¹ Pagkatapos ng pila ka adlaw, nagtipon liwat ang madamò nga mga tawo kay Hesus. Nang naubos na ang inda pagkaon, gingtawag ni Hesus ang iya mga disipulo kag ang hambay sa inda, ² “Naluoy gid ako sa ini nga mga tawo. Tuyo na ka adlaw nga kaibahan ninda ako kag wayà na gid sinda ning pagkaon. ³ Kung papaulion ko sinda nga gutom, basì kung malipungan sinda sa dayan kay malayò gid ang ginghalinan ng iban sa inda.”

⁴ Nagsabat ang iya mga disipulo, “Sa diin kita makabuoy ning pagkaon diri sa malangkag nga lugar agud ipakaon sa ini nga mga tawo?”

⁵ Pero nagpangutana si Hesus sa inda, “Pila ka bilog ang indo tinapay dirà?”

Nagsabat sinda, “Pito.”

⁶ Kag gingpapungkò ni Hesus ang mga tawo sa dutà. Gingbuoy niya ang pito nga tinapay kag nagpasalamat sa Dios. Tapos gingbuak-buak niya ini kag gingtao sa iya mga disipulo agud ipanao sa mga tawo. ⁷ Igwa da sinda ning pila ka bilog nga maintik nga mga isdà. Gingpasalamatan da niya ini kag gingtao sa iya mga disipulo agud ipanao sa mga tawo. ⁸ Nagkaon sinda kag nabusog gid. Pagkatapos, gingtipon ninda ang tinapay nga subra kag napunò pa ang pito nga mabahoy nga tabig. ⁹ Kag ang mga tawo nga nakakaon hay mga 4,000. Nang matapos adto, gingpapaulì ni Hesus ang mga tawo. ¹⁰ Kag nagsakay siya sa baruto kaibahan ang iya mga disipulo kag nagkadto sa Dalmanuta.

¹¹ Pag-abot ninda didto, may mga Pariseo^a nga nagkadto kay Hesus para magpakigdibati sa iya. Kay gusto ninda nga tistingon siya, nganì nagpangayò sinda ning milagro halin sa langit para pamatuuran nga gingsugò siya ng Dios. ¹² Pero nagpanghaw-os si Hesus kag naghambay, “Basì baya nagapangayò ning milagro ang mga tawo sa ini nga tiyempo? Sa matuod lang, wayà na ning milagro nga ipakità sa inda!”

¹³ Kag gingbayaan niya sinda. Nagbalik siya kag ang iya mga disipulo sa baruto kag nagtabok liwat sa kabuak ng dagat.

¹⁴ Nalimutan ng iya mga disipulo nga magdaya ning tinapay puyra lang sa isa ka bilog nga nadaya ninda sa baruto. ¹⁵ Gingpaandaman sinda ni Hesus paagi sa parabola, “Magdahan gid kamo sa pangpaalsa ng mga Pariseo kag ni Herodes.”^b

¹⁶ Kay wayà sinda nakasayod adto nga parabola, nganì nagbinasuyan sinda, “Ginghambay niya adto kay wayà kita nakadaya ning tinapay.”

¹⁷ Nasayuran ni Hesus kung basì nagabinasuyan sinda. Nganì naghambay siya sa inda, “Basì nagabinasuyan kamo nga wayà tinapay? Wayà pa gid ba kamo makasayod o makaintindi? Matugas pa gid ang indo uyo? ^18,19 Igwa kamo mga mata, pero indì kamo makakità. Igwa kamo mga talinga, pero indì kamo makabatì. Wayà gid ba nindo madumdumi ang gingbuak-buak ko nga lima nga tinapay para sa 5,000 nga mga tawo? Pila ba ka tabig ang napunò nang gingtipon nindo ang wayà maubos nga pagkaon?”

Nagsabat sinda, “Dose!”

²⁰ Nagpangutana pa gid si Hesus, “Kag nang gingbuak-buak ko ang pito nga tinapay para sa 4,000, pila pa ba nga mabahoy nga tabig ang napunò nang gingtipon nindo ang wayà maubos nga pagkaon?”

Nagsabat sinda, “Pito!”

²¹ Kag naghambay si Hesus, “Dapat naintindihan nindo nga bukon tinapay ang akon gusto hambayon.”

²² Pag-abot ninda sa Betsaida, may mga tawo didto nga nagdaya ning buta nga lyaki kay Hesus. Nagpakitluoy sinda sa iya nga kung puydi paayuhon niya ang buta agud makakità. ²³ Nganì ginghawiran niya ang kamot ng buta kag ging-ibhan pakadto sa luwas ng Betsaida. Pag-abot ninda sa luwas, gingpil-an niya sa mga mata ang buta. Kag gingbutang niya ang iya mga kamot sa buta kag nagpangutana, “May nakikità ka na ba?”

²⁴ Nag-indahat ang lyaki kag naghambay, “Nakakakità na ako ning mga tawo, pero daw pareho ning mga kahoy nga nagapanaw.”

²⁵ Nganì gingbutang liwat ni Hesus ang iya mga kamot sa mga mata ng buta. Pagkatapos nagsirò ning maayo ang buta kag nagbalik ang iya panirò. Mahayag na gid ang tanan sa iya panglikità. ²⁶ Gingpaulì siya ni Hesus kag gingbilinan, “Ayaw na magbalik sa Betsaida.”^c

²⁷ Pagkatapos adto, nagkadto si Hesus kag ang iya mga disipulo sa mga baryo nga sakop ng Cesarea Filipos. Mintras nagapanaw sinda, nagpangutana si Hesus sa iya mga disipulo, “Sin-o kuno ako, sunò sa hambay ng mga tawo?”

²⁸ Nagsabat sinda, “May mga nagahambay nga ikaw si Juan nga Miyugbawtismo. Ang iban nagahambay nga ikaw si Elias kag ang iban pa gid nagahambay nga ikaw hay isa sa mga miyugbalità ng mensahe ng Dios.”

²⁹ Tapos nagpangutana siya sa inda, “Pero sin-o ako sunò sa indo?”

Nagsabat si Pedro, “Ikaw imaw ang Kristo!”^d

³⁰ Nang nabatian ni Hesus ang sabat, nagpaandam siya sa inda nga indì gid magpamalità abir kay sin-o kung sin-o siya.

³¹ Tapos naghambay si Hesus sa inda, “Ako nga Ongà ng Tawo hay dapat gid magtiis sa mga kahugaan nga humanon sa akon ng mga miyugdumaya ng mga Judio, ng mga pinunò nga parì kag ng mga manunudlò ng Kasuguan. Indì ninda ako batunon kag ipapatay ako, pero sa ikatuyo ka adlaw mabuhì ako liwat.” ³² Gingklaro gid niya ini sa inda. Pagkabatì adto ni Pedro, gingdaya niya si Hesus sa alihid kag gingsabyaw nga indì adto puydi. ³³ Pero naglingig si Hesus, nagsirò sa iya mga disipulo kag gingsabyaw si Pedro, “Palayò ka sa akon, Satanas! Kay ang imo hunahunà hay bukon halin sa Dios kundì sa tawo.”

³⁴ Nganì gingtawag niya ang mga tawo kaibahan ang iya mga disipulo nga magpalapit. Naghambay siya sa inda, “Kung may tawo nga gusto magsunod sa akon, indì niya dapat panginanuhon ang iya kaugalingon, kundì pas-anon niya ang iya krus^e kag sumunod sa akon. ³⁵ Kay ang bisan sin-o nga nagapalabi ng iya kabuhì hay maduyaan siya ning kabuhì nga wayà katapusan; pero ang bisan sin-o nga magtao ng iya kabuhì tungod sa akon kag sa Maayo nga Balità, makabaton siya ning kabuhì nga wayà katapusan. ³⁶ Ano gid baya ang mapuslan ng tawo kung mabuoy niya ang tanan nga bagay diri sa kalibutan, pero maduyà naman ang iya kabuhì nga wayà katapusan? Wayà gid! ³⁷ Kay wayà gid ning bagay nga puydi niya itao agud mapabalik niya ang kabuhì nga wayà katapusan. ³⁸ Ang bisan sin-o nga nagakahuyà sa akon kag sa akon mga ginatudlò sa ini nga tiyempo, nga ang mga tawo malain kag bukon diosnanon, ikahuyà ko da siya pag ako nga Ongà ng Tawo hay magbalik nga may kadakò nga himayà ng akon Amay kag kaibahan ko ang banal nga mga anghel.”