¹ Naghambay pa gid si Hesus sa inda, “Sa matuod lang, may mga tawo diri nga indì pa mamatay hasta nga makità ninda ang paghaharì ng Dios nga magaabot nga may gahom.”

² Pagkaligad ng unom ka adlaw, gingdaya ni Hesus sina Pedro, Santiago^a kag Juan sa mataas nga bukid nga sinda lang. Mintras nagasirò sinda kay Hesus, nagbaylo ang iya hitsura. ³ Ang iya barò hay kaputìputì nga kasilawsilaw. Wayà ning bisan sin-o diri sa kalibutan nga makapaputì ng tiyad adto. ⁴ Tapos nakità ninda si Elias kag si Moises nga nagapakig-istorya kay Hesus. ⁵ Naghambay si Pedro kay Hesus, “Maistro, maayo kay yari na kita diri. Mahuman kami ning tuyo nga bayay-bayay, ang isa para sa imo, ang isa para kay Moises, kag ang isa pa hay para kay Elias.” ⁶ Imaw ini ang iya ginghambay kay wayà siya makasayod kung ano ang iya dapat ihambay kay ginahadlukan gid sinda.

⁷ Kag may nag-abot nga panganod kag gingtabunan sinda. May nabatian sinda nga bosis halin sa panganod nga nagahambay, “Imaw ini ang akon pinalanggà nga Ongà. Pamatii nindo siya!” ⁸ Dalì-dalì sinda nga nagsirò patiyog, pero wayà na sinda ning may nakità kundì si Hesus lang.

⁹ Nang nagapatugbong sinda sa bukid, gingbilinan sinda ni Hesus nga indì gid magpamalità bisan kay sin-o kung ano ang inda nakità hasta nga siya nga Ongà ng Tawo hay mabanhaw.

¹⁰ Nganì wayà gid ninda gingpamalità adto nga natabò, pero nang sinda na lang nga tuyo, nagpinangutan-an sinda kung ano ang gusto hambayon ng pagkabanhaw. ¹¹ Kag nagpangutana sinda kay Hesus, “Basì naghambay ang mga manunudlò ng Kasuguan nga dapat mag-abot anay si Elias bago mag-abot ang Kristo?”

¹² Nagsabat siya sa inda, “Tamà inà, dapat nga mag-abot anay si Elias agud ipreparar niya ang tanan nga bagay. Basì baya gingsulat da nga ang Ongà ng Tawo dapat magtiis ning madamò nga mga kahugaan kag indì siya batunon ng mga tawo? ¹³ Pero ginahambay ko sa indo nga si Elias hay nag-abot na kag ginghuman ng mga tawo sa iya ang inda gusto sunò sa gingsulat parti sa iya.”

¹⁴ Pagbalik nina Hesus sa mga disipulo nga nabilin, nakità ninda nga madamò nga mga tawo ang nagatipon didto sa inda. May pila da ka mga manunudlò ng Kasuguan nga nagapakigdibati sa mga disipulo ni Hesus. ¹⁵ Pagkakità ng mga tawo kay Hesus, natingaya gid sinda. Adto nga daan nagdyagan sinda pakadto sa iya agud kamustahon siya. ¹⁶ Kag nagpangutana si Hesus sa inda, “Ano ang indo ginadibatihan?”

¹⁷ Kag may isa nga tawo didto sa mga nagatipon nga nagsabat, “Maistro, gingdaya ko diri sa imo ang akon ongà nga lyaki kay ginasapian siya ng malain nga espiritu, nganì indì na siya makahambay. ¹⁸ Kung ginaataki siya ng malain nga espiritu, ginapilak siya sa dutà, nagabuyà ang iya babà kag nagapagot ang iya mga ngipon, pagkatapos nagapanugas siya. Nagpabulig ako sa imo mga disipulo nga palayason ninda ang malain nga espiritu pero indì ninda kaya.”

¹⁹ Kag naghambay si Hesus, “Kamo nga mga tawo sa ini nga henerasyon wayà gid ning pagtuo! Hasta san-o pa baya ang akon pagtiis sa indo? Day-a nindo diri ang ongà.” ²⁰ Nganì gingdaya ninda ang ongà sa iya.

Pagkakità ng malain nga espiritu kay Hesus, adto nga daan gingpakurog niya ang ongà, gingtumba kag gingpaligid sa dutà nga nagabuyà ang iya babà. ²¹ Gingpangutana ni Hesus ang tatay ng ongà, “Kasan-o pa siya nga nagtyad ini?”

Nagsabat ang tatay, “Tunà pa nang maisot siya. ²² Permi lang siya ginapilak sa kalayo kag ginatagbong sa tubì ng malain nga espiritu agud patyon. Pero kung kaya mo, kaluy-i kag buligi abi kami!”

²³ Naghambay si Hesus sa iya, “Basì naghambay ka nga ‘Kung kaya mo!’ Ang tanan nga bagay mahuhuman ko sa tawo nga nagatuo sa akon.”

²⁴ Kag nagsabat ang tatay ng ongà, “Nagatuo ako, pero buligi ako sa akon wayà pagtuo.”

²⁵ Pagkakità ni Hesus nga nagadinagusò na ang mga tawo pakadto sa iya, gingsabyaw niya ang malain nga espiritu, “Ikaw nga espiritu nga nagapaapà kag nagapabungoy sa ini nga ongà, ginasugò ta ikaw nga magluwas sa iya kag indì na gid magbalik!”

²⁶ Nagsinggit ang malain nga espiritu kag gingpakurog niya ning tudo ang ongà kag nagluwas. Ang ongà hay daw patay na, nganì naghambay ang kadamuan, “Patay na siya!” ²⁷ Pero ginghawiran ni Hesus ang kamot ng ongà, gingpabangon kag nagtindog siya.

²⁸ Pagkasuyod nina Hesus sa bayay, nagpangutana ang iya mga disipulo nang sinda na lang, “Basì baya wayà namon napalayas ang malain nga espiritu sa ongà?”

²⁹ Nagsabat siya sa inda, “Adto nga klasi ng malain nga espiritu mapalayas lang paagi sa pangamuyò.”^b

³⁰ Naghalin sina Hesus didto nga lugar kag nag-agi sa probinsya ng Galilea. Indì niya gusto nga masayuran ng mga tawo nga yadto siya, ³¹ kay nagatudlò siya sa iya mga disipulo. Naghambay siya sa inda, “Ako nga Ongà ng Tawo hay itugyan sa mga tawo nga magapatay sa akon, pero pagkatapos ng ikatuyo ka adlaw mabuhì ako liwat.”

³² Ang iya mga disipulo hay wayà makaintindi kung ano ang iya gusto hambayon. Pero nahadlok sinda nga magpangutana sa iya.

³³ Nag-abot sina Hesus sa Capernaum. Nang yadto na sinda sa bayay, nagpangutana si Hesus sa inda, “Ano ba ang indo ginainistorya sa dayan mintras nagapanaw kamo?”

³⁴ Pero naghipos lang sinda kay ang gingdiniskusyunan ninda hay kung sin-o gid sa inda ang pinakaimportante sa tanan. ³⁵ Nganì nagpungkò si Hesus kag gingtawag niya ang 12 nga apostol. Kag naghambay siya sa inda, “Kung sin-o sa indo ang gusto nga maging pinunò, dapat mapainubuson siya kag maging kabulig ng tanan.” ³⁶ Tapos nagbuoy siya ning ongà nga maisot kag gingbutang niya sa inda atubangan. Gingkugos niya ang ongà kag naghambay sa inda, ³⁷ “Ang bisan sin-o nga nagabaton sa ongà nga tiyad ini tungod sa akon hay nagabaton sa akon. Kag ang nagabaton sa akon, bukon lang sa akon kundì nagabaton da sa nagsugò sa akon.”

³⁸ Niyan naghambay si Juan sa iya, “Maistro, nakakità kami ning isa ka tawo nga nagapalayas ng malain nga mga espiritu kag ang pangayan mo ang iya ginagamit. Gingpapara namon siya kay bukon naton siya kaibahan.”

³⁹ Pero naghambay si Hesus, “Pabay-i lang nindo siya kay wayà ning may nagahuman ning milagro paagi sa akon pangayan kag malagat-lagat magahambay ning malain kuntra sa akon. ⁴⁰ Ang abir sin-o nga wayà nagakuntra sa aton hay kaibahan naton. ⁴¹ Sa matuod lang, ang abir sin-o nga magtao sa indo ning maski isa lang ka tasa nga tubì tungod kamo hay nagasunod sa akon, siya hay makabaton gid ng iya bayos.

⁴² “Mas maayo pa sa isa ka tawo ang higutan ning mabahoy nga galingan nga bato ang iya liog kag itagbong sa dagat kaysa halinan pa ng kasal-anan ng isa sa mga bukon importante nga pareho ng ongà nga nagatuo sa akon. ⁴³ Kung ang imo kamot imaw ang halinan nga ikaw nagakasalà, utura inà! Mas maayo pa nga may kabuhì ka nga wayà katapusan nga isa lang ang imo kamot, kaysa duha ang imo kamot pero makadto ka naman sa impyerno^c. Ang kalayo didto indì gid mamatay. ⁴⁴ [Ang mga uyod didto wayà ning kamatayon kag ang kalayo indì mamatay.]^{d 45} Kag kung ang imo siki imaw ang halinan nga ikaw nagakasalà, utura inà! Mas maayo pa nga may kabuhì ka nga wayà katapusan nga isa lang ang imo siki, kaysa duha ang imo siki pero ipilak ka naman sa impyerno. ⁴⁶ [Ang mga uyod didto wayà ning kamatayon kag ang kalayo indì mamatay.]^{e 47} Kag kung ang imo mata imaw ang halinan nga ikaw nagakasalà, lukata inà! Mas maayo pa nga magsuyod ka sa gingharian ng Dios nga isa lang ang imo mata, kaysa duha ang imo mata pero ipilak ka naman sa impyerno. ⁴⁸ Ang mga uyod didto wayà ning kamatayon kag ang kalayo indì mamatay.

⁴⁹ “Kay ang tanan limpyuhon paagi sa kalayo pareho ng ginatao sa Dios nga ginaasinan anay.^f

⁵⁰ “Ang asin hay maayo, pero kung naduyà ang iya sabor, indì na gid ini mapuslan. Pauno pa mapabalik ang iya sabor? Dapat maging daw kamo sa asin: magbulig sa kada isa nga maayo ang indo relasyon.”