¹ Pagkatapos, naghalin si Hesus kag nagbalik sa iya kaugalingon nga banwa kag nagnunot ang iya mga disipulo. ² Pag-abot ng Adlaw nga Inugpahuway, nagtudlò siya sa sinagoga^a. Madamò nga mga tawo didto ang nakabatì sa iya nga natingaya kag ang hambay ninda, “Ano nga kamayad ang gingtao sa iya? Kag basì nakakahuman siya ning mga milagro? Sa diin baya siya nakabuoy ning tiyad inà nga mga bagay? ³ Bukon ba imaw inà ang karpentero, nga ongà ni Maria kag maguyang nina Santiago^b, Joses, Judas kag Simon? Kag bukon ba ang iya mga manghod nga babayi hay kaibahan naton?” Nganì wayà gid sinda magtuo sa iya.

⁴ Tapos naghambay si Hesus sa inda, “Ang miyugbalità ng mensahe ng Dios hay ginarespito bisan diin nga lugar puyra lang sa kaugalingon niya nga banwa, mga kahalihan kag sa iya pamilya.”

⁵ Wayà si Hesus nakahuman ning mga milagro sa lugar ng Nazaret, puyra lang sa pila ka may sakit nga ginghawiran ng iya kamot kag nag-ayo. ⁶ Natingaya siya nga indì sinda magtuo sa iya.

Pagkatapos adto naglibot si Hesus nga nagapanudlò sa mga baryo. ⁷ Gingtawag niya ang 12 nga apostol kag gingsugò niya sinda ning tigduha-duha. Gingtaw-an niya sinda ning otoridad kuntra sa malain nga mga espiritu. ⁸ Gingbilinan niya sinda nga indì magdaya ning abir ano sa inda pagpanaw kundì sungkod lang. Indì da sinda magdaya ning pagkaon, bag o kuwarta sa inda supot. ⁹ Puydi sinda makasuksok ning sandalyas, pero indì sinda magdaya ning ilislan nga barò. ¹⁰ Kag naghambay siya sa inda, “Kung padayunon kamo sa isa ka bayay, didto lang kamo magtinir hasta sa maghalin kamo sa adto nga lugar. ¹¹ Pero kung ang mga tawo sa isa ka lugar indì magbaton sa indo kag indì magpamatì ng indo ginawali, bayai nindo sinda, kag sa paghalin nindo, pagpaga nindo ang dapodapo sa indo siki para paandam gid kuntra sa inda.”

¹² Nganì nagpanaw sinda kag nagwali nga dapat magtalikod ang mga tawo sa inda mga salà. ¹³ Madamò nga malain nga mga espiritu ang inda gingpalayas kag madamò nga mga may sakit ang inda gingpang-ayo nang gingpahiran ning lana.

¹⁴ Nakaabot kay Herodes nga Harì, ang mga balità parti kay Hesus kay nabantog na gid siya. Ang iban naghambay, “Si Hesus imaw si Juan nga Miyugbawtismo nga nabuhì liwat, imaw inà nga may gahom siya sa paghuman ng mga milagro.”

¹⁵ Pero naghambay ang iban, “Siya hay si Elias nga miyugbalità ng mensahe ng Dios.”

Kag naghambay pa gid ang iban, “Siya hay mensahiro ng Dios nga pareho ng isa sa mga mensahiro ng Dios nang una.”

¹⁶ Pagkabatì ni Herodes ini nga balità, naghambay siya, “Nabuhì liwat si Juan nga akon gingpapugutan ning uyo.” ^17,18 Ginghuman ini ni Herodes kay Juan kay nahangit si Herodias sa iya. Tyad ini ang natabò: ging-asawa ni Herodes si Herodias nga asawa ng iya hali^c nga si Felipe. Permi lang ginahambayan ni Juan si Herodes, “Bawal sa Kasuguan nga asawahon mo ang asawa ng imo hali.” Nganì para lang kay Herodias, gingpadakop ni Herodes si Juan kag gingpapriso. ¹⁹ Tungod nagdumot si Herodias kay Juan, gusto niya nga ipapatay siya, pero indì niya mahuman kay indì magsugot si Herodes. ²⁰ Nahadlok si Herodes kay Juan kay nasayuran niya nga si Juan hay matarong kag diosnanon nga tawo. Nganì gingprotiksyunan ni Herodes si Juan agud indì mauno. Gusto ni Herodes nga magpamatì sa mga wali ni Juan abir nalilito siya sa iya mga nabatian.

²¹ Nang ulihi, nag-abot gid ang tiyempo nga ginahuyat ni Herodias. Natabò ini sa silibrasyon ng pag-ongà kay Herodes. Nagpapunsyon si Herodes kag ging-imbitar niya ang mga opisyales ng Galilea, ang mga pinunò nga sundalo ng Roma kag ang mga kilaya nga mga tawo didto. ²² Adto da nga oras nagsuyod ang dalaga nga ongà ni Herodias kag nagsaot, nalipay gid si Herodes kag ang iya mga bisita. Nganì naghambay si Herodes sa dalaga, “Pangayò sa akon ning abir ano nga imo magustuhan kay itao ko sa imo.” ²³ Kag gingpangakò niya sa dalaga, “Taw-an ta ikaw ning abir ano nga imo pangayuon, bisan pa katungà ng akon nasasakupan.”

²⁴ Nagluwas ang dalaga kag nagpangutana sa iya nanay, “Ano ang akon pangayuon?”

Nagsabat ang iya nanay, “Ang uyo ni Juan nga Miyugbawtismo.”

²⁵ Kag adto nga daan nagbalik siya sa harì. Pag-abot niya, naghambay siya, “Gusto ko nga itao mo sa akon arinyan ang uyo ni Juan nga Miyugbawtismo nga nakabutang sa plangganita.”

²⁶ Pagkabatì adto ni Herodes nalisod gid siya. Kay nakapangakò na busà siya kag nabatian mismo ng iya mga bisita, indì niya gusto nga masirà ang iya ginghambay sa dalaga. ²⁷ Adto nga daan gingsugò niya ang isa ka sundalo nga day-on sa iya ang uyo ni Juan. Nganì nagkadto ang sundalo sa prisuhan kag gingpugutan ng uyo si Juan. ²⁸ Pagkatapos gingbutang niya ini sa plangganita kag gingtao sa dalaga nga gingtao naman sa iya nanay. ²⁹ Pagkabatì ng mga disipulo ni Juan parti sa natabò, nagkadto sinda kag gingbuoy ang lawas ni Juan kag inda ini ginglubong.

³⁰ Ang mga apostol nga nagpanaw sa pagwali hay nagbalik kay Hesus. Gingbalità ninda sa iya ang tanan ninda nga mga ginghuman kag gingpanudlò. ³¹ Tungod sa kadamò ng mga tawo nga nagaabot kag nagahalin, wayà na gid sinda ning oras abir magkaon. Nganì naghambay si Hesus sa iya mga apostol, “Mos, makadto kita sa malangkag nga lugar agud makapahuway-huway kita abir madalì lang.” ³² Nganì nagsakay sinda sa baruto kag nagkadto sa malangkag nga lugar.

³³ Pero nakilaya sinda ng madamò nga mga tawo nga nakakità sa inda paglarga. Nganì nagdyagan ang mga tawo halin sa iba-iba nga mga banwa pakadto sa kadtuan nina Hesus kag nauna pa sinda pag-abot didto. ³⁴ Pagsalta ni Hesus sa baruto, nakità niya ang madamò nga mga tawo nga nagatipon didto kag naluoy gid siya sa inda kay daw pareho sinda sa mga karnero nga wayà ning pastor. Nganì gingtudluan niya sinda ning madamò nga mga bagay. ³⁵ Nang hapon na gid, nagpalapit ang mga disipulo sa iya. Hambay ninda, “Manayumsom na. Kag yari pa kita diri sa malangkag nga lugar. ³⁶ Pakadtua na ang mga tawo sa mga baryo kag sa mga sityo sa palibot agud makabakay sinda ning pagkaon.”

³⁷ Pero naghambay si Hesus sa inda, “Kamo mismo ang magtao sa inda ning pagkaon.”

Nagpangutana sinda kay Hesus, “Ano? Mapanaw ba kami kag magbakay ning tinapay nga ang presyo hay nagakantidad ning wayo ka bulan nga suweldo ng isa ka tawo^d agud ipakaon sa inda?”

³⁸ Naghambay si Hesus sa inda, “Pila ka bilog ang indo tinapay dirà? Tan-awa abi nindo.”

Nang makità ninda, naghambay sinda, “Lima ka bilog nga tinapay, kag duha nga isdà.”

³⁹ Tapos gingsugò ni Hesus ang iya mga disipulo nga papungkuon ang mga tawo ning grupo-grupo sa mga gunahon. ⁴⁰ Nganì nagpungkò ang mga tawo ning tig-100 kag tig-50. ⁴¹ Pagkatapos gingbuoy ni Hesus ang lima ka bilog nga tinapay kag duha nga isdà, naghangad siya sa langit kag nagpasalamat sa Dios. Gingbuak-buak niya ang tinapay kag gingtao sa iya mga disipulo para ipanao sa mga tawo. Kag gingparte-parte da niya ang isdà para sa tanan. ⁴² Nakakaon sinda tanan kag nabusog. ⁴³ Pagkakaon ng tanan, gingtipon ninda ang mga nabilin nga tinapay kag isdà, kag 12 pa ka tabig ang napunò. ⁴⁴ Ang mga lyaki nga nakakaon hay 5,000, bukon kaibahan sa bilang ang mga babayi kag mga ongà.

⁴⁵ Adto nga daan gingsugò ni Hesus ang iya mga disipulo nga magsakay sa baruto kag mag-una didto sa Betsaida, sa kabuak ng Dagat ng Galilea, mintras ginapapaulì niya ang mga tawo. ⁴⁶ Nang nakahalin na ang mga tawo, nagkadto siya sa bakuyod agud magpangamuyò. ⁴⁷ Pagkagab-i, nang yadto na ang baruto sa tungà ng dagat, pero si Hesus sa takas pa nga siya lang mag-isa. ⁴⁸ Nakità niya nga ginahugaan sinda sa pagbugsay, kay sungsungon sa hangin. Nang aga-aga na, nagkadto siya sa inda nga nagapanaw sa ibabaw ng tubì. Maagi lang kuntà siya sa inda, ^49,50 pero pagkakità ninda sa iya nga nagapanaw sa ibabaw ng tubì, hinadlukan gid sinda kag nagsinggit, “Muyto!”

Pero naghambay si Hesus sa inda, “Ayaw kamo mahadlok, ako ini!” ⁵¹ Nagsakay siya sa baruto kag nagpara ang makusog nga hangin. Kag natingaya gid sinda, ⁵² kay abir nakità na ninda ang milagro nga ginghuman niya sa tinapay, wayà pa gid sinda makaintindi ng gusto hambayon adto nga ginapakità kung sin-o siya, kay matugas ang inda uyo.

⁵³ Pagkaabot ninda sa kabuak ng dagat, nagdunggò sinda sa Genesaret kag gingpunduhan ninda ang baruto. ⁵⁴ Pagsalta ninda, nakilaya nga daan ng mga tawo si Hesus. ⁵⁵ Nganì nagdalì-dalì ang mga tawo nga nagkadto sa palibot nga mga lugar kag gingdaya ninda ang mga may sakit nga nagahigdà sa banig kung sa diin nabatian ninda nga yadto si Hesus. ⁵⁶ Abir diin siya magkadto, sa mga baryo, sa mga siyudad o sa mga banwa man, basta mabatian ng mga tawo nga yadto siya, ginadaya ninda ang inda mga may sakit sa mga lugar nga bakyanan kag baligyaan. Nagapakitluoy sinda kay Hesus nga tugutan niya ang mga may sakit nga tandugon siya, abir sa punta lang ng iya barò. Kag ang tanan nga nakatandog hay nag-ayo.