ng Dios. 15 Ang alihid ng dayan nga gingtupaan ng mga binhì imaw ang mga tawo nga pagkabatì ninda ng hambay ng Dios, nag-abot da nga daan si Satanas kag ging-agaw niya ang hambay sa inda tagipusuon. 16 Ang kabatuhan nga gingtupaan ng mga binhì imaw ang mga tawo nga pagkabatì ninda ng hambay ng Dios, gingbaton ninda nga daan ini nga may kalipay, 17 pero bukon hugot sa inda tagipusuon. Nganì wayà magdugay ang inda pagtuo. Pag-abot ng kakulì o subra nga pagpasakit tungod sa hambay ng Dios nga inda gingbaton, wayà sinda nagpadayon sa inda pagtuo. 18 Ang dutà nga may mga bayagon nga tunukon nga gingtupaan ng mga binhì imaw ang mga tawo nga nakabatì ng hambay ng Dios. 19 Ugaling tungod sa mga kabayak-on sa pangabuhì kag sa pagtinguhà nga magmanggaranon kag tungod sa subra nga handom ng iban nga mga bagay, nalimutan ninda ang hambay ng Dios nga inda nabatian kag wayà ninda napusli. 20 Pero ang maayo nga dutà nga gingtupaan ng mga binhì imaw ang mga tawo nga nagpamatì ng hambay ng Dios kag gingbaton ninda sa inda tagipusuon kag napuslan gid ninda. Ang iban katamtaman lang ang bunga, ang iban madamò kag ang iban hay mas madamò gid.”c
Ang Parabola parti sa Iwagan
(Lucas 8:16-18)
21 Nagpadayon pa gid sa paghambay si Hesus sa inda, “Kung ang tawo magsugà ning iwagan, wayà niya ginatakyubi o ginabutangan sa idayom ng katre, kundì ginabutang niya ini sa tungtungan. 22 Kay wayà gid ning may ginatagò nga indì makità sa ulihi kag wayà ning sekrito parti sa paghaharì ng Dios nga indì masayuran. 23 Dapat intindihon gid nindo maayo ang indo nabatian.”
24 Naghambay pa gid siya, “Pamatì kamo ning maayo! Ang pangsukoy nga ginggamit nindo sa iban hay imaw da ang pangsukoy sa indo kag subra pa. 25 Kay ang tawo nga igwa ning nabaton nga kamatuuran taw-an pa gid ning pang-intindi. Pero ang tawo nga wayà ning nabaton nga kamatuuran, bisan ang maisot nga iya naintindihan buy-on pa sa iya.”
Ang Parabola parti sa mga Binhì nga Nagatubò
26 Hambay pa gid ni Hesus, “Ang paghaharì ng Dios hay pareho ng tawo nga nagsabwag ng mga binhì sa dutà. 27 Mintras siya nagatrabaho kada adlaw kag nagakatuyog kada gab-i, ang mga binhì nga iya gingsabwag nagatubò bisan wayà niya masayuri kung pauno. 28 Ang dutà mismo imaw ang nagapatubò kag nagapauhay ng mga tanom: nauna ang pungango, tapos ang uhay kag sa ulihi ang madamò nga bunga. 29 Kag kung hinog na, ginaani ng tag-iya kay anihon na.”
Ang Parabola parti sa Mustasa
(Mateo 13:31-32, 34; Lucas 13:18-19)
30 Nagpangutana si Hesus sa inda, “Sa pauno naton maipapareho ang paghaharì ng Dios? Ano nga parabola ang aton gamiton agud nga maisplikar ini?” Naghambay pa gid siya, 31 “Pareho ini sa binhì ng mustasad. Isa sa pinakamaisot sa tanan nga binhì sa kalibutan, 32 pero kung matanom na ini, nagatubò kag mas mabahoy pa kaysa tanan nga utanon, kag bisan ang mga pispis sa langit hay puydi makapugad sa iya mabahoy nga mga sanga.”
33 Madamò pa gid nga parabola ang ginggamit ni Hesus sa iya pagpanudlò sa mga tawo, kumpormi sa inda maintindihan. 34 Wayà siya nagahambay sa mga tawo nga wayà nagagamit ning parabola, pero ginaisplikar niya ini tanan sa iya mga disipulo kung sinda na lang.
Gingpakalma ni Hesus ang Bagyo
(Mateo 8:23-27; Lucas 8:22-25)
35 Nang adto nga adlaw, manayumsom na, naghambay si Hesus sa iya mga disipulo, “Mos, matabok na kita.” 36 Nganì gingbayaan ng iya mga disipulo ang madamò nga mga tawo nga nagatipon kag nagsakay sinda sa baruto nga ginasakyan ni Hesus kag naglarga sinda. May mga baruto da didto nga nagdungan sa inda. 37 Kag mintras nagabiyahe sinda, gulpi lang nga nag-abot ang makusog nga hangin. Nagbasyada ang humbak sa baruto, kag daw sa mapunò na ang inda ginasakyan. 38 Pero si Hesus hay nagakatuyog nga may uyunan didto sa ulihi ng baruto. Gingpukaw ninda siya. Nagsinggit sinda, “Maistro, daw wayà ka nagakabayaka nga malulunod na kita?”
39 Nganì nagbangon siya kag gingsabyaw niya ang hangin kag ginghambayan niya ang humbak, “Kalma! Ayaw maghuyop!” Nagduyog ang hangin kag kakalma gid. 40 Hambay ni Hesus sa inda, “Basì nahadlok kamo? Wayà pa ba kamo pagtuo sa akon?”
41 Subra gid ang inda katingaya sa iya kag nagpinangutan-an sinda, “Sin-o gid baya ini nga abir ang hangin kag ang humbak nagatuman sa iya?”