¹ May mga Pariseo^a kag pila ka mga manunudlò ng Kasuguan nga nag-abot halin sa Jerusalem ang nagtipon sa palibot ni Hesus. ² Nakità ninda nga ang iban nga iya mga disipulo hay nagakaon nga wayà nagapanghinaw ng inda mga kamot. Kag ini hay kuntra sa tradisyon ng mga Pariseo.

³ (Bukon lang ang mga Pariseo kundì ang tanan nga Judio hay wayà gakaon kung indì anay sinda makahugas ng inda mga kamot sunò sa tradisyon ng inda mga kalulo-lulohan. ⁴ Indì da sinda makakaon ning abir ano nga naghalin sa merkado kung indì anay ninda mahugasan.^b Madamò pa gid ang inda mga tradisyon pareho ng pagpanghugas ng mga tasa, kuyon, kag kaldero nga lutuan.^c)

⁵ Nganì nagpangutana kay Hesus ang mga Pariseo kag ang mga manunudlò ng Kasuguan, “Basì ang imo mga disipulo hay wayà nagasunod sa mga tradisyon ng aton mga kalulo-lulohan? Nagakaon sinda nga wayà nagapanghinaw ng inda mga kamot.”

⁶ Gingsabat sinda ni Hesus, “Matuod gid ang gingpropesiya ni Isaias parti sa indo nga mga hipokrito. Sunò sa gingsulat niya,

⁸ Wayà nindo ginabatuna ang ginasugò ng Dios, kundì ang mga tradisyon ng mga tawo imaw ang indo ginatuman.”

⁹ Naghambay pa gid si Hesus, “Maayo gid kamo maghuman ning paagi agud indì matuman ang ginasugò ng Dios para masunod lang ang indo mga tradisyon. ¹⁰ Pareho abi ini: naghambay si Moises, ‘Tahura ang imo tatay kag nanay’, kag ‘Ang nagahambay ning malain sa iya tatay o nanay dapat gid nga patyon’. ¹¹ Pero kamo nagatudlò nga kung ang tawo may inugbulig sa iya mga ginikanan, kag maghambay siya sa inda nga, ‘Korban ini’ (ang gusto hambayon, ‘Inughalad ini sa Dios’), ¹² wayà na nindo siya ginatuguti nga magbulig sa iya mga ginikanan. ¹³ Paagi sa indo gingmana nga tradisyon, ginahuman nindo nga wayà na ning puyos ang hambay ng Dios. Kag madamò pa gid nga tiyad ini ang indo ginahuman.”

¹⁴ Gingtawag liwat ni Hesus ang mga tawo kag ginghambayan, “Pamatì kamo tanan sa akon, kag intindihon nindo ang akon ihambay. ¹⁵ Wayà ning bagay nga nagasuyod sa tawo nga nagapalain sa iya, kundì ang mga nagaluwas sa iya.” ¹⁶ [Dapat intindihon gid nindo maayo ang indo nabatian!]^d

¹⁷ Pagkatapos gingbayaan niya ang mga tawo kag nagsuyod siya sa bayay. Nang sa suyod na siya, ang iya mga disipulo hay nagpangutana sa iya kung ano ang gusto hambayon ng adto nga parabola. ¹⁸ Nagsabat si Hesus sa inda, “Basì wayà pa kamo makaintindi? Wayà ba nindo masayuri nga ang abir ano nga ginakaon hay wayà nagapalain sa tawo? ¹⁹ Kay wayà ini nagasuyod sa iya tagipusuon kundì sa iya tiyan kag nagaluwas sa iya lawas.” (Sa ini nga ginghambay ni Hesus ginapasayod niya nga puydi na kaunon ang tanan nga pagkaon.)

²⁰ Naghambay pa gid siya, “Ang ginahunahunà nga nagaluwas sa tawo imaw ang nagapalain sa iya. ²¹ Kay sa tagipusuon ng tawo nagahalin ang malain nga mga panghunahunà nga imaw ang nagatuyod sa iya: sa pag-iba nga wayà pa makasay, pagpangawat, pagpatay, ²² pagpangawatan, pagkahakog, paghuman ng tanan nga kalainan, pagpangluko, pag-inuyag, pagkaili, paghambay ning malain kuntra sa isigkatawo, paghinambog, kag paghuman ng mga kalukuhan. ²³ Ini tanan nga kalainan hay nagahalin sa suyod ng tagipusuon ng tawo, kag imaw ini ang nagapalain sa iya.”

²⁴ Naghalin si Hesus sa probinsya ng Galilea kag nagkadto sa mga lugar ng Tiro. Pag-abot niya didto nagdayon siya sa isa ka bayay, kay indì niya gusto nga masayuran ng mga tawo nga yadto siya. Pero nasasayuran da gihapon ini ng mga tawo. ^25,26 Igwa ning isa ka babayi nga Griego nga taga-Penisya nga sakop ng Sirya. May maisot siya nga ongà nga babayi nga gingsapian ng malain nga espiritu. Kag nabatian niya nga yadto si Hesus, nganì nagkadto siya didto. Naghapà siya kag nagpakitluoy nga kung puydi palayason niya ang malain nga espiritu sa iya ongà nga babayi. ²⁷ Pero naghambay si Hesus sa iya paagi sa parabola, “Dapat nga pakaunon anay ang mga ongà, kay bukon maayo nga buy-on ang pagkaon ng mga ongà kag ipilak sa mga ayam.”

²⁸ Nagsabat ang babayi sa iya, “Tamà inà Ginoo, pero abir pa ang mga ayam sa idayom ng lamisa hay nagakaon ning uyak ng mga ongà.”

²⁹ Naghambay si Hesus sa iya, “Tungod sa imo gingsabat, puydi ka na makapaulì. Kay nagluwas na ang malain nga espiritu sa imo ongà!”

³⁰ Nagpaulì ang babayi kag nakità niya ang iya ongà nga nagahigdà sa katre, kag ang malain nga espiritu hay nakaluwas na sa iya.

³¹ Paghalin ni Hesus sa mga lugar nga sakop ng Tiro, nag-agi siya sa Sidon kag sa probinsya ng Decapolis^e. Pagkatapos nagdiritso siya sa Dagat ng Galilea. ³² May isa ka tawo didto nga bungoy kag apà nga gingdaya ng mga tawo kay Hesus. Nagpakitluoy sinda sa iya nga paayuhon ang tawo. ³³ Gingbuyag siya ni Hesus sa kadamuan, kag gingsuksok ni Hesus ang iya mga tudlò sa mga talinga ng tawo. Tapos nagpilà siya sa iya kamot kag gingpahid sa dilà ng tawo. ³⁴ Pagkatapos naghangad si Hesus sa langit, nagginhawa ning madayom kag naghambay sa iya, “Eppata!” (ang gusto hambayon, ‘Magbukas!’).

³⁵ Adto nga daan nakabatì siya kag klaro na ang iya panghambay. ³⁶ Tapos gingbilinan ni Hesus ang mga tawo nga indì gid sinda magpamalità bisan kay sin-o parti sa natabò. Pero abir gingbawalan sinda, labi pa gid nga gingpinamalità ninda sa mga tawo ang natabò. ³⁷ Dakò gid ang katingaya ng mga tawo. Hambay ninda, “Kaayo-ayo gid ang iya mga ginghuman! Abir ang bungoy nahuman niya nga makabatì kag ang apà makahambay!”