¹ Pagkatapos, nag-abot sinda sa kabuak ng Dagat ng Galilea, sa lugar ng Geraseno^a. ² Nang nakasalta na si Hesus sa baruto, may tawo didto nga ginasapian ng malain nga espiritu nga nagluwas sa kuyba kag gingsumpong si Hesus. ³ Ini nga tawo hay nagaistar sa mga kuyba nga lubungan. Wayà na gid ning may maigapos sa iya, abir kadina pa. ⁴ Kay madamò na ka beses nga ginggapos ang iya mga siki kag mga kamot, pero ginapangbugtò lang niya ang mga kadina sa iya kamot patì ang mga kadina sa iya siki. Wayà gid ning may makapugong sa iya. ⁵ Adlaw kag gab-i, abir yarà siya sa mga lubungan o sa mga bakuyod, permi siya nagasinggit kag ginapilas niya ang iya lawas ning bato.

⁶ Pagkakità niya kay Hesus sa malayò, nagdyagan siya pakadto sa iya kag naghapà sa atubangan ni Hesus. ^7,8 Nganì naghambay si Hesus sa malain nga espiritu nga nagagahom sa tawo, “Ikaw malain nga espiritu, magluwas ka sa inà nga tawo!” Nagsinggit siya, “Hesus, Ongà ng Pinakamataas nga Dios, ano ang imo labot sa akon! Nagapakitluoy ako sa imo sa pangayan ng Dios nga ayaw ako pagpahugai.”

⁹ Gingpangutana siya ni Hesus, “Ano ang imo pangayan?”

Nagsabat siya, “Ang akon pangayan hay si Batalyon kay kadamo-damò kami.” ¹⁰ Kag nagapinakitluoy siya kay Hesus nga indì sinda palayason didto nga lugar.

¹¹ Malapit didto, may kadamo-damò nga baboy ang nagapangibok sa alihid ng bakuyod. ¹² Nagpakitluoy kay Hesus ang malain nga mga espiritu nga ang hambay, “Tuguti kami nga magsuyod sa mga baboy.” ¹³ Kag gingtugutan niya sinda. Tapos nagluwas ang malain nga mga espiritu sa tawo kag nagsuyod sa mga baboy. Nganì ang tanan nga baboy nga may duha ka libo hay nagdinagusò sa pangpang hasta sa nagkahuyog sa dagat kag nagkalumos.

¹⁴ Nagdyagan ang mga miyug-alilà ng mga baboy kag gingpinamalità ninda sa mga tawo sa banwa kag sa mga baryo ang natabò. Nganì nagkadto ang mga tawo didto kay Hesus agud siruon kung ano adto. ¹⁵ Pag-abot ninda didto, nakità ninda ang tawo nga dati anay gingsapian ng malain nga mga espiritu nga nagapungkò nga may barò na kag maayo na ang iya painuino. Nganì hinadlukan sinda. ¹⁶ Ang mga nakakità mismo ang nagbalità sa mga tawo parti sa natabò sa tawo nga dati anay hay may malain nga mga espiritu kag sa mga baboy.

¹⁷ Nganì sa ini nga natabò, nagpakitluoy sinda kay Hesus nga maghalin sa inda lugar.

¹⁸ Nang nagasakay na si Hesus sa baruto, ang tawo nga dati anay gingsapian ng malain nga mga espiritu hay nagpakitluoy sa iya nga kung puydi siya magnunot.

¹⁹ Pero wayà siya pagtuguti ni Hesus kundì ginghambayan siya, “Magbalik ka sa imo bayay, sa imo mga kakilaya kag ibalità mo sa inda kung ano ang ginghuman ng Ginoo sa imo kag kung pauno siya naluoy sa imo dati nga kamutangan.”

²⁰ Nganì nagpanaw ang tawo kag nagkadto sa Decapolis^b. Kag didto gingpinamalità niya kung ano ang ginghuman ni Hesus sa iya. Natingaya gid ang tanan nga nakabatì sa iya.

²¹ Pagtabok liwat ni Hesus sa kabuak sakay ng baruto, madamò gid nga mga tawo ang nagtipon sa iya sa alihid ng dagat. ²² May isa ka miyugdumaya ng sinagoga^c ang pangayan hay si Jairo. Nag-abot da siya didto. Pagkakità niya kay Hesus, naghapà siya sa atubangan ng siki ni Hesus ²³ kag nagpakitluoy, “Ang akon ongà nga dalagita hay nagaagunisar na didto sa bayay. Kung puydi kadtua anay kag itungtong ang imo mga kamot sa iya agud magaayo siya kag mabuhì!”

²⁴ Nganì nagnunot si Hesus sa iya. Kag madamò da nga mga tawo ang nagsunod nga nagadinagusò kay Hesus.

²⁵ May isa ka babayi didto nga 12 na ka tuig nga ginadinugò. ²⁶ Dakò na gid ang naggastos niya sa pagpinabuyong sa sarisarì nga mga miyugbuyong. Nagastos na niya ang tanan niya nga mga pagkabutang, pero wayà gid siya nag-ayo. Naggrabi pa gid ang iya sakit. ²⁷ Nabatian niya ang mga balità parti kay Hesus, nganì nag-itiot siya sa kadamuan ng mga tawo agud makapalapit sa likod ni Hesus. ²⁸ Kay naghambay siya sa iya kaugalingon, “Kung matandog ko lang abir ang iya barò, magaayo gid ako.”

²⁹ Nganì gingtandog niya ang gayad ng barò ni Hesus kag nagpara nga daan ang iya pagdugò kag nabatyagan niya nga nag-ayo na siya sa iya sakit. ³⁰ Nasayuran ni Hesus nga may gahom nga nagluwas halin sa iya, nganì naglingig siya kag naghambay, “Sin-o ang nagtandog sa akon barò?”

³¹ Nagsabat ang iya mga disipulo, “Kadamò nga mga tawo ang nagadinagusò sa imo, basì nagapangutana ka pa kung sin-o ang nagtandog sa imo?”

³² Pero nagpanglikità pa siya kung sin-o ang nagtandog sa iya. ³³ Nasayuran ng babayi kung ano ang natabò sa iya, nganì nagpalapit siya kay Hesus nga nagakurog sa kahadlok. Naghapà siya kag nagbalità ng matuod. ³⁴ Nganì naghambay si Hesus sa iya, “Ongà ko, ang pagtuo mo ang nag-ayo^d sa imo. Nganì mag-ulì ka kag ayaw na magkabayaka sa imo sakit kay maayo ka na.”

³⁵ Mintras nagahambay pa siya sa babayi, may nag-abot nga pila ka tawo halin sa bayay ni Jairo. Hambay ninda kay Jairo, “Patay na ang imo ongà. Ayaw na pag-awata ang maistro.”

³⁶ Pero wayà pagpanginanuha ni Hesus ang gingbalità. Naghambay siya kay Jairo, “Ayaw mahadlok. Magtuo ka lang.” ³⁷ Nganì nagdiritso lang sinda. Pero wayà siya may gingpanunot puyra lang kay Pedro kag ang magmanghod nga sina Santiago^e kag Juan. ³⁸ Pag-abot ninda sa bayay ni Jairo, nakità ni Hesus nga nagakinagulo ang mga tawo. Ang iban nagatinangis kag ang iban hay nagadinanguyngoy. ³⁹ Nagsuyod sina Hesus sa bayay kag naghambay siya sa mga tawo, “Basì nagakinagulo kag nagatinangis kamo? Bukon patay ang ongà, kundì nagakatuyog lang.”

⁴⁰ Gingngitlan lang ninda si Hesus. Nganì gingpaluwas niya ang tanan nga tawo kag gingpasuyod niya sa kuwarto ng ongà ang iya tatay kag nanay kag ang tuyo niya nga kaibahan. ⁴¹ Tapos ginghawiran niya ang kamot ng ongà kag naghambay, “Talitha, koum!” (ang gusto hambayon, ‘Nenè, magbangon ka!’).

⁴² Nagbangon nga daan ang dalagita kag nagpanaw-panaw. (Siya hay nagaidad ning 12 ka tuig). Adto nga daan, dakò gid ang inda katingaya. ⁴³ Pero gingbilinan sinda ni Hesus nga indì gid magbalità abir kay sin-o parti sa natabò. Ginghambayan niya sinda nga taw-an ning pagkaon ang ongà.